सूर्यकांत डोळसे यांच्या वात्रटिका : सूर्यकांती

बंडाचा झेंडा

2012-02-01T09:25:00.000+05:30

जेव्हा नवा पूजला जातो
जुना मात्र कुजला जातो.
तेव्हा पक्षीय निष्ठेचा
जाहीर गंडा वाजला जातो.

राजकीय गंडवागंडवीतच
पक्षीय निष्ठेचा गंडा असतो!
जुन्याजाणत्याच्या हातीच
बंडाचा झेंडा असतो!!

- सूर्यकांत डोळसे, पाटोदा (बीड)

राज ते नाराज

2012-01-31T17:13:00.003+05:30

जे पास झाले होते
ते मेरिटला उतरले नाहीत.
फार कमी सैनिक आहेत
जे सेनापतीवर बिथरले नाहीत

बिथरलेला सूर मग
असा काही गुंजला गेला.
त्याचा प्रतिध्वनी तर
थेट कृष्णकुंजला गेला.

राजकीय आशा मावळताच
सैनिकही नाराज झाले!
जे सगळीकडे होते
तेच त्यांच्याकडेही आज झाले!!

- सूर्यकांत डोळसे, पाटोदा (बीड)

जाहीर खुलासा

2012-01-30T17:36:00.002+05:30

बातमीची चौकट मोठी येते,
खुलाशाची चौकट बारकी असते.
वस्तूची असो वा चाररित्र्याची
तोडफोड तर सारखी असते.

दुसर्‍याचा तो स्वैराचार
आपली ती अभिव्यक्ती असते!
बेजबाबदारपणा झटकण्यासाठी
जाहीर खुलाशाची युक्ती असते!!

- सूर्यकांत डोळसे, पाटोदा (बीड)

प्रश्नचिन्ह

2012-01-29T15:17:00.002+05:30

सर्वात आधी,सर्वात प्रथम
वाट्टेल ते बकू लागतात.
उतावळ्या पत्रकारीतेमुळे
बातम्यांचे ’टाईम्स’चुकू लागतात.

अंदाज आणि बातमी
हे दोन्हीही खूप भिन्न आहे !
तिला बातमी कसे म्हणावे ?
जिच्यासमोर प्रश्नचिन्ह आहे !!

- सूर्यकांत डोळसे, पाटोदा (बीड)

अर्ध संन्यास

2012-01-29T14:50:00.003+05:30

ते मुत्सद्दीपणे म्हणाले,
निवडणुकीत पडणे नको
यापुढे कोणतीही
निवडणूक लढणे नको.

निवडणूक नको म्हणणे
ही राजकीय निवृत्ती नाही!
पंतप्रधानपदाचा दावा सोडणे
ही त्यांची वृत्ती नाही!!

- सूर्यकांत डोळसे, पाटोदा (बीड)

राजकीय 'फुट'कळपणा

2012-01-28T09:36:00.003+05:30

इथे फक्त फोडणारा पाहिजे
फुटणारांना कमी नाही.
कोण आणि कधी फुटेल?
याची मुळीच हमी नाही.

गल्लीपासून दिल्लीपर्यंत
फुटकळ नेत्यांची गर्दी आहे!
राजकारण कुठे चाललेय?
याचीच ही वर्दी आहे!!

- सूर्यकांत डोळसे, पाटोदा (बीड)

दगाबाज

2012-01-27T11:00:00.002+05:30

फटाफट फुटतोय
तो विश्वासाचा फुगा आहे.
विश्वासही बसत नाही
त्यांच्याकडूनच दगा आहे.

पिसाळांच्या सूर्याजीची
आठवण आज आहे !
कालपर्यंतचा निष्टावंतच
खरा दगाबाज आहे !!

- सूर्यकांत डोळसे, पाटोदा (बीड)

षंढखोरी

2012-01-26T12:57:00.003+05:30

इकडे बंड, तिकडे बंड
वाटते ही बंडखोरी आहे.
खरी वस्तुस्थिती अशी की,
ही तर षंढखोरी आहे.

बंड नेमके कुणासाठी?
केवळ स्वार्थापोटी बंड आहे!
जोडीदार बदलून उपयोग नाही
जो मुळातच षंढ आहे!!

- सूर्यकांत डोळसे, पाटोदा (बीड)

गण (गण) राज्य

2012-01-24T20:07:00.003+05:30

इकडे गण गण, तिकडे गण गण
सगळीकडे गण गण असते.
त्याच त्याच समस्यांसाठी
कायमचीच वणवण असते.

भरणार्‍यांची घरे भरली
प्रजेच्या हाती पूज्य आलेले आहे!
भारतीय गणराज्याचे
गण गण राज्य झालेले आहे!!

- सूर्यकांत डोळसे, पाटोदा (बीड)

षंढखोरी

2012-01-23T20:14:00.002+05:30

आनंदी - आनंद

2012-01-21T09:36:00.002+05:30

कुणी आमदार गळाला लावतोय
कुणी खासदार गळाला लावतोय.
कुणी आपली रिकामी घागर
थेट सत्तेच्या नळाला लावतोय.

कचा कचा वाकतात तरी
सांगतात मी स्वाभीमानी आहे!
निष्ठेच्या गप्पा मारणे म्हणजे
पालथ्या घागरीवर पाणी आहे!!

- सूर्यकांत डोळसे, पाटोदा (बीड)

का...का...का?

2012-01-20T09:31:00.000+05:30

घराणेशाहीवरच्या टीका
कराव्या तेवढय़ा थोडय़ा आहेत.
महाराष्ट्राच्या राजकारणात
सर्वत्र काका-पुतण्याच्याच जोडय़ा आहेत.

तुमच्या आमच्या हाती काय?
सर्वकाही पुतण्या आणि काकाचे आहे!
कितीही लपवले तरी कळते
त्यांचे भांडे ताकाचे आहे!!

- सूर्यकांत डोळसे, पाटोदा (बीड)

नो चॉईस

2012-01-19T20:19:00.002+05:30

यांचे त्यांना, त्यांचे यांना
राजकीय चेक असतात.
राजकीय तडजोडीवरून कळते
शेवटी सगळेच एक असतात.

घाण चिवडावी तसे
प्रचारात मुद्दे चिवडले जातात!
निवडायच्या लायकीचे नसले तरी
कुणीतरी निवडले जातात!!

- सूर्यकांत डोळसे, पाटोदा (बीड)

मुद्द्यावरून गुद्द्याकडॆ

2012-01-18T18:12:00.000+05:30

काय केले? काय राहिले?
याचा कुठे लेखाजोखा असतो?
परस्परांच्या बदनामीवरच
प्रचारामध्ये ठोका असतो.

