Friday, July 31, 2009

राजकीय अतिक्रमण

***** आजची वात्रटिका *****
**********************

राजकीय अतिक्रमण

गुंडा-पुंडांच्या झुंडीने
लोकशाही व्यापली आहे.
मतदानापुरतीच वाटते
लोकशाही आपली आहे.

गुंडा-पुंडांची झुंडशाही
चिंता करायला लावते आहे !
मोकळे रान दिसले की,
गुंडा-पुंडांच्या झुंडींचे फावते आहे !!

-सूर्यकांत डोळसे,पाटोदा (बीड)

ताकापुरते रामायण

***** आजची वात्रटिका *****
**********************

ताकापुरते रामायण

आपल्याच हातांनी
आपलीच आरती असते.
निवडणूकांच्या तोंडावर
आंदोलनांना भरती असते.

सत्ताधारी अणि विरोधक
सारख्याला वारखे असतात !
लोक पुन्हा पाच वर्षॆ
लोकशाहीला पारखे असतात !!

-सूर्यकांत डोळसे,पाटोदा (बीड)

Thursday, July 30, 2009

दास रामाचा वाट पाहे सदना...

***** आजची वात्रटिका *****
**********************

दास रामाचा वाट पाहे सदना...

लोकसभा गेली,राज्यसभा गेली
व्हायची ती नाचक्की झाली.
बांधा,वापरा,हस्तांतरीत करा
ही पॉलिसी तर पक्की झाली.

कुणी कुणाला नकार दिला ?
हे काही उलगडणारे कोडे नाही !
यामुळे दलित ऎक्य आठवले,
हे सुद्धा काही थोडे नाही !!

-सूर्यकांत डोळसे,पाटोदा (बीड)

वाईटातुन चांगले

***** आजची वात्रटिका *****
*********************

वाईटातुन चांगले

लोकसभेचे शल्य
राज्यसभेत टोचले गेले.
उमेदवारीचे खरे सत्य
लोकांपर्यंत पोचले गेले.

दंवडीच्या पहिलवानालाही
फुटाणे आणि रेवड्या आहेत.
नाकारले की ठोकरले ?
वावड्यावर वावड्या आहेत.

दोन्ही घरच्या पाहूण्याचे
शेवटी मुठीमध्ये नाक आहे !
डोक्यावरून पाणी गेल्यावर
दलित ऎक्याची हाक आहे !!

-सूर्यकांत डोळसे,पाटोदा (बीड)

Wednesday, July 29, 2009

’राज’कीय व्याख्या

***** आजची वात्रटिका *****
**********************

’राज’कीय व्याख्या

उठ्सुठ पक्ष बदलणारे
त्यांच्या मते फेरीवाले आहेत.
या राजकीय व्याख्येमुळे
त्यांचेच वांधे झाले आहेत.

दुसर्‍याचे कुसळ दिसते,
आपल्या मुसळाकडे कुठे लक्ष आहे?
अगदी मनापासून सांगतो,
त्यांचाही फेरीवाल्यांचाच पक्ष आहे !

-सूर्यकांत डॊळसे,पाटोदा (बीड)

चालुपणा

***** आजची वात्रटिका *****
**********************
चालुपणा

पक्षातल्या कार्यकत्यांना
बरोबर खडे चारले जातात.
मतदारांच्या माथीही
आपलेच वारस मारले जातात.

लोकशाहीचे लेबल लावले की,
घराणेशाहीही आवडली जाते !
निवडून निवडून काय तर
दगडातुन वीटच निवडली जाते !!

-सूर्यकांत डोळसे,पाटोदा (बीड)

Tuesday, July 28, 2009

पक्षांनो कार्यकर्ते सांभाळा...

***** आजची वात्रटिका *****
**********************

पक्षांनो कार्यकर्ते सांभाळा...

कार्यकर्ते किती ’हाडाचे’ आहेत
ते धाब्या-धाब्याला विचारा.
ते कुणाला मिसकॉल मारतात ?
ते गल्लोगल्लीच्या बाब्याला विचारा.

कार्यकर्ता जगायचा असेल तर
त्याने खाल्ले-पिल्ले पाहिजे !
धाबे दणाणले तरी कळत नाही
आम्हीच काय बोलले पाहिजे ?

