दुर्दैवी चित्र

कामावर मजूर नसतातच
मजुरांची डमी असते.
रोजगार हमी योजना म्हणजे
भ्रष्टाचाराची हमी असते.

रोजगाराची हमी आहे
असे कागदोपत्री बोलले जाते !
योजना कोणतीही असो,
तिला वाटून-वाटून खाल्ले जाते !!

- सूर्यकांत डोळसे, पाटोदा (बीड)

वेधशाळेचा पाढा

आठवत नाही?

ज्याची त्याची 'डोके 'बाजी

केवळ भजनापुरतेच
राष्ट्रपुरुष भजले जातात.
विचार सोडून देऊन
फक्त फोटोच पुजले जातात.

राष्ट्रपुरुष डोक्यात घेण्यापेक्षा
डोक्यावर घेणे सोपे असते!
विचारांचे पाईक होण्याऐवजी
झिलकरी होणे सोपे असते!!

- सूर्यकांत डोळसे, पाटोदा (बीड)

चमचेगिरी

पळवापळवी

पटपडताळणीच्या धाकाने
नको त्या गोष्टी घडू लागल्या.
जिल्हा परिषदेच्या शाळा
विद्यार्थ्यांविना ओस पडू लागल्या.

कुणाला वाटेल, पालकांच्या मनाची
ही वळवावळवी आहे!
ही वळवावळवी नाही
ही विद्यार्थ्यांची पळवापळवी आहे!!

- सूर्यकांत डोळसे, पाटोदा (बीड)

लग्नाचा प्रस्ताव

लग्नाचा प्रस्ताव

बेडूक म्हणाला बेडकीला,
पावसाचा प्रश्न सोडवून टाकू.
तुझ्या-माझ्या लग्नाचा बार
चल एकदाचा उडवूनटाकू.

बेडकी फुगत म्हणाली,
असे वेडय़ासारखे वागायचे नाही!
तुझ्या-माझ्या लग्नाने
कोल्हय़ाचे लग्नही लागायचे नाही!!

- सूर्यकांत डोळसे, पाटोदा (बीड)

अग्निकांड

मंत्रालयातील आग

मंत्रालयाला लागली आग 
राज्यभर संशयाचा धूर निघाला.
लोकांच्या बोलण्यातून 
अविश्वासाचा सूर निघाला.

फायलींची तर राख झाली 
विश्वासाची राख होऊ नये! 
चौकशीतून सत्य बाहेर यावे
तेही जळून खाक होऊ नये!!

- सूर्यकांत डोळसे, पाटोदा (बीड)

आघाडी धर्म

राजकीय विरोधकांकडून
नेहमी वर्मावर बोट असते.
आघाडीतल्या आघाडीत
आघाडी धर्मावर बोट असते.

आघाडीतला राजकीय तणाव
किती तरी जबरी असतो!
कितीही ताणा, तुटत नाही
आघाडी धर्म रबरी असतो!!

- सूर्यकांत डोळसे, पाटोदा (बीड) 

शिक्षणाचे ’अर्थ’कारण

'नोटे'शन

पावसाचा स्वभाव

पाऊस नेहमी मंगल करतो,
पाऊस कधी दंगल करतो
वेधशाळेच्या अंदाजांची
पाऊस नेहमी टिंगल करतो.

पाऊस रुजला जातो,
पाऊस पुजला जातो
कित्येक किलोमीटर पडूनही
पाऊस सें.मी.त मोजला जातो

म्हणूनच पाऊस रुसतो
कुठेतरी दडी मारून बसतो!
भरलेले आभाळही
डोळ्यादेखत मोकळे करून बसतो !!

-सूर्यकांत डोळसे, पाटोदा (बीड)

'प्रणव' ओंकार

आपल्या मुखाने मर्जी जाहीर करून
काँग्रेसने 'प्रणव' ओंकार केला.
यादव झाले मुलायम
मायावतींकडूनही हुंकार आला.

मावळत्याला विचारतो कोण?
उगवत्याला सलाम आहे!
डाव्या ठरलेल्या ममतांसाठी
सबुरीचा 'कलाम' आहे!!

- सूर्यकांत डोळसे, पाटोदा (बीड)

दी ग्रेटेस्ट इंडियन

कुठे बंदा रुपया?
कुठे खुर्दा आहे?
सर्वोत्कृष्ट भारतीय ठरवताना
कुणाचीही कुणाशी स्पर्धा आहे.

सर्वोत्कृष्ट भारतीय निवडणे
हा शोध नाही, जावईशोध आहे!
अनाठायी तुलना करू नये
यातून हाच खरा बोध आहे!!

- सूर्यकांत डोळसे, पाटोदा (बीड)

आरक्षणाचा आधारस्तंभ

राष्ट्रपतीपदाची उमेदवारी

उमेदवारी जाहीर करण्यात
आघाडीमध्ये आघाडी आहे.
एकमत व्हायचे सोडून
बिघाडीवर बिघाडी आहे.

आपल्याच हाताने
आपलाच उल्लू आहे!
उमेदवारांच्या नावांचे
रोज नवेनवे पिल्लू आहे!!

- सूर्यकांत डोळसे, पाटोदा (बीड)

देशद्रोहाचा गुन्हा

कुणाच्याही राष्ट्रप्रेमी टाळक्यात
तिरसटपणा घुसू शकतो.
भ्रष्टाचारविरोधी लढा
देशद्रोह कसा असू शकतो?

हा देशद्रोहाचा गुन्हा असेल तर
परत गुन्हा करावा लागेल!
राष्ट्रप्रेमाच्या व्याख्येचा विचारही
नव्याने पुन्हा करावा लागेल!!