मुद्द्यावरून गुद्द्याकडे येवून
मुद्दे अडगळीत पडल्या जातात !
सामाजिक मुद्दे सोडून
निवडणूका लढल्या जातात !!

- सूर्यकांत डोळसे, पाटोदा (बीड)

घरगुती मामला

2012-01-18T13:17:00.001+05:30

पूर्वी पक्ष फोडायचे
आता म्हणे घरं फोडली जातात.
राजकीय प्रचारात
घरगुती उणी दुणी काढली जातात.

पक्षीय राजकारण
नको तेवढे घरगुती होत आहे!
लोकांसोबत कार्यकर्तेही वैतागले
सगळेच अती होत आहे!!

- सूर्यकांत डोळसे, पाटोदा (बीड)

सत्ता नावाचे सत्य

2012-01-17T19:50:00.000+05:30

नीट बघा, कोण कुठे आहे?
कोण कुठे आहे?
सत्ता हेच अंतिम सत्य
यात काय खोटे आहे?

सत्ता नावाच्या सत्यासमोर
बाकी सबकुछ झूठ आहे!
युद्ध, प्रेम आणि राजकारणात
सर्व काही सूट आहे!!

- सूर्यकांत डोळसे, पाटोदा (बीड)

नाते आणि गोते

2012-01-17T18:55:00.003+05:30

नात्या-गोत्यात राजकारण
हल्ली भलतेच फॉर्मात आहे.
आयुष्यभर कार्यकर्ता राहणे
कार्यकत्र्यांच्या कर्मात आहे

नात्यामुळे गोत्यात येते
हे जरी कळले जाते!
तरीही नात्या-गोत्याचेच
राजकारण खेळले जाते!!

- सूर्यकांत डोळसे, पाटोदा (बीड)

ब्ल्यू थिफ

2012-01-15T10:23:00.002+05:30

कुणी वजन इकडून टाकलेप
कुणी वजन तिकडून टाकले.
सत्तेच्या तुकडय़ासाठी
चळवळीला जखडून टाकले.

वैयक्तिक अहंकार नडतोय
कुणीच वेडापिसा नाही!’
’सत्ताधारी जमात व्हा’
याचा अर्थ असा नाही!!

- सूर्यकांत डोळसे, पाटोदा (बीड)

निळे दु:ख

2012-01-14T18:06:00.000+05:30

दलित मतांची फाटाफूट
ज्याला त्याला हवी आहे.
डोक्यात ’प्रकाश’ पडला
नामदेव नेता नाही,कवी आहे.

कुणी महाआघाडीत,
कुणी महायुतीत आहे.
नेत्यांच्या फाटाफूटीने
जनता मात्र व्यथित आहे.

असा एकही जण नाही,
जो सत्तेसाठी झुरला नाही !
एकेकाळच्या वाघांचा
म्हणूनच धाक उरला नाही !!

- सूर्यकांत डोळसे, पाटोदा (बीड)

राजकीय वयोमर्यादा

2012-01-14T06:22:00.000+05:30

राजकारणातच रिटायर होण्याचे
कुठे कुणाला टेन्शन आहे?
घरी बसल्या बसल्या
पुन्हा आयती पेन्शन आहे

पेन्शनचे काही नाही
गरजवंतानी ती घेतली पाहिजे!
राजकारणाला वयाची
कमाल अट घातली पाहिजे!!

- सूर्यकांत डोळसे, पाटोदा (बीड)

ज्याचे त्याचे वजन

2012-01-13T14:04:00.002+05:30

याचे नाही तर त्याचे
तिकीट घेतले जाते.
ओतायचे तेवढे वजन
पारडय़ात ओतले जाते.

ज्याचे वजन जास्त
त्याची तिकिटावर मालकी असते!
वजनापेक्षा निष्ठा
कितीतरी हलकी असते!!

- सूर्यकांत डोळसे, पाटोदा (बीड)

देर आये दुरुस्त आये

2012-01-12T06:49:00.002+05:30

एवढे वाभाडे निघूनही
व्यवस्था कुठे शरमली आहे?
म्हणायला सोपे जाते
टीम अण्णा नरमली आहे.

झाले ते बरे झाले
कुणाविरुद्धच प्रचार नको आहे!
टीम अण्णाचा आवाज म्हणजे
सामान्य जनतेचा इको आहे!!

- सूर्यकांत डोळसे, पाटोदा (बीड)

सेनाच सेना

2012-01-11T09:17:00.000+05:30

सैनिकांच्या खांद्यावरती
सेनापतींचा मेणा आहे.
दररोज उगवलेली
कसली ना कसली सेना आहे.

सैनिकांशी सैनिकांचे
अधूनमधून युद्ध होते!
सेना आणि सेनापतीबरोबर
सैनिकांचे अस्तित्वही सिद्ध होते!!

- सूर्यकांत डोळसे, पाटोदा (बीड)

मुडदेबाजी

2012-01-10T09:18:00.002+05:30

मुडदेबाजी

सगळे अनिष्ट प्रकार
निवडणूक काळातच घडले जातात.
लोकशाहीचे मुडद्यावर मुडदे
निवडणूक काळातच पाडले जातात.

हे उघडय़ा डोळ्यांनी बघणारेच
जिवंत मुडदे असतात!
गुन्हेगारांच्या गुन्ह्यावर
पडद्यावर पडदे असतात!!

- सूर्यकांत डोळसे, पाटोदा (बीड)

पोपटी विचारवंत

2012-01-09T08:00:00.002+05:30

समोर एक, मागे एक
बोलण्याचे धंदे असतात.
पोपटी विचारवंत
सत्ताधार्‍यांचे मिंधे असतात.

त्यांनी मांडलेले विचार म्हणजे
बाष्कळ पोपटपंची असते!
पुरस्कार आणि पदांएवढीच
त्यांची वैचारिक उंची असते!!

- सूर्यकांत डोळसे, पाटोदा (बीड)

सारे काही तिकिटासाठी..

2012-01-08T20:54:00.001+05:30

इकडे घुसू की तिकडे घुसू?
दोन्ही-तिन्ही दगडीवर हात आहे.
पक्ष कोणताही असला तरी
तिकीट मिळण्याशी बात आहे.

शेवटी तिकीट महत्त्वाचे
पक्ष-बिक्ष सबकुछ झूठ आहे!
उघडी कशाला करायची?
ही तर झाकलेली मूठ आहे!!