-सूर्यकांत डोळसे,पाटोद(बीड)

निळाईचे वर्तमान

***** आजची वात्रटिका *****
**********************

निळाईचे वर्तमान

दलित ऎक्याची वाट
केली बिकट बिकट
दिसामाशी निळाई
होई फिकट फिकट.

वेगळीच परडी,
वेगळाच जोगवा.
फिकट निळाईला
कधी खुणवी भगवा.

आयत्या शिकारीभोवती
गिधाडांचा गराडा गराडा !
भिमाईच्या स्वप्नांचा
रोज चुराडा चुराडा !!

-सूर्यकांत डॊळसे,पाटोदा (बीड)

सच का सामना

***** आजची वात्रटिका *****
**********************

सच का सामना

लोकांच्या खाजगी जीवनात
नको तेवढे डोकू लागले.
रिऍलिटी शो च्या नावाखाली
नको नको ते विकू लागले.

एखादा क्षणिक विचार
कायमचे सत्य असू शकत नाही !
टि.आर.पी. सारखा प्रेक्षक मात्र
या ’माया’जालात फसू शकत नाही !!

-सूर्यकांत डोळसे,पाटोदा (बीड)

Monday, July 27, 2009

पक्षीय स्वच्छता अभियान

***** आजची वात्रटिका *****
**********************

पक्षीय स्वच्छता अभियान

एका राजकीय पक्षाने
पक्ष स्वच्छ करायचे ठरविले
पक्षीय स्वच्छता अभियान
मोठ्या थाटामाटात मिरविले.

कोण मोठा ? कोण छोटा ?
असे काही काही पाहिले नव्हते !
पक्ष स्वच्छ झाला तेंव्हा
पक्षात कुणीच राहिले नव्हते !!

-सूर्यकांत डोळसे,पाटोदा (बीड)

Sunday, July 26, 2009

पांढरे साप

नागपंचमीच्या हार्दिक शुभेच्छा !
कारगिल ’विजय दिना’ निमित्त शहिदांना सलाम !!

***** आजची वात्रटिका *****
**********************

पांढरे साप

किती दिवस करणार
पुन्हा पुन्हा पाप हे ?
दुध पाजून पोसणार
विषारी पांढरे साप हे ?

काल वेगळे,आज वेगळे
पांढर्‍या सापांचे बिळ आहे !
किती पंचम्या आल्या गेल्या?
चालूच त्यांची गिळागिळ आहे !!

-सूर्यकांत डोळसे,पाटोदा (बीड)

Saturday, July 25, 2009

सर्वपक्षसमभाव

***** आजची वात्रटिका *****
**********************

सर्वपक्षसमभाव

कधी इकडे,कधी तिकडे
तिकीटासाठी गोंडा घोळला जातो.
सर्वपक्षसमभाव असा,
राजकारण्यांकडून पाळला जातो.

पक्ष,धोरण,निष्टा,त्याग
हे तर केवळ आव असतात !
तिकीटवाटपात मात्र
सर्वपक्षात सम ’भाव’ असतात !!

-सूर्यकांत डोळसे,पाटोदा (बीड)

Friday, July 24, 2009

राजकीय चॉईस

***** आजची वात्रटिका *****
**********************

राजकीय चॉईस

दोन कॉंग्रेस,दोन सेना
कार्यकर्त्यांना चॉईस घेता येतो.
पाहिजे तेंव्हा,पाहिजे त्याला
धुसफुसत निरोप देता येतो.

दोन्हीकडच्या कार्यकर्त्यांचे
धोरण असे इक्वल आहे !
तुम्हीच ओळखा पाहू,
कोण कुणाचा सिक्वल आहे ?

-सूर्यकांत डॊळसे,पाटोदा(बीड)

Thursday, July 23, 2009

अरे कसाबा.....

***** आजची वात्रटिका *****
**********************

अरे कसाबा.....

कबुलीजबाब दिलास तरी
तुझा गुन्हा माफ होणार नाही.
तुला शिक्षा दिल्याने काही
कुणाचा जीव परत येणार नाही.

तरीही नराधमा,
तुला फाशीच देणे भाग आहे.
तुझ्याएवढाच तुझ्या पोशिंद्यावर
आमच्या सर्वांवा राग आहे.

भित्र्या,एकदा दिलास तर
कबुलीजबाब पलटु नकोस !
सापाची औलाद असलास तरी
खाल्ल्या मिठावर उलटु नकोस !!