- सूर्यकांत डोळसे, पाटोदा (बीड)

चोरांचे स्वागत

ज्यांचे तोंड काळे आहे
ते उजळ माथ्याने फिरत आहेत.
सज्जनाबरोबर कायद्याचीही
जाहीर चेष्टा करत आहेत.

चोरांचेच जयजयकार,
चोरांचेच आगत-स्वागत आहे!
न केलेल्या पापांची शिक्षा
इथे सज्जन भोगत आहे!!

- सूर्यकांत डोळसे, पाटोदा (बीड)

परिवर्तनाचे साधन

सत्तेच्या साधनाचा
परिणाम अगदी उलट होतो.
जनता राहते बाजूला
नेत्यांचाच कायापालट होतो.

कालचा गरीब नेता
आज नको तेवढा सधन आहे!
उदाहरणासहित सिद्ध होते
सत्ता परिवर्तनाचे साधन आहे!!

- सूर्यकांत डोळसे, पाटोदा (बीड)

शाब्दिक उद्योग

शाब्दिक उद्योग


सध्या महाराष्ट्राच्या नशिबाचे
अनिष्ट योग चालू आहेत.
कुरघोडीच्या राजकारणाचे
वेगळेच 'उद्योग' चालू आहेत.

शह-काटशहाचे प्रसंग
नेहमीच गृहीत धरावे लागतात!
जणू राजकीय करमणूक म्हणून
शाब्दिक उद्योग करावे लागतात!!

- सूर्यकांत डोळसे, पाटोदा (बीड)

शौचालयाची चर्चा

आयोगाचे नियोजन
आपल्या ध्यानात येऊ शकते
ज्यांच्या शौचालयाचीही
देशभर चर्चा होऊ शकते.

कुठे 28 रुपये?
कुठे 35 लाख रुपये!
तुमच्या आमच्या घरापेक्षाही
त्यांची शौचालये झ्यॅक आहेत!!

- सूर्यकांत डोळसे, पाटोदा (बीड)

मान्सूनची ओळख

मान्सूनची ओळख

तो म्हणाला, मी मान्सून आहे
ती म्हणाली, ओळख सांग.
वातकुक्कुट यंत्रावरचे कोंबडे
तेव्हा देऊ लागले बांग.

तो वि्रसला, तो बरसला
त्याच्याकडे पुरावा नव्हता.
वीज चमकली, ढग गडगडले
आता त्यांच्यात दुरावा नव्हता.

धपापल्या श्वासाने, मातीच्या वासाने
ती पावसात ¨झिंगत आहे!
मान्सून आला, मान्सून आला
ती ओलेत्यानेच सांगत आहे!!

-सूर्यकांत डॊळसे, पाटोदा(बीड)
मोबाईल-9923847269
-------------------------
चिमटा-3042
दैनिक पुण्यनगरी
8जून 2012
--------------------------

आश्चर्यकारक पाठिंबा

आश्चर्य वाटावा असा
प्रकार घडू लागला.
अण्णांपेक्षा बाबांच्या आंदोलनाला
पक्षीय पाठिंबा वाढू लागला.

लोकपालाकडून काळय़ा पैशाकडे
आंदोलनाची दिशा आहे!
दगडापेक्षा वीट मऊ वाटल्यानेच
पक्षीय पाठिंब्याची भाषा आहे!!

- सूर्यकांत डोळसे,पाटोदा(बीड)

खडे बोल

नारीभक्षक

स्त्रीभ्रूण हत्येची
जिकडे-तिकडे साथ आहे.
राक्षसीवृत्तीवरही
नारीभक्षकांची मात आहे!

समाजातल्या नारीभक्षकांची
आज पाशवी युती आहे!
स्त्रीभ्रूण हत्येचे आकडे सांगतात
नारीभक्षकांचे प्रमाण किती आहे !!

-सूर्यकांत डॊळसे,पाटोदा (बीड)

सामाजिक ढोंग

झोपेचेही सोंग असते,
जाग आल्याचेही सोंग असते.
सामाजिक जागृती
हे सोयीस्कर ढोंग असते.

तेवढय़ापुरती जागरूकता
पुन्हा सगळी सामसूम असते!
सामाजिक बेपर्वाईमुळेच
चोरांचीही धामधूम असते!!

- सूर्यकांत डोळसे, पाटोदा (बीड)

बीडची नाचक्की

काळा पैसा

जेवढा स्वीस बँकेत ठेवला आहे
तेवढाच इथे दिला-घेतला जातो.
काळा पैसा कुठेही असो
तो नक्की उतला-मातला जातो.

भारत देश म्हणजे
काळय़ा पैशाची खाण आहे!
ज्याच्याकडे काळा पैसा जास्त
त्याचेच खरे मानपान आहे !!

- सूर्यकांत डोळसे, पाटोदा (बीड)

मान्सूनचा इशारा

तारीख-बिरीख, मुहूर्त-बिहूर्त
मान्सून असले काही मानत नाही.
भसाभस वारे वाहिले तरी
तो पाऊस सोबत आणत नाही.


मान्सून म्हणतो, बदलायला शिका
आपले मात्र जुनेच पाढे असतात!
वेधशाळेच्या अंदाजांचेही
राडय़ावरती राडे असतात !!


- सूर्यकांत डोळसे, पाटोदा (बीड)

संदेशाची ऐशीतैशी

शिक्षण म्हणजे वाघिणीचे दूध
हे प्रत्यक्षात सिद्ध होऊ लागले.
शिकून, संघटित होऊन
एकमेकांच्या अंगावर धावू लागले.

शिका, संघटित व्हा, संघर्ष करा
याचा नेमका अर्थ कुठला आहे?
आपल्यातल्या आपल्यातच
शैक्षणिक संघर्ष पेटला आहे!

- सूर्यकांत डोळसे, पाटोदा (बीड)