- सूर्यकांत डोळसे, पाटोदा (बीड)

बंडाची लाट

2012-01-07T21:47:00.003+05:30

आवरता येत नाही
राजकीय कंडाला.
सर्वत्र सुरुवात झाली
पक्षीय बंडाला.

कंडोबाशी बंडोबाचे
जन्मजात नाते असते!
जुन्याच राजकीय वहीवर
स्वतंत्र खाते असते!!

- सूर्यकांत डोळसे, पाटोदा (बीड)

नववर्षाचे स्वागत

2012-01-01T18:14:00.000+05:30

नववर्षाच्या स्वागताची
ज्याची त्याची रित असते.
ते ते सोबतीला लागते
ज्याच्यावरती प्रीत असते.

कसे साजरे करू? कसे नाही?
असेच सर्वाना झालेले असते!
शुद्धीवर येतात तेव्हा
नवीन वर्षही आलेले असते!!

- सूर्यकांत डोळसे, पाटोदा (बीड)

लोकपाल भूमिका

2011-12-31T09:33:00.002+05:30

कुणाला हवे, कुणाला नको,
कुणाचा तोंडावरती हात आहे.
दुरून मज्जा बघणारांमुळेच
घोडे पेंड खात आहे.

कोणती तरी भूमिका घ्या
भूमिकेला कुठे मना आहे?
ज्याला तटस्थपणा समजता
तो तर भित्रेपणा आहे!

- सूर्यकांत डोळसे, पाटोदा (बीड)

भ्रमनिरास

2011-12-31T09:18:00.002+05:30

हे म्हणतात, त्यांनी येऊ दिले नाही
ते म्हणतात, यांनी येऊ दिले नाही.
येणार येणार म्हणता म्हणता
लोकपाल काही आले नाही.

आमच्या भाबडय़ा आशेचा
राज्यसभेत चक्काचूर झाला !
हे बुद्धिवंतांचे सभागृह आहे
आमचा ग्रह दूर झाला !!

- सूर्यकांत डोळसे, पाटोदा (बीड)

रास्त अपेक्षा

2011-12-28T09:30:00.002+05:30

कुणाला सशक्त वाटले,
कुणाला अशक्त वाटले.
लोकपाल पाहिजे म्हणता म्हणता
अण्णांचे रक्त आटले.

लोकशाहीचे पाविर्त्य जपा
अजून कुणाचे रक्त आटवू नका!
संविधानाची शपथ आहे
संसदेला पुन्हा बाटवू नका!!

- सूर्यकांत डोळसे, पाटोदा (बीड)

पुतण्यांचे बंड

2011-12-27T09:49:00.000+05:30

काका कोणताही असो
त्याच्यावर प्रसंगच बाका आहे.
काकाला पुतण्यापासून
अगदी हमखास धोका आहे.

हातच्या काकणाला
आरसा कशाला पाहिजे?
पुतणे विचारू लागले,
मुलगा आणि मुलगीकडेच
वारसा कशाला पाहिजे?

- सूर्यकांत डोळसे, पाटोदा(बीड)

वरळी ते परळी

2011-12-27T09:32:00.000+05:30

तिकडे काका आडवे होते,
इकडेही काका आडवे आहेत.
तिकडेही भोवती बडवे होते
इकडेही भोवती बडवे आहेत.

तिकडे बडव्यांविरुद्ध बंड होते,
इकडेही बडव्यांविरुद्ध बंड आहे!
परळी काय? वरळी काय?
एकच राजकीय पिंड आहे!!

- सूर्यकांत डोळसे, पाटोदा (बीड)

तिची ओळख

2011-12-25T16:13:00.002+05:30

अमक्याची पत्नी, तमक्याची आई,
एवढीच तिची ओळख आहे.
महिला आरक्षणाच्या नावाने
अजून तरी काळोख आहे.

आरक्षणाच्या खेळामध्ये
तिला प्यादी म्हणून खेळवले जाते!
पुरुषी वर्चस्वाचे समाधान
लोकशाही मार्गानेही मिळवले जाते!!

- सूर्यकांत डोळसे, पाटोदा (बीड)

राजकीय उदारीकरण

2011-12-25T15:58:00.001+05:30

चांगली ऑफर असेल तर
मुळीच टाळली जात नाही.
पक्षीय स्पृश्य-अस्पृश्यता
मुळीच पाळली जात नाही.

नव्या पिढीचे, नव्या घडीचे
हेच तर धोरण आहे!
नव्या राजकीय परिभाषेनुसार
हे राजकीय उदारीकरण आहे!!

- सूर्यकांत डोळसे, पाटोदा (बीड)

लोकपालची चाहूल

2011-12-24T08:45:00.001+05:30

लोकशाहीचे मारेकरी
थरथर कापायला लागले.
लोकपालाच्या चाहुलीनेच
लोकशाही जपायला लागले

लोकपाल विधेयकापासून
भ्रष्टाचार्‍यांचा पळ आहे!
हा लोकशाहीचा कळवळा नाही,
केलेल्या पापाचे फळ आहे!!-

- सूर्यकांत डोळसे, पाटोदा (बीड)

भारतरत्नाची दक्षता

2011-12-23T22:00:00.001+05:30

भारत रत्नाच्या नियमावलीत
काहीही घुसवणे बरे नाही.
कुणाच्याही रांगेत
कुणालाही बसवणे बरे नाही.

भारतरत्नाची खिरापत
जर कुणालाही वाटली जाईल!
तर पूर्वीच्या भारतरत्नाची
किंमत नक्की घटली जाईल!!

- सूर्यकांत डोळसे, पाटोदा (बीड)

आशावाद

2011-12-23T15:20:00.000+05:30

कुणी झाले शरमिंदे,
कुणी रागाने लाल झाले.
हो...नाही...म्हणता म्हणता
अखेर लोकपाल आले.

कुठे माशी घोटाळेल,
कुठे माशी शिंकली जाईल !
रस्त्यावरची लढाई मात्र
संसदेतच जिंकली जाईल !!

- सूर्यकांत डोळसे, पाटोदा (बीड)

आधुनिक महाभारत

2011-12-23T14:59:00.000+05:30

गोंधळून जायचा प्रसंग
गोपीनाथांवर बेतला आहे.
धनंजयाने तर म्हणे
झोपेत दगड घातला आहे.

कौटुंबिक महाभारत
रंगता रंगता रंगले आहे!
कुणी कुणाला गीता सांगायची?!!
न सांगितलेलेच चांगले आहे!!

