राजकीय भूकंप

धक्क्यावर धक्के
नांदेडला भूकंपाचे धक्के आहेत.
तेच दूरचे नातेवाईक ठरले
खरोखर जे सख्खे आहेत.

भ्रष्टाचार आणि जमीनीचे
पारंपारिक नाते आहे !
जो आपल्याला खाईल
त्याला जमीन खाते आहे !!

-सूर्यकांत डोळसे,पाटोदा (बीड)

सोसायटीचे आदर्श

भ्रष्टाला भ्रष्ट भेटला की,
कायद्यालाही फसवले जाते.
आडवे तिडवे कामसुद्धा
सरळ नियमात बसवले जाते.
ते काम चुटकीसरशी होते

जिथे हरामखोरांचे स्पर्श होतात !
आजच्या सोसायटीमध्ये
असेच लोक आदर्श होतात !!

-सूर्यकांत डोळसे,पाटोदा (बीड)

अरूंधती (ची) राय

काश्मिर  भारताचा भाग नाही
हा देशद्रोह नाही तर काय आहे ?
बुकर विजेत्या अरूंधतीची
ही स्फोटक राय आहे.

अभिव्यक्ती स्वातंत्र्याचे
हे स्वैराचारी रूप आहे !
त्यांनी तोंडाला आवर घातला तरी
आमच्यासाठी खूप आहे !!

-सूर्यकांत डोळसे,पाटोदा (बीड)

दूधाची शपथ

नरबळींचा संदेश

आम्ही मेलो ते मेलो,
उरलेल्यांना तरी वाचवू शकता.
पुरोगामित्त्वाचा संदेश
तुम्ही घरोघरी पोचवू शकता.

अंधश्रद्धा निर्मुलन कायदा
जर प्रत्यक्षात आला असता.
कदाचित आम्हां दुर्दैवी जीवांना
त्याचा नक्की फायदा झाला असता.

सांगणारा मूर्ख आहे,
कायदा धर्माच्या आड येतो आहे !
तुमचा बळी गेल्यावर समजेल
तो धर्माच्या नावाने भाड खातो आहे !!

-सूर्यकांत डोळसे,पाटोदा (बीड)

ताजमहालाचे सत्य

प्रेमाच्या प्रतिकालाही
द्वेषाने ठोकरू लागले
गाडलेले मुडदेही
परत परत उकरू लागले.

ताजमहाल ही तेजोमहाल?
ही भ्रामक खबर आहे !
काहीही असले तरी
शेवटी ती कबर आहे !!

-सूर्यकांत डोळसे,पाटोदा (बीड)

घराणेशाहीची व्याख्या

पोरांसोबत नातवा-पतवाच्याही
पक्षात जागा पक्क्या करू लागले.
आपल्याच सोयीनुसार
घराणेशाहीच्या व्याख्या करू लागले.

आपली ती लोकशाही,
दुसर्‍याची ती घराणेशाही आहे !
हा नवा साक्षात्कार तर
राजकारणात ठायी ठायी आहे !!

-सूर्यकांत डोळसे,पाटोदा (बीड)

’कसाब’गिरी

शेपूट वाकडे आहे
म्हणून तर तो भुंकतो आहे.
जिवंत ठेवला म्हणून तर
कॅमेर्‍यावर थुंकतो आहे.

आपली न्यायप्रियता
कसाबसाठी शोभादायक नाही!
कसाबच सिद्ध करतोय
तो दयेच्या लायक नाही !!

-सूर्यकांत डोळसे,पाटोदा (बीड)

आवाजाचा डेसिबल

नवर्‍याचा चढला की,
बायकोचा चढत असतो.
घरातल्या घरात
सारखा डेसिबल वाढत असतो.


कुठे तिचा दाबला जातो,
कुठे त्याचा दाबला जातो!
जिथे परस्परांना मोजले जाते
तोच संसार निभला जातो !!

-सूर्यकांत डोळसे,पाटोदा (बीड)

वडीलोपार्जित धंदा

इथुन-तिथुन सारेच
पोरासोरांसाठी अंध होत आहेत.
घराणेशाहीविरूद्ध बोलणारे
आवाज बंद होत आहेत.

कालपर्यंत जो बोलत होता
तोच आज मिंधा झाला आहे !
राजकारण म्हणजे
वडीलोपार्जित धंदा झाला आहे !!

-सूर्यकांत डोळसे,पाटोदा (बीड)

झेंडा मार्च

झेंडा मार्चच्या अगोदरच
नको ते झेंडे लावले गेले.
कुणी चतुर(वेदी)पणा केला तरी
विरोधकांचे आयते फावले गेले.

लाईनवर येता येता
’नियती’वर अडले आहे !
कितीही ’माणिक’ झाकले तरी
सगळेच उघडॆ पडले आहे !!

-सूर्यकांत डोळसे,पाटोदा (बीड)

गॉडफादरचा शोध

मातोश्रीला सोडून दिले
आता गॉडफादर शोधीत आहेत.
मुख्यमंत्रीपदाच्या इच्छेने
ते चांगलेच बाधीत आहेत.

सोलापूरपासून लातूरपर्यंत
गॉडफादरचा शोध जारी आहे !
स्वाभिमानाचे दर्शन घडवित
अधूनमधून दिल्लीचीही वारी आहे !!