-सूर्यकांत डोळसे,पाटोदा (बीड)

देशग्रहण






































देशग्रहण

खग्रास ग्रहण लागावे
अशीच देशाची रया आहे.
पांढर्‍या खादीचीच
देशावरती छाया आहे.

गिळागिळी म्हणजे ग्रहण नाही
ग्रहणाच अर्थ कळतो आहे.
दररोज नवा राहू-केतु
जमेल तेवढे गिळतो आहे.

उघड्या डोळयांनी सारे,
हे ग्रहण बघतो आहोत !
त्यांना नवेनवे वेध लागतात
आपण कुठे जागतो आहोत ?

-सूर्यकांत डोळसे,पाटोदा (बीड)

Wednesday, July 22, 2009

वाढदिवसांची वाढ

***** आजची वात्रटिका *****
**********************

वाढदिवसांची वाढ

वाढदिवस साजरे केल्याशिवाय
जणु नेते, नेते वाटत नाहीत.
बारशापासून शताब्दीपर्यंत
कुठलेच महोत्सव सुटत नाहीत.

नेत्यांच्या वाढदिवसाला
कार्यकर्त्यांचेच थाट असतात.
लेकराबाळांचे नसले तरी
नेत्यांचे वाढदिवस पाठ असतात.

अमके दान, तमके दान,
कार्यक्रमांची दाणादान असते.
पक्षीय मतभेद विसरल्याची
ऍक्टींग पण फार छान असते.

नेत्यांचे वाढदिवस,
नेत्यांना लखलाभ होवोत !
" तुम जिओ हजारों साल "
पण जनतेच्या नशिबी,
सुखाचे चार दिवस येवोत !!

-सूर्यकांत डॊळसे,पाटोदा (बीड)

Tuesday, July 21, 2009

गटार सोहळा

***** आजचीच वात्रटिका *****
***********************

गटार सोहळा

आधिच तर उल्हास,
त्यात घाईला आषाढ मास येतो.
गटारीच्या टोकावरून
येणार्‍या श्रावणाचा वास येतो.

जे बनतात बळीचे बकरे,
त्या चोंबड्यांची पर्वा करू कशाला?
करणारे क्वाक क्वाक करतील
त्या कोंबड्यांची पर्वा करू कशाला ?

ते वाजविती तुणतुणे कितीही
मज वाटते ती गिटार आहे.
हा आषाढ सोहळा पंगतो
साक्षीला तुंबलेली गटार आहे.

थु ss त्या विदेशी पिणारांची
संस्कॄतीशी अशी गट्टी व्हावी
ग्लासास ग्लास भिडवतो कोण?
थेट बाटलीनेच हातभट्टी प्यावी.

श्रावणाच्या भितीपोटीच बघा
ही अमावश्य़ा अशी रंगा येते !
खाऊन,पिऊन पावन झालो
आमच्यासाठी गटारच गंगा होते !!

-सूर्यकांत डोळसे,पाटोदा (बीड)

फुटाफुटी ते कुटाकुटी

***** आजची वात्रटिका *****
**********************

फुटाफुटी ते कुटाकुटी

पक्षा-पक्षातल्या सुभेदारांना
जास्तच पंख फुटू लागले.
गटा-तटाच्या वादावरून
परस्परांनाच कुटू लागले.

जिंदाबाद-मुर्दाबादसोबत
हाणामारीची भाषा ऒठी आहे !
फुटा-फुटी तर जुनीच होती,
आता नव्याने ही कुटाकुटी आहे !!

-सूर्यकांत डोळसे,पाटोदा, (बीड)

Monday, July 20, 2009

संसाराचा खेळ

***** आजची वात्रटिका *****
**********************

संसाराचा खेळ

त्याला आवडायचा फुटबॉल,
तीला आवडायचा क्रिकेट.
कधी व्हायचा गोल तर,
कधी पडायची विकेट.

मग त्यांच्या लक्षात आले,
संसार म्हणजे खेळ नसतो !
आवडी-निवडी वेगळ्या तरी,
तो दोन जीवांचा मेळ असतो !!

-सूर्यकांत डोळसे,पाटोदा,(बीड)

Sunday, July 19, 2009

महागाईचा ’तुर’ टपणा

***** आजची वात्रटिका *****
**********************

महागाईचा ’तुर’ टपणा

सर्वसामान्यांच्या हातांवर
वाढत्या महागाईची तुरी आहे.
घट करती का पातळ करती?
हा संवाद तर घरोघरी आहे.