- सूर्यकांत डोळसे, पाटोदा (बीड)

'राज'कीय भूमिका

2011-12-21T09:35:00.001+05:30

सीमावासीय राहिले बाजूला
मनसेच स्टार झाली.
'आहे तिथेच सुखाने राहा'
याचीच चर्चा फार झाली.

उपहास की उपरोध?
की हे शाब्दिक व्यंग आहे?
हीच राजकीय भूमिका असेल तर
हा अस्मितेचा मान भंग आहे!!

- सूर्यकांत डोळसे, पाटोदा (बीड)

संमेलनाध्यक्ष निवड

2011-12-20T15:22:00.001+05:30

कुणाला वाटले तर वाटू द्या
आमचे नेहमीच वाकडय़ात आहे
पण बारा कोटीच्या मराठीची
मतदार संख्या शेकडय़ात आहे

शेकडय़ांनी निवडलेला
कोटीवरती लादला जातो
घाणेरडे राजकारण करून
डाव बरोबर साधला जातो

प्रक्रिया सुधारली पाहीजे
निवडणूकीनंतरच बोलले जाते!
अध्यक्षपद पटकावले की,
तोंड बरोबर खोलले जाते!!

- सूर्यकांत डोळसे, पाटोदा (बीड)

घोडे आणि बाजार

2011-12-20T14:50:00.001+05:30

कुणी करतो जुळवाजळव,
कुणी नोटा मोजित असतो
सत्तास्थापनेच्या मुहूर्ताला
घोडेबाजार तेजीत असतो

घोडे जेवढे उधळतील
तेवढा माल द्यावा लागतो!
राजकीय रस्सीखेच अशी की,
नालीसाठीही घोडा घ्यावा लागतो!!-

- सूर्यकांत डोळसे, पाटोदा (बीड)

खड्डय़ांची 'डाग'डुजी

2011-12-02T14:58:00.001+05:30

डांबरटपणा करून
रस्त्यांना सजवू लागले.
विचारल्यानंतर कळाले,
खड्डय़ांना बुजवू लागले.

खड्डे बुजले नाहीत
खड्डे केवळ झाकले आहेत!
आधीच बरबटलेले हात
पुन्हा नव्याने माखले आहेत!!

- सूर्यकांत डोळसे, पाटोदा (बीड)

बंडखोरीचा अर्थ

2011-12-02T14:40:00.001+05:30

आपल्या आणि परक्या बंडखोरांना
वेगवेगळा न्याय असतो.
पक्षीय बंडखोरीचा अर्थ
वेगवेगळा नाहीतर काय असतो?

दुसर्‍यासाठी पायघडय़ा घालतात,
आपल्यावरती शिस्तभंग असतो!
पक्षीय बंडखोरीला,
असा आवडीचा रंग असतो!!

- सूर्यकांत डोळसे, पाटोदा (बीड)

गांधीवादाची नवी व्याख्या

2011-11-29T13:20:00.001+05:30

गांधीवादाची नवी व्याख्या

बारामतीला लागली थप्पड
दिल्लीत तिचा आवाज आला.
उथळ प्रतिक्रिया देत सुटणे
हा राळेगणचा रिवाज झाला.

अण्णांची उपहासात्मक प्रतिक्रिया
सारवासारवीनंतरही दुष्ट झाली!
गांधीवादाची नवी व्याख्या
संदर्भासहित स्पष्ट झाली!!

- सूर्यकांत डोळसे, पाटोदा (बीड)

भांडवली धोरण

2011-11-29T13:03:00.000+05:30

भांडवली धोरण

भांडवलासाठी मुद्दा पाहिजे
शेतकर्‍यांचे कुणाला पडले आहे?
शेतकर्‍यांसाठी लढावे म्हणून
कुठे कुणाचे घोडे अडले आहे?

ते स्वत:साठी लढत आहेत,
शेतकर्‍यांसाठी लढत नाहीत!
सत्तेवर कुणीही असोत
शेतकर्‍यांना पिळायचे सोडत नाहीत!!

- सूर्यकांत डोळसे, पाटोदा (बीड)

दीपोत्सवाची अपेक्षा

2011-10-26T05:07:00.000+05:30

दिवा दिपून ठेवावा
दिवा जपून ठेवावा.
दिव्या-दिव्याच्या तेजाने
दिवा आतला तेवावा.

तेवत्या दिव्यांनी
मग तेवते व्हावे.
अंधाराच्या दिशेने
त्यांनी धावते व्हावे.

जेव्हा उजळेल आकाश
उजळता प्रकाश दिसावा!
उजळत्या दीपोत्सवात
आपलाही दिवा असावा!!

- सूर्यकांत डोळसे, पाटोदा (बीड)

मौनाची भाषा

2011-10-18T19:59:00.002+05:30

जे बोलून साधता येत नाही
ते मौनाने साधता येते.
मौनाची बाधाच अशी की
न बोलताही बाधता येते.

कुणी केले बंद कान
तेही उघडण्याची आशा असते
बहिर्‍यासही ऐकू येते
अशी मौनाची भाषा असते!!

- सूर्यकांत डोळसे, पाटोदा (बीड)

यादी भावी पंतप्रधानांची

2011-10-15T19:34:00.000+05:30

कुणी वादी आहे,
कुणी प्रतिवादी आहे.
भावी पंतप्रधानांची
आपल्याकडे यादीच यादी आहे.

एकाने नाव जाहीर केले की,
दुसर्‍याच्या काळजात घर पडते आहे!
त्यामुळे भावी पंतप्रधानांच्या यादीत
रोज नव्याने भर पडते आहे!!

- सूर्यकांत डोळसे, पाटोदा (बीड)

आरक्षणाचा ड्रॉ

2011-10-14T19:35:00.000+05:30

ऐका हो ss ऐका ss
आरक्षणाची गंमत ऐका.
जिथे नवरोबा उत्सुक
तिथे उभ्या राहणार बायका.

पदराआडचे राजकारण खेळून
नथीतून तीर मारावे लागतील!
गुडघ्याचे बाशिंग बायकोला बांधून
बुजगावणे उभे करावे लागतील!!

- सूर्यकांत डोळसे, पाटोदा (बीड)

भाऊराव ते खाऊराव

2011-10-04T19:55:00.000+05:30

भाऊरावांचा महाराष्ट्र
खाऊरावांचा झाला आहे.
याचाच तर पडताळा
पटपडताळणीत आला आहे.

आम्हाला काय कुणाची भीती?
शिक्षणसम्राटांचा तोरा आहे!
शिकवा आणि कमवा
संस्थाचालकांचा नारा आहे!!