-सूर्यकांत डोळसे,पाटोदा (बीड)

लेडीज फर्स्ट

तेंडूलकरची ’सचिन’ता

सचिन सचिन आहे
हे सचिन सिद्ध करतो आहे.
स्वत: तरूण होताना
टिकाकारांना वृद्ध करतो आहे.

काही पावलांवर तर
शतकांचे शतक आहे !
जुन्या दारूची नशा काही औरच
सचिन त्याचेच द्योतक आहे !!

-सूर्यकांत डोळसे,पाटोदा (बीड)

अर्जुन पॅटर्न

तिकडे सचिन शतक ठोकतोय
इकडे शाब्दिक हल्ले होवू लागले.
शेंबडी शेंबडी पोरंसुद्धा
आपल्या बापाला सल्ले देवू लागले.

यशस्वी’अर्जुन पॅटर्न’ची अशी
सर्वत्र सही सही नक्कल आहे !
मातोश्रींचा जुनाच सूर असतो
त्यांना कुठे अक्कल आहे ?

-सूर्यकांत डोळसे,पाटोदा (बीड) .

कर्नाटकीय तमाशा

राजकीय नाट्याचा
बघता बघता तमाशा झाला.
एक अभूतपूर्व अनुभव
बघता बघता देशा आला.

जिथे वाकयुद्ध रंगावे
तिथे खरोखर युद्ध झाले !
बहुमताबरोबरच
आणखी बरेच काही सिद्ध झाले !!

-सूर्यकांत डोळसे,पाटोदा (बीड)

रास-गरबा

गरबात आणि गर्भात
उगीचच साम्य नाही.
दांडीयाची ’रास’लीला
निसर्गाला क्षम्य नाही.

मना-मनाबरोबर
तना-तनातही गरबा रंगला जातो !
आपला ढोल वाजू नये म्हणून
पालकांचा जीव टांगला जातो !!

-सूर्यकांत डोळसे,पाटोदा (बीड)

स्त्रीशक्ती

युवा सेना

घराणेशाहीच्या परंपरा
सर्व पक्षात जपल्या जातात.
पोरा-सोरांच्या सोयीसाठी
पक्षीय संघटना स्थापल्या जातात.

राजकीय वारसदारीचाच
सर्वपक्षीय हेतू असतो !
आजोबा आणि मुलानंतर
नेता म्हणून नातू असतो !!

-सूर्यकांत डोळसे,पाटोदा (बीड)

राहूलचे मिसटायमिंग

सिमी आणि संघात
धार्मिकता हे ’मूलतत्त्व’ आहे.
राहूलच्या बोलण्यातले
हेच खरे सत्त्व आहे.

दहशतवादाची तुलना मात्र
खरोखरच चुकली आहे !
बोलायाला हरकत नव्हती
पण वेळ मात्र हूकली आहे !!

-सूर्यकांत डोळसे,पाटोदा (बीड)

’नंबरी’पणा

आपल्या नेत्यावरच्या निष्ठेचे
प्रदर्शन अगदी थेट असते.
दुचाकी असो वा चारचाकी,
त्यावर नेत्याची नंबर प्लेट असते.

हा साधासुधा नाही
तर दस ’नंबरी’पणा आहे !
कायदा तिथे पळवाटा काढण्याचा
हा शुद्ध डांबरीपणा आहे !!


-सूर्यकांत डोळसे,पाटोदा (बीड)

काय राव तुम्ही?

नावात काय आहे?
असा शेक्सपियरचा शंख आहे.
मात्र नामांतर नाट्याचा
महाराष्ट्रात नवा अंक आहे.

नाव बदला,भविष्य बदला,
हा काही बडेजाव नाही !
विचारू नका आमच्या नावापुढे
अजून कसे ’राव’ नाही ?


-सूर्यकांत डोळसे,पाटोदा (बीड)

पितृपक्षाची दूसरी बाजू

जिवंतपणी ज्यांच्या खाण्या-पिण्याची
टंगळ-मंगळ होत असते.
पितृपक्षात त्याच ’बाप’माणसांची
अगदी चंगळ होत असते.

वरच्यांना खाली जेवू घालतात
आम्हांला म्हणती बावळे आहेत !
या उलट्या न्यायाचे
खरे साक्षीदार कावळे आहेत !!


-सूर्यकांत डोळसे,पाटोदा (बीड)

कॉमन वेल्थचा संदेश

जरी मावळत्याकडे कानाडोळा
उगवत्याला सलाम होतात.
तरी राष्ट्र्कुल स्पर्धा सांगते,
तुम्ही कधीकाळी गुलाम होतात.

खिलाडूपणा दाखविला तरी
हा गुलामीचाच आरसा आहे !
गोर्‍यांऐवजी काळ्यांच्या हाती
आज इंग्रजांचा वारसा आहे !!


-सूर्यकांत डोळसे,पाटोदा (बीड)

बोनस

रामनामाचा जप करीत
विरोधकांनी घाम पुसला.
भाजपाला आपल्या मुद्द्यात
पुन्हा नव्याने ’राम’ दिसला.

अयोध्येच्या निकालानंतर
हेच रामचरित-मानस आहे !
भाजपाच्या पदरात तर
आयताच बोनस आहे !!


-सूर्यकांत डोळसे,पाटोदा (बीड)