डाळीने ठरविलेले दिसतेय
ताकास तुर लागु द्यायची नाही !
सेंच्युरी मारल्याशिवाय काही
आता मुळीच माघार घ्यायची नाही!!

-सूर्यकांत डॊळसे,पाटोदा (बीड)

नवनिर्माणाचा राडा

***** आजची वात्रटिका *****
**********************

नवनिर्माणाचा राडा

रस्त्यांवरील राड्याचे लोण
पक्षामध्ये पसरले गेले.
नवनिर्माणाचा संकल्पही
त्याच राड्यात विसरले गेले.

जे आशा लावून बसले आहेत
त्यांचाही भ्रमनिरास होईल !
कुणाच्या ध्यानी-मनीही नव्हते
नवनिर्माणाची अशी हरास होईल !!

(शब्दार्थ:-हरास=जाहिर लिलाव)

-सूर्यकांत डॊळसे,पाटोदा (बीड)

Thursday, July 16, 2009

ऑर्कु्टचे वास्तव

***** आजची वात्रटिका *****
**********************

ऑर्कु्टचे वास्तव

चेहर्‍यावर अनेक चेहरे
लावतात लोक येथे.
गर्ल्स फ्रेण्ड्च्याच मागे
धावतात लोक येथे.

कॉपी-पेस्ट्चाच मंत्र
इथे जपवला जातो.
कुठे न खपलेला माल
इथे खपवला जातो.

मैत्रीची नातीही इथे
तकलादू-बेगडी असतात.
आपल्या घराचे दरवाजे
कुठे सर्वांसाठी उघडी असतात ?

एका वर्षात अनेक वॆळा
इथे वाढदिवस साजरे होतात.
शुभेच्छा लाटणारांच्यासमोर
इथे शुभेच्छुकच लाजरे होतात.

नकली नावे,नकली चेहरे
जो तो इथे मिरवतो आहे !
वास्तवाच्या आभासामध्ये
खरा चेहराही हरवतो आहे !!

-सूर्यकांत डोळसे,पाटोदा (बीड)

पक्ष गेला खड्‍ड्यात

***** आजची वात्रटिका *****
**********************

पक्ष गेला खड्‍ड्यात !!

सत्तेची मस्ती नको,
सत्तेचा माज नको
शिवरायांचा वारसा सांगणार्‍यांना
थोडी तरी लाज नको ?

पक्ष गेला खड्ड्यात
तो खरोखरच जाऊ द्या !
देश आणि जनतेविषयी
आदराचे बोल येऊ द्या !!

-सूर्यकांत डोळसे,पाटोदा (बीड)

सच का सामना

***** आजची वात्रटिका *****
**********************

सच का सामना

६५ व्या कलेची जादू
तशी नेहमीच भावली आहे.
सचिन-कांबळीची दोस्तीही
तिने पणाला लावली आहे.

या सत्याचा सामना करा
हा पब्लिसिटी स्टंट आहे !
कुणी कितीही शहाणे असू द्या
तो बघा,
त्यांच्या खाली उंट आहे !!

-सूर्यकांत डोळसे,पाटोदा (बीड)

Wednesday, July 15, 2009

ऑर्डर..ऑर्डर

***** आजची वात्रटिका *****
**********************

ऑर्डर..ऑर्डर

समलैंगिक संबंधांच्या मान्यतेला
वेगळेच फाटे फुटायला लागले.
दोन मित्र एकांतात दिसले की,
आता शंकास्पद वाटायला लागले.

सातच्या आत घरात,
मुलांनाही आता ऑर्डर आहे !
मुलगा असो वा मुलगी?
निसर्गाची आपली एक बॉर्डर आहे !!

-सूर्यकांत डोळसे,पाटोदा (बीड)

समलैंगितेची मान्यता.

***** आजची वात्रटिका *****
**********************
समलैंगितेची मान्यता

प्रगतीचे लक्षण म्हणून
नको नको ते स्विकारायला लागलो.
व्यक्ती स्वातंत्र्याच्या नावाखाली
निसर्गालाही नाकारायला लागलो.