- सूर्यकांत डोळसे, पाटोदा (बीड)

पक्षदर्शन

2011-09-30T19:21:00.000+05:30

कितीही राग आला तरी
राग गिळावा वाटतो.
प्रत्येक राजकीय पक्ष म्हणजे
सर्वपक्षीय मेळावा वाटतो.

काल वेगळय़ा, परवा वेगळय़ा,
आज वेगळय़ा पक्षात आहेत!
सर्वपक्षीय भ्रमण करून आलेले
आज निष्ठावंतांच्या कक्षात आहेत!!

- सूर्यकांत डोळसे, पाटोदा (बीड)

अशीही खपवा'खप'वी

2011-09-26T16:02:00.000+05:30

ज्याच्या समोर बॉलिंग करताना
शेन वॉर्नही गडबडला.
तो मला घाबरत होता
शोएब अख्तर बडबडला.

सचिन म्हणजे सचिन,
सचिन म्हणजे फौलाद आहे!
चेंडू कुडतरल्याची कबुली देणारा
शोएब उंदराची औलाद आहे!!

- सूर्यकांत डोळसे, पाटोदा (बीड)

आमचे शपथपत्र

2011-09-23T07:59:00.002+05:30

त्यांनी रोजच्या जगण्याचे नियोजन
26 रुपयांत करून दाखवावे.
जगणेच काय पण,
32 रुपयांत मरून दाखवावे.

त्यांनाही श्रीमंत म्हणू लागले
ज्यांचे दारिद्रय़ाशी सख्य आहे!
जेवढय़ात मरणे शक्य नाही
तेवढय़ात जगणे कसे शक्य आहे?

- सूर्यकांत डोळसे, पाटोदा (बीड)

भाद्रपद दर्शन

2011-09-22T13:30:00.000+05:30

चित्रपट आणि टीव्ही
म्हणे समाजाचा ऐना असतो.
म्हणून बाराही महिने पडद्यावर
भाद्रपदाचाच महिना असतो.

कुत्र्यासारखे त्यांचे शेपूट
वाकडे ते वाकडे असते
रस्त्यावरचे 'भाद्रपद दर्शन'सुद्ध
त्याच्यापेक्षाही तोकडे असते!!

- सूर्यकांत डोळसे, पाटोदा (बीड)

प्रेमाला उपमा आहे

2011-09-21T19:44:00.002+05:30

कालचे ठाकरी बंधुप्रेम
आज खड्डय़ात घातले आहे.
आपल्या भाऊबंदकीमध्ये
त्यांनी जनावरांनाही घेतले आहे.

तेच सांगायला लागले
कोण पाळीव? कोण जंगली आहे?
एवढय़ा मोठय़ा घराण्याची इज्जत
मुंबईच्या वेशीवर टांगली आहे!

- सूर्यकांत डोळसे, पाटोदा (बीड)

उपोषण लाईव्ह

2011-09-20T09:07:00.000+05:30

'सर्वात आधी, सर्वात प्रथम'
आपले ध्येय टिकवले गेले.
जेवढे अण्णांचे दाखवले,
तेवढेच मोदींचे दाखवले गेले.

उपोषण कुणाचेही असो,
त्याच्याशी काही देणेघेणे नाही
टीआरपीच्या 24 ताशी जगात
एवढेही लक्षात येणे नाही!!

- सूर्यकांत डोळसे, पाटोदा (बीड)

उपोषण युद्ध

2011-09-18T21:33:00.002+05:30

विकासाच्या गप्पा मारल्या की वाटते
तो तर फुगीर दवणा आहे.
उपोषणाने कलंक धुतला जाईल
अशी त्यांची सदभावना आहे.

उपोषणाने चित्त शुद्ध होते
हे सत्य तर प्रयोगसिद्ध आहे!
आजकाल मात्र सगळीकडे
उपोषणाचे जाहीर युद्ध आहे!!

- सूर्यकांत डोळसे, पाटोदा (बीड)

सगळेच बोगस!

2011-09-17T19:33:00.000+05:30

बोगस पटसंख्येचा मुद्दा
ज्याच्या त्याच्या ओठावर आहे.
एकच विद्यार्थी
अनेक शाळांच्या पटावर आहे.

हे कुणालाच माहीत नाही
हेच मुळी आम्हाला पटत नाही!
म्हणूनच 'नांदेड पॅटर्न'चे
आम्हाला आश्चर्य वाटत नाही!!

- सूर्यकांत डोळसे, पाटोदा (बीड)

पेट्रोल दरवाढ

2011-09-16T08:27:00.000+05:30

वाढत्या महागाईची
पंपा-पंपावर पावती आहे.
पेट्रोलची दरवाढ
सहा महिन्यात चौथी आहे

सरकारी नियंत्रण नसल्यामुळेच
पेट्रोल मोकाट सुटलेले आहे!
रुपयाला डॉलरने
जगजाहीर लुटलेले आहे!!

- सूर्यकांत डोळसे, पाटोदा (बीड)

आणखी एक रथयात्रा

2011-09-11T19:52:00.000+05:30

ज्याची भीती वाटत होती
त्याचाच आता खतरा आहे.
अण्णा हजारेंच्या मार्गावरून
अडवाणींची रथयात्रा आहे.

लालकृष्णांची रोखठोक घोषणा
कसलीही आड वाणी नाही!
संधीचा फायदा न उठवणारा
राजकारणात तरी कोणी नाही!!

- सूर्यकांत डोळसे, पाटोदा (बीड)

लोकपालचा पोरखेळ

2011-09-10T06:11:00.000+05:30

मुले लहान असली तरी
त्यांना सर्व गोष्टी कळत असतात.
'लोकपालs लोकपालs'चा खेळ
आजकाल मुले खेळत असतात.

एकाच्या तोंडावर चिकटपट्टी,
त्याचे हातपायही बांधलेले.
मी विचारले, ही काय धमाल आहे?
मुले एका सुरात उत्तरला,
काका, हा सरकारी लोकपाल आहे!!

- सूर्यकांत डोळसे, पाटोदा (बीड)

हाय अ‍ॅलर्ट

2011-09-09T07:13:00.001+05:30

हाय अ‍ॅलर्ट

एकाही बॉम्बस्फोटाचा
नीट शोध लागत नाही.
'हाय अ‍ॅलर्ट' म्हणजे काय?
याचाही बोध लागत नाही.

भोगायचा तो वनवास
जनतेने भोगलेला असतो!
सुटकेचा नि:श्वास टाकेपर्यंत
पुन्हा 'हाय अ‍ॅलर्ट' लागलेला असतो!!

- सूर्यकांत डोळसे, पाटोदा (बीड)

नोट फॉर वोट

2011-09-07T19:53:00.000+05:30

मत गल्लीत विकले जाते,
मत दिल्लीत विकले जाते.
गल्लीत शेकडय़ावर तर
दिल्लीत कोटीवर टाकले जाते.

गल्लीतले विक्रेते किरकोळ,
दिल्लीतील विक्रेते घाऊक आहेत!
मताला दान म्हणणारे
व्यवहारी नाहीत, भावूक आहेत!!

- सूर्यकांत डोळसे, पाटोदा (बीड)

मतलबी गुरूत्व

2011-09-06T19:42:00.000+05:30

हा विद्यार्थी माझा आहे,
तो विद्यार्थी माझा आहे.
शिक्षकांच्या गप्पा ऐकण्यात
खरोखरच मजा आहे.

यशस्वी विद्यार्थी त्यांचे,
मग अयशस्वी कुणाचे असतात?
सोयीचे गुरूत्व दाखविणारे
विचार मतलबीपणाचे असतात !

- सूर्यकांत डोळसे, पाटोदा (बीड)

'झेड' झिडकारू नका !

2011-09-06T08:40:00.002+05:30

अण्णा दुसरे 'गांधी' आहेत तर,
इथे दुसरा नथुरामही असू शकतो.
याच्यावर तरी सर्वाचा विश्वास
अगदी ठामपणे बसू शकतो.

आपण 'राष्ट्रीय' झाल्याची गोष्ट
अण्णांच्या लक्षात यायला हवी!
स्वत:साठी नाही, राष्ट्रासाठी तरी
अण्णांनी झेड सुरक्षा घ्यायला हवी!!

- सूर्यकांत डोळसे, पाटोदा (बीड)

आदर्श पुरस्कार मिळवलेल्या शिक्षकाचे मनोगत

2011-09-05T08:18:00.000+05:30

पुरस्कार बोध

2011-09-05T07:20:00.003+05:30

आदर्शाची निवड अशी की,
पुरस्कार मागायला लावतात.
कितीही नि:संशय झाले तरी
संशयाने बघायला लावतात.

आदर्श शिक्षक पुरस्कारांचा
वरचेवर विनोद होतो आहे!
खर्‍या आदर्शाचे हे काम नाही
दुर्दैवाने हाच बोध होतो आहे!!

- सूर्यकांत डोळसे, पाटोदा (बीड)

आदर्शाची आडवाट

2011-09-04T09:20:00.002+05:30

नाकर्त्याला पुरस्कार,
कर्त्याला वनवास भोगावा लागतो.
आदर्श शिक्षक पुरस्कार
अक्षरश: मागावा लागतो.

आदर्श असून चालत नाही,
प्रामाणिकपणाही नडला जातो!
डाव-प्रतिडाव टाकले तरच
पुरस्कार पदरी पडला जातो!!

- सूर्यकांत डोळसे, पाटोदा (बीड)

शौचालय सक्ती

2011-09-03T08:19:00.002+05:30

जे घरी बसत नव्हते
त्यांना घरी बसावे लागले.
ग्रामपंचायत सदस्यांना
नियमाचे फटके सोसावे लागले.

कळत असूनही वळत नाही
ही सामाजिक उणीव आहे!
ग्रा.पं. सदस्यत्व रद्द होणे
ही जबाबदारीची जाणीव आहे!!

- सूर्यकांत डोळसे, पाटोदा (बीड)

पक्षांतर आणि पेपरांतर

2011-09-02T08:31:00.000+05:30

पत्रकारांनी पेपर बदलणे,
नेत्यांनी पक्ष बदलणे,
दोन्हीही गोष्टी सारख्या असतात.
फक्त पक्षांतरित नेत्यांच्याच
फिरक्यावर फिरक्या असतात.

प्रश्न निष्ठेचा नाही,
प्रश्न तर पापी पोटांचा आहे!
विचार-बिचार मानतो कोण?
सगळा मामला नोटांचा आहे!!

- सूर्यकांत डोळसे, पाटोदा (बीड)

टोपीवर टोपी

2011-09-01T13:21:00.001+05:30

तुही अण्णा मीही अण्णा
गणपती म्हणाला उंदराला.
गणपतीच्या पोटाकडे पाहून
पुन्हा हसू आले चंद्राला

आज प्रत्येकाच्याच डोक्यावर
'मी अण्णा हजारे' अशी टोपी आहे!
कृती अवघड असली तरी
करायला सोपी आहे!!

- सूर्यकांत डोळसे, पाटोदा (बीड)

हक्कभंगाची गंमत

2011-08-30T19:44:00.002+05:30

कुणी खरे बोलले की,
त्याला वाचाळता म्हणू नये.
नैसर्गिक वास्तवतेला
कधी गचाळता म्हणू नये.

त्यांना बोलले की हक्कभंग
जनसामान्यांना किंमत नाही!
आपल्या लोकशाहीमध्ये
हक्कभंगासारखी गंमत नाही!!

- सूर्यकांत डोळसे, पाटोदा (बीड)

लालू उवाच

2011-08-28T12:53:00.002+05:30

भ्रष्टाचारावर बोलण्याचा
लालूस अधिकार कुठला होता?
लोकसभेत एव्हढा बरळला की,
जसा चारा खाऊन उठला होता.

अण्णा जिंकले,देश जिंकला
ज्याच्या त्याच्या तोंडी साखर आहे !
लोकपाल चर्चेतून सिद्ध झाले
लालू पक्का जोकर आहे !!

- सूर्यकांत डोळसे, पाटोदा (बीड)

'वर' कमाई

2011-08-28T11:15:00.002+05:30

भ्रष्टाचाराविरुद्ध बोलताना
नैतिकता कुठे आचरली जाते?
जिथे मुलगी देतानाही
वरकमाई विचारली जाते.

भ्रष्टाचाराची तिरडी
तेव्हाच खरी उठली जाईल!
जेव्हा वर कमाईची
सर्वाना लाज वाटली जाईल!!

- सूर्यकांत डोळसे, पाटोदा (बीड)

उपोषणाचा मार्ग

2011-08-27T19:55:00.000+05:30

अण्णांच्या आंदोलनाच्या
प्रतिक्रिया दिसायला लागल्या.
माहेरी जाईन म्हणणार्‍या
उपोषणाला बसायला लागल्या.

कितीही नमते घेतले तरी
त्यांचा माहेरचाच ठेका आहे!
लोकशाहीवादी नवरे म्हणतात
हा नवरेशाहीला धोका आहे!!