अनैसर्गिक मार्ग शोधले की,
संकटाला समजून घ्यावे लागेल.
नवसमाजालाही शेवटी
नैसर्गिक मार्गानेच जावे लागेल.

निसर्गाचा अन्याय तर
आम्हांलाही मान्य आहे !
त्याचा विजयोत्सव बरा नाही
जे दु:ख व्यक्तिजन्य आहे !!

-सूर्यकांत डोळसे,पाटोदा (बीड)

हासेगावचा रडकेपणा:भाग २

***** आजची वात्रटिका *****
**********************

हासेगावचा रडकेपणा:भाग २

गाव करील ते
राव करू शकत नाही.
पण सरकार तर करू शकते.
मतदान घेऊन प्रश्न सोडविणे
एड्सपेक्षाही घातक ठरू शकते.

उद्या गावागावातही
असाच बहिष्कार टाकला जाईल !
म्हातारी तर मरेलच
पण काळही सोकला जाईल !!

-सूर्यकांत डोळसे,पाटोदा (बीड)

Monday, July 13, 2009

हरी विठ्ठल.....

***** आजची वात्रटिका *****
**********************

हरी विठ्ठल.....

थोरल्या विठोबाप्रमाणे बडवे
धाकट्या विठोबास घेरू लागले.
नवनिर्माणाला लागलेले सैनिक
पुन्हा माघारी फिरू लागले.

विठू त्यांचा लेकुरवाळा,
पुन्हा बडव्यांवरच राग आहे !
थोरल्या पंढरीची सय होता
धाकट्या पंढरीचा त्याग आहे !!

-सूर्यकांत डोळसे,पाटोदा (बीड)

निळू फुले:एक श्रद्धांजली

निळू फुले:एक श्रद्धांजली

निळूभाऊ,
तुम्ही नायक असूनही
खलनायकाचाच.....
अभिनय करीत राहिलात...
तोही एवढा जिवंत की,
गावाकड्च्या आया-बाया ..तुमच्या नावनं बोटं मोडायच्या...
सैतान..राकीस म्हणायच्या तुम्हाला !
निंळूभाऊ एवढा रांगडा आणि अस्स्ल सलाम
कुणालाच घेता आला नाही..घेताही येणार नाही!
तुम्ही खलनायकांवर प्रेम करायला शिकविलेत..
नाही प्रेम करायला भाग पाडलेत !!
”मास्तर..वाड्यावर या..."
"गं...sssssssssssssss साजणी......"
असे सूर भिनलेत रोमारोमांत !
तुमचा कुणाशी सामना नव्हता...
कसल्या पिंजर्‍यात अडकला नाहीत....
तुम्ही रसिकांच्या सिंहासनावर म्हणूच..चिरतंन स्वार आहात...स्वार रहाल..अगदी चिरंतन !!

-सूर्यकांत डोळसे,पाटोदा (बीड)

Sunday, July 12, 2009

हासेगावचा रडकेपणा

***** आजची वात्रटिका *****
**********************

हासेगावचा रडकेपणा

हा मानवतेचा नाही,
अमानवतेचा अविष्कार आहे.
एड्स बाधित विद्यार्थ्यांवर
सार्‍या गावचा बहिष्कार आहे.

एड्सचा बागुलबुवा होतोय
हे कुणासाठीच ठीक नाही !
जे भोगतात हे दु:ख सारे
त्यांची त्यात काहीच चूक नाही !!

-सूर्यकांत डोळसे,पाटोदा (बीड)

Saturday, July 11, 2009

लोकसंख्या नियंत्रणाचे उपाय

***** आजची वात्रटिका *****
**********************

लोकसंख्या नियंत्रणाचे उपाय

काम चालु,रस्ता बंद
हे जेंव्हा घोषवाक्य होईल.
लोकसंख्या नियंत्रणात आणणे
तेंव्हाच कुठे शक्य होईल.

समलैंगिकतेच्या मान्यतेमुळेही
एक गोष्ट नक्की घडणार नाही !
लोकसंख्येची मुळीच चिंता नको
ती तर मुळीच वाढणार नाही !!

-सूर्यकांत डोळसे,पाटोदा (बीड)

एटी-केटी

***** आजची वात्रटिका *****
**********************


एटी-केटी

दहावी-बारावीच्या मुलांच्या कपाळी
आता नापासाचा शिक्का बसणार नाही.
आषाढीबरोबर कार्तिकीच्या
वारीचाही कपाळी बुक्का बसणार नाही.

मुलांची वर्षॆ वाया जाऊ नयेत
म्हणून ही कल्पना तर भारी आहे !
नाहीतरी पहिली ते दहावीला
सध्याही 'एटी-केटी' च तर जारी आहे !!

-सूर्यकांत डोळसे,पाटोदा (बीड)

Friday, July 10, 2009

काव्यात्मक न्याय

***** आजची वात्रटिका *****
**********************

काव्यात्मक न्याय

समलैंगिक संबंधांच्या मान्यतेने
आता वेगळेच व्हायला लागले.
समलिंगी प्रणयाच्या कविताही
कवी नव्याने लिहायला लागले.

त्या कविता कशा असतील?
मनातल्या मनात वाचू शकता !
तेच काय़ ? तुम्हीसुद्धा,
मनातल्या मनात रचू शकता !!

-सूर्यकांत डोळसे,पाटोदा (बीड)

Wednesday, July 8, 2009

घरगुती बजेट

***** आजची वात्रटिका *****
**********************

घरगुती बजेट

म्हणायला द्वितंत्री कारभार,
तसा तो एकतंत्री असतो.
घरोघरी गृहमंत्री हाच
पदसिद्ध अर्थमंत्री असतो.

गृहमंत्र्याच्या हातातच
अर्थमंत्र्याच्या नाड्या असतात.
ज्यांना हे जमत नाही
त्या बिचार्‍या वेड्या असतात.

घरगुती बजेटचा अंदाज तरी
सांगा कुठे रास्त असतो ?
आपत्कालीन खर्चच
बजेटपेक्षा जास्त असतो !!

-सूर्यकांत डोळसे,पाटोदा (बीड)

Tuesday, July 7, 2009

गुरू-दक्षिणा

** गुरूपौर्णिमेच्या निमित्ताने सर्व गुरुतुल्यांना विनम्र वंदन आणि आपणा सर्वांना हार्दिक शुभेच्छा **



***** आजची वात्रटिका *****
**********************


गुरू-दक्षिणा

जिकडे तिकडे अध्यात्मिक गुरूंचे
पेवच्या पेव फुटलेले आहे.
शिष्य़ांनाही कळत नाही
आपले काय काय लुटलेले आहे?

तन-मन-धन
लुटायचे काहीच सोडीत नाहीत !
आसपासच पुरावे आहेत
आम्ही काही बाता झॊडीत नाहीत !!

-सूर्यकांत डोळसे,पाटोदा (बीड)

Monday, July 6, 2009

सारेच धक्कादायक

***** आजची वात्रटिका *****
**********************

सारेच धक्कादायक !

माहिती आणि तंत्रज्ञानाचा
जरी जगभर डंका आहे.
तरी मतदान यंत्रांच्या
विश्वासार्हतेवर शंका आहे.

त्यांचा दोष नाही
शेवटी यंत्र ती यंत्र आहेत !
पराभवाच्या समर्थनाची
ही धक्कादायक तंत्र आहेत !!

-सूर्यकांत डोळसे,पाटोदा (बीड)

++++++++++++++++++++++++++++++
प्रिय,
सप्रेम नमस्कार...... चला..... ’मनमोकळं’ व्हा... एक नवे व्यास-पीठ ....एक नवा विचारमंच..आपली वाट बघत आहे..चला सामिल व्हा आपल्या एका नव्या प्रवासाला..आपण समृद्ध होवु......इतरांनाही समृद्ध करूया...आधिक माहितीसाठी माझ्या प्रोफाईलला भेट द्या !! http://www.orkut.co.in/Main#Community.aspx?rl=cpn&cmm=91738275

Sunday, July 5, 2009

दळभद्री विचार

***** आजची वात्रटिका *****
**********************

दळभद्री विचार

मुंबईतला सागरी पूल तर
दोन्ही कॉंग्रेसला जोडू लागला.
रस्त्यावरच्या भिकार्‍यांना मात्र
नवाच प्रश्न पडू लागला.

नामकरणाच्या राजकारणाशिवाय
राजकारण्यांना जगता येणार नाही !
भिकार्‍यांचे दु:ख हे की,
त्या पुलाखाली बसून
भिक मागता येणार नाही !!