- सूर्यकांत डोळसे, पाटोदा (बीड)

वैचारिक रंगबाजी

2011-08-25T07:02:00.002+05:30

आंदोलन यशस्वी करण्याचा
जसा अण्णांचा चंग आहे.
तसा कुणाकडून जातीय तर,
कुणाकडून धार्मिक रंग आहे.

त्यांना तसेच दिसणार
जसे डोळ्यावर गॉगल आहेत!
त्यांच्या बुद्धीची कीव येते
कसे म्हणावे ते पागल आहेत!!

- सूर्यकांत डोळसे, पाटोदा (बीड)

विरोधाभास

2011-08-24T06:47:00.001+05:30

अण्णांच्या आंदोलनात बहकून जावे
एवढे कुणीच भावूक नाही.
असे कितीतरी जण आहेत
त्यांना 'लोकपाल' ठाऊक नाही.

नसेना का नसले तर
कुणीतरी त्यांच्यासाठी लढतो आहे!
भुंकणारे भुंकले तरी
लढय़ाचा पाठिंबा रोज वाढतो आहे!!

- सूर्यकांत डोळसे, पाटोदा (बीड)

लक्षवेध ते बुद्धिभेद

2011-08-24T06:43:00.000+05:30

अण्णांचा लोकपाल लढा
जेवढा लक्षवेधक आहे.
बुद्धिवंताचाही अपप्रचारही
तेवढाच बुद्धिभेदक आहे.

लोक जागृत झाले नसते तर
इंग्रज कधीच पळाले नसते!
आजचे बुद्धिवंत तेव्हा असते तर
स्वातंत्र्य कधीच मिळाले नसते!!

- सूर्यकांत डोळसे, पाटोदा (बीड)

लढय़ा मागचे हात

2011-08-21T16:28:00.002+05:30

दोस्त हो सावध रहा
ही वैर्‍याची रात आहे.
शोधा मागे शोध सुरू झाले
आंदोलनामागे कुणाचा हात आहे?

शोधायची गरज नाही
आंदोलनांची कारणं सर्वज्ञात आहेत !
अण्णांच्या लढय़ाचे कारणच
बरबटलेले हात आहेत!!

- सूर्यकांत डोळसे, पाटोदा (बीड)

कलमाडी बोले राजाला

2011-08-20T07:16:00.002+05:30

पूर्वीच लोकपाल आले असते तर
किती बरे झाले असते.
तुमच्या-माझ्या नशिबात
हे दिवस कशाला आले असते?

ना होता माझा खेळखंडोबा,
ना तुमचा बॅण्ड वाजला असता!
लोकपालाचा वचक असता तर
भ्रष्टाचार कशाला माजला असता!!

- सूर्यकांत डोळसे, पाटोदा (बीड)

बुद्धिवंतांची टवाळखोरी

2011-08-19T17:39:00.000+05:30

टेबला-टेबलावरती
टपलेला बोका आहे.
लोकपालासाठीचे आंदोलन
म्हणे लोकशाहीला धोका आहे.

ज्याला जशी ओकायची
तशी गरळ ओकू लागले.
वातानुकूलित बुद्धिवंत
आंदोलनाला ठोकू लागले.

त्यांना जसे लढता येईल
तसे बुद्धिवंतांनी लढून दाखवावे !
निदान रेशनकार्ड तरी
लाचखोरीशिवाय काढून दाखवावे !!

- सूर्यकांत डोळसे, पाटोदा (बीड)

खर्‍याचे नशीब

2011-08-18T20:42:00.002+05:30

हल्ली खोटय़ाच्या नाही तर
खर्‍याच्या पदरी गोटा आहे.
खर्‍यापेक्षा खोटय़ाचाच
हल्ली नको तेवढा रेटा आहे.

खोटय़ाचा जरी फुसका बार,
खर्‍याच्या अंगी सुरुंग आहे!
खोटे मोकाट सुटलेले,
खर्‍याच्या नशिबी तुरुंग आहे!!

- सूर्यकांत डोळसे, पाटोदा (बीड)

लढाईचे सूत्र

2011-08-18T20:38:00.002+05:30

भ्रष्टाचारविरोधी लढय़ात
वैयक्तिक सत्याग्रही व्हावे लागेल.
देणार नाही, घेणार नाही
एवढे निग्रही व्हावे लागेल.

चारणे थांबविल्याशिवाय
खाणेही थांबणार नाही!
मग लढय़ाची यशस्विता
फार काळ लांबणार नाही!!

- सूर्यकांत डोळसे, पाटोदा (बीड)

श्रद्धाळूंसाठी...

2011-08-13T18:51:00.002+05:30

श्रद्धा आणि अंधश्रद्धेत
आंधळेपणाचा फरक आहे.
बिनधास्त ठोकून देतात
वर स्वर्ग खाली नरक आहे.

श्रद्धेची अंधश्रद्धा होऊ नये
यासाठी श्रद्धा तपासली पाहिजे!
उघडय़ा डोळय़ांनी, जागत्या बुद्धीने
आपली श्रद्धा जोपासली पाहिजे!!

- सूर्यकांत डोळसे, पाटोदा (बीड)

प्रति सेन्सॉरशिप

2011-08-12T16:52:00.001+05:30

सेन्सॉरची सेन्सॉरशिप
बोर्डावर यायला लागली.
जिकडे तिकडे प्रति सेन्सॉरशिप
निर्माण व्हायला लागली.

प्रति सेन्सॉरशिप तर
कलेसाठी धोक्याची तर!
तथाकथित सेन्सॉरवाल्यांना
प्रतिक्षा फक्त मोक्याची आहे!!

- सूर्यकांत डोळसे, पाटोदा (बीड)

स्वच्छता प्रमाणपत्र

2011-08-11T17:00:00.002+05:30

जयंत्या, पुण्यतिथ्याच काय?
वाढ-दिवसही घातले जातात.
भाडोत्री विचारवंतांकडून
स्वच्छता प्रमाणपत्र घेतले जातात.

आजकाल स्वच्छता प्रमाणपत्र
चोर-लुटारूंच्याही हातात आहेत!
भाडोत्री विचारवंतांचे धंदे
हाऊसफुल्लच्या बेतात आहेत!!

- सूर्यकांत डोळसे, पाटोदा (बीड)

नेतृत्वाची ऐशी-तैशी

2011-08-10T06:38:00.000+05:30

सुरवंटाचे फुलपाखरू व्हावे
तसा नेता घडावा लागतो.
तळमळीच्या कार्यकर्त्यातुनच
नेता बाहेर पडावा लागतो.