-सूर्यकांत डोळसे,पाटोदा (बीड)

Saturday, July 4, 2009

ममताशून्य रेल्वे अर्थसंकल्प

***** आजची वात्रटिका *****
**********************

ममताशून्य रेल्वे अर्थसंकल्प

लालू तर चालूच होता
बॅनर्जींनाही ममता नाही.
जरा रेल्वे अर्थसंकल्प बघा
तुम्हांलाही दिसेल समता नाही.

आपलाच दाम खोटा,
म्हणूनच असे फसवित आहेत !
मुंबईत परप्रांतीयांचे लोंढे
डब्या-डब्याने घुसवित आहेत !!

-सूर्यकांत डोळसे,पाटोदा (बीड)

Friday, July 3, 2009

दर्शनाचा (दुजा) भाव

***आषाढी एकादशीच्या हार्दीक शुभेच्छा***
*****************************

***** आजची वात्रटिका *****
**********************

दर्शनाचा (दुजा) भाव

पंढरीच्या वारकर्‍यांना
काय दर्शनाची आस नाही?
व्ही.आय.पी.पासेसचे धोरण
म्हणूनच तर पास नाही.

भक्तांच्या भक्तीमध्ये
असा दुजाभाव आहे !
भेदाभेद अमंगळ
हा तर केवळ आव आहे !!

-सूर्यकांत डोळसे,पाटोदा (बीड)

उपास-तपास

***** आजची वात्रटिका *****
**********************

उपास-तपास

उपवासाच्या दिवशीच
नवनवे मेनू स्फूरू लागतात.
साबुदाण्याने उसळी मारताच
बिच्चारे चिप्स कुरकुरू लागतात.

वड्याचे तेल असे
वांग्यावरती काढले जाते !
नायलॉनच्या जाळीने
पुण्य पदरी पाडले जाते !!

-सूर्यकांत डोळसे,पाटोदा (बीड)

समलैंगिकतेची मान्यता

***** आजची वात्रटिका *****
**********************

समलैंगिकतेची मान्यता

आपण पुढा्रलेलो आहोत
याची प्रचिती यायला लागली.
पोटाच्या प्रश्ना ऎवजी
चोटाची चर्चा व्हायला लागली.

आता लैंगिकच नाही तर
समलैंगिक शिक्षण द्यावे लागेल ?
कितीही हादरलो,भेदरलो तरी
हे नव्याने समजून घ्यावे लागेल !

-सूर्यकांत डोळसे,पाटोदा (बीड)

Thursday, July 2, 2009

सेतुनामा

***** आजची वात्रटिका *****
**********************

सेतुनामा

पुलाचे ठेवा,मुलाचे ठेवा
वाटलेच तर बापाचे ठेवा.
निष्टा दर्शविण्यासाठी
नावचं गांधीछापाचे ठेवा.

आम्हांला’गांधी’ची ऍलर्जी नाही
ती तुमच्या लाळघोटेपणाची आहे !
तुम्हीच खोटेपणा करता;
चर्चा मात्र,आमच्याच
वैचारिक छोटेपणाची आहे !!

-सूर्यकांत डोळसे,पाटोदा (बीड)

Wednesday, July 1, 2009

एका वारकर्‍याची विनंती

***** आजची वात्रटिका *****
**********************

एका वारकर्‍याची विनंती

भावभक्तीच्या दुधात
उगीच मिठाचा खडा नको.
वारकर्‍यांच्या ताकदीवर
अप्रस्तुत लढा नको.

भावना भडकविणे
हा साधासुधा खेळ नाही.
वादासाठी वाद घाला
पण ही वादाची वेळ नाही.

संत-सज्जनांनो, तुमचे वाद
तुमच्यापाशी राहू द्या हो !
आम्हां विठूमाऊलीचे दर्शन
डोळा भरून घेऊ द्या हो !!

-सूर्यकांत डोळसे,पाटोदा (बीड)

जीवन गौरव

***** आजची वात्रटिका *****
**********************

जीवन गौरव

अर्धे तुला,अर्धे मला
असे पुरस्कार लाटले गेले.
तरूण तुर्कांना देखील
जीवन गौरव वाटले गेले.

असा आमचा नाही तर
टाळलेल्यांचा दावा आहे !
हा गणिमी नाही तर
मित्रांचाच कावा आहे !!

-सूर्यकांत डोळसे,पाटोदा (बीड)

daily vatratika...19march2024