हा राजकीय आदर्शवाद तर
केवळ बोलण्यासाठी उरला आहे !
कसले सुरवंट? कसले फुलपाखरू?
बापाने पोरगा माथी मारला आहे!!

- सूर्यकांत डोळसे, पाटोदा (बीड)

भ्रमाचा भोपळा

2011-08-09T05:10:00.000+05:30

सुशिक्षितांच्या घरामध्ये
जरी भोपळा हजर आहे.
तरीही त्यांना दृष्ट लागेल
अशी आमची नजर आहे.

घरातला भोपळाच
सगळे धाब्याला टांगतो आहे!
ज्याच्या त्याच्या अकलेचे मोजमाप
भोपळा बरोबर सांगतो आहे!!

- सूर्यकांत डोळसे, पाटोदा (बीड)

संमेलनाचे कवित्व

2011-08-08T06:39:00.002+05:30

संमेलनाच्या नंतर असते,
संमेलनाच्या आधी असते.
साहित्य संमेलन म्हटले की,
त्यात वादावादी असते.

साहित्यापेक्षा संमेलन
वादावादीमुळे लक्षणीय ठरते!
साहित्यिक कमी, घुसखोर जास्त
संमेलनही प्रेक्षणीय ठरते!!

- सूर्यकांत डोळसे, पाटोदा (बीड)

मैत्री रे मैत्री

2011-08-07T22:42:00.002+05:30

राजकीय मैत्रीसारखी
आपली मैत्री असू नये.
ऊठसूट आपल्या मैत्रीवर
अविश्वास दाखवीत बसू नये.

मैत्रीला बहुमत नाही,
एकमताचा पाया असावा!
मैत्री अशी असावी
मैत्रीच कस्तुरीचा फाया असावा!!

- सूर्यकांत डोळसे, पाटोदा (बीड)

पक्षांतराचा अर्थ

2011-08-06T21:53:00.000+05:30

हकालपट्टी आणि पक्षत्यागात
अंतर फार थोडे असते.
नेमके काय खरे मानावे?
हे राजकीय कोडे असते.

हकालपट्टीपेक्षा पक्षत्याग
पवित्र असल्यासारखे वाटते!
हकालपट्टी म्हटले की,
बुडावर लाथ बसल्यासारखे वाटते!!

- सूर्यकांत डोळसे, पाटोदा (बीड)

बेशर्मी मोर्चा

2011-08-05T22:50:00.002+05:30

अंगावरचे कपडे काढून
लोकांचे लक्ष वेधले गेले.
त्यांचे त्यांनाच ठाऊक
नेमके काय साधले गेले?

जरी बेशर्मी मोर्चामुळे
सामाजिक बेशर्मी नगडी आहे !
महिलांचे प्रश्न मांडंण्याचा
हा मार्ग मात्र बेगडी आहे !!

- सूर्यकांत डोळसे, पाटोदा (बीड)

ग्लोबल महागाई

2011-08-05T22:44:00.002+05:30

दररोजचा दिवस ढकलताना
सामान्य माणूस अगतिक आहे.
त्यालाच सांगणे बरे नाही
महागाईची समस्या जागतिक आहे.

समस्या जागतिक असो,
वा स्थानिक असो
ज्याची त्याला झळ आहे !
लागल्याशिवाय कळत नाही
महागाईची केवढी कळ आहे !!

- सूर्यकांत डोळसे, पाटोदा (बीड)

खड्डय़ांची आवश्यकता

2011-08-05T08:31:00.002+05:30

रस्त्यावरचे खड्डे
जनतेकडून सोसले जातात.
रस्ते आणि खड्डय़ावरच
कार्यकर्ते पोसले जातात.

आंदोलनाशिवाय लोक
दुसरे काय करू शकतात?
दरवर्षी खड्डे पडले नाहीतर
कार्यकर्ते उपाशी मरू शकतात!

- सूर्यकांत डोळसे, पाटोदा (बीड)

सापांचे मनोगत

2011-08-04T08:19:00.000+05:30

आमचे रक्षण जरूर करा,
मात्र आम्हाला पुजू नका
आम्ही दूधखुळे नाहीत
आम्हाला दूध पाजू नका

आम्ही काही माणसांप्रमाणे
मनामध्ये डुख धरीत नाहीत!
उत्साही सर्पमित्रांएवढे
आमचे हाल कुणीच करीत नाहीत!!

- सूर्यकांत डोळसे, पाटोदा (बीड)

सारेच चमत्कारीक !

2011-08-03T18:03:00.002+05:30

इथे चमत्कारांना कमी नाही
मोठा चमत्कारीक देश आहे.
नव नव्या चमत्कारांचा नमुना
न चुकता पेश आहे.

ना चौकशी,ना चिकित्सा,
लोकच दूधखुळे आहेत !
लोक अज्ञानाच्या जिवावरच
चमत्कारीक चाळे आहेत !!

- सूर्यकांत डोळसे, पाटोदा (बीड)

लोकशाहीचा पुळका

2011-08-03T08:59:00.002+05:30

समाज एकवटू नये
एवढेच त्यांच्या डोक्यात आहे.
त्यांनी आरडाओरड सुरू केली,
आपली लोकशाही धोक्यात आहे.

जेव्हा लोक एकवटतात तेव्हा,
चांगल्या चांगल्यांची फाटू लागते!
दुर्लक्षित केलेली लोकशाही
अचानक आपली वाटू लागते!!

- सूर्यकांत डोळसे, पाटोदा (बीड)

खड्डय़ांचा दचका

2011-08-02T06:29:00.001+05:30

रस्त्यात खड्डे नाही,
खड्डय़ात रस्ते असतात.
सामान्य माणसांचे जीव
त्यांच्यासाठी सस्ते असतात.

एकदा गाफील राहिले की,
त्याचा पाच वर्षे पचका असतो!
'आता तरी शहाणे व्हा'
जनतेला खड्डय़ांचा दचका असतो!!

- सूर्यकांत डोळसे, पाटोदा (बीड)

'मार्क्‍स'वादी मूल्यमापन

2011-08-01T13:59:00.002+05:30

आठवीपर्यंत परीक्षा नाहीत
म्हणजे नक्कीच धोका आहे
श्रेण्या नकोत, मार्क्‍स हवेत
'मार्क्‍स'वाद्यांचा हेका आहे

परीक्षा रद्दच्या अफवेचा
वरून खाली पाझर आहे!
नव्या मूल्यमापन योजनेला
'मार्क्‍स'वाद्यांकडून गाजर आहे!!

- सूर्यकांत डोळसे, पाटोदा (बीड)