लोकपाल भूमिका

कुणाला हवे, कुणाला नको,
कुणाचा तोंडावरती हात आहे.
दुरून मज्जा बघणारांमुळेच
घोडे पेंड खात आहे.

कोणती तरी भूमिका घ्या
भूमिकेला कुठे मना आहे?
ज्याला तटस्थपणा समजता
तो तर भित्रेपणा आहे!

- सूर्यकांत डोळसे, पाटोदा (बीड)

भ्रमनिरास

हे म्हणतात, त्यांनी येऊ दिले नाही
ते म्हणतात, यांनी येऊ दिले नाही.
येणार येणार म्हणता म्हणता
लोकपाल काही आले नाही.

आमच्या भाबडय़ा आशेचा
राज्यसभेत चक्काचूर झाला !
हे बुद्धिवंतांचे सभागृह आहे
आमचा ग्रह दूर झाला !!

- सूर्यकांत डोळसे, पाटोदा (बीड)

रास्त अपेक्षा

कुणाला सशक्त वाटले,
कुणाला अशक्त वाटले.
लोकपाल पाहिजे म्हणता म्हणता
अण्णांचे रक्त आटले.

लोकशाहीचे पाविर्त्य जपा
अजून कुणाचे रक्त आटवू नका!
संविधानाची शपथ आहे
संसदेला पुन्हा बाटवू नका!!

- सूर्यकांत डोळसे, पाटोदा (बीड)

पुतण्यांचे बंड

काका कोणताही असो
त्याच्यावर प्रसंगच बाका आहे.
काकाला पुतण्यापासून
अगदी हमखास धोका आहे.

हातच्या काकणाला
आरसा कशाला पाहिजे?
पुतणे विचारू लागले,
मुलगा आणि मुलगीकडेच
वारसा कशाला पाहिजे?

- सूर्यकांत डोळसे, पाटोदा(बीड)

वरळी ते परळी

तिकडे काका आडवे होते,
इकडेही काका आडवे आहेत.
तिकडेही भोवती बडवे होते
इकडेही भोवती बडवे आहेत.

तिकडे बडव्यांविरुद्ध बंड होते,
इकडेही बडव्यांविरुद्ध बंड आहे!
परळी काय? वरळी काय?
एकच राजकीय पिंड आहे!!

- सूर्यकांत डोळसे, पाटोदा (बीड)

तिची ओळख

अमक्याची पत्नी, तमक्याची आई,
एवढीच तिची ओळख आहे.
महिला आरक्षणाच्या नावाने
अजून तरी काळोख आहे.

आरक्षणाच्या खेळामध्ये
तिला प्यादी म्हणून खेळवले जाते!
पुरुषी वर्चस्वाचे समाधान
लोकशाही मार्गानेही मिळवले जाते!!

- सूर्यकांत डोळसे, पाटोदा (बीड)

राजकीय उदारीकरण

चांगली ऑफर असेल तर
मुळीच टाळली जात नाही.
पक्षीय स्पृश्य-अस्पृश्यता
मुळीच पाळली जात नाही.

नव्या पिढीचे, नव्या घडीचे
हेच तर धोरण आहे!
नव्या राजकीय परिभाषेनुसार
हे राजकीय उदारीकरण आहे!!

- सूर्यकांत डोळसे, पाटोदा (बीड)

लोकपालची चाहूल

लोकशाहीचे मारेकरी
थरथर कापायला लागले.
लोकपालाच्या चाहुलीनेच
लोकशाही जपायला लागले

लोकपाल विधेयकापासून
भ्रष्टाचार्‍यांचा पळ आहे!
हा लोकशाहीचा कळवळा नाही,
केलेल्या पापाचे फळ आहे!!-

- सूर्यकांत डोळसे, पाटोदा (बीड)

भारतरत्नाची दक्षता

भारत रत्नाच्या नियमावलीत
काहीही घुसवणे बरे नाही.
कुणाच्याही रांगेत
कुणालाही बसवणे बरे नाही.

भारतरत्नाची खिरापत
जर कुणालाही वाटली जाईल!
तर पूर्वीच्या भारतरत्नाची
किंमत नक्की घटली जाईल!!

- सूर्यकांत डोळसे, पाटोदा (बीड)

आशावाद

कुणी झाले शरमिंदे,
कुणी रागाने लाल झाले.
हो...नाही...म्हणता म्हणता
अखेर लोकपाल आले.

कुठे माशी घोटाळेल,
कुठे माशी शिंकली जाईल !
रस्त्यावरची लढाई मात्र
संसदेतच जिंकली जाईल !!

- सूर्यकांत डोळसे, पाटोदा (बीड)

आधुनिक महाभारत

गोंधळून जायचा प्रसंग
गोपीनाथांवर बेतला आहे.
धनंजयाने तर म्हणे
झोपेत दगड घातला आहे.

कौटुंबिक महाभारत
रंगता रंगता रंगले आहे!
कुणी कुणाला गीता सांगायची?!!
न सांगितलेलेच चांगले आहे!!

- सूर्यकांत डोळसे, पाटोदा (बीड)

'राज'कीय भूमिका

सीमावासीय राहिले बाजूला
मनसेच स्टार झाली.
'आहे तिथेच सुखाने राहा'
याचीच चर्चा फार झाली.

उपहास की उपरोध?
की हे शाब्दिक व्यंग आहे?
हीच राजकीय भूमिका असेल तर
हा अस्मितेचा मान भंग आहे!!

- सूर्यकांत डोळसे, पाटोदा (बीड)

संमेलनाध्यक्ष निवड

कुणाला वाटले तर वाटू द्या
आमचे नेहमीच वाकडय़ात आहे
पण बारा कोटीच्या मराठीची
मतदार संख्या शेकडय़ात आहे

शेकडय़ांनी निवडलेला
कोटीवरती लादला जातो
घाणेरडे राजकारण करून
डाव बरोबर साधला जातो

प्रक्रिया सुधारली पाहीजे
निवडणूकीनंतरच बोलले जाते!
अध्यक्षपद पटकावले की,
तोंड बरोबर खोलले जाते!!

- सूर्यकांत डोळसे, पाटोदा (बीड)

घोडे आणि बाजार

कुणी करतो जुळवाजळव,
कुणी नोटा मोजित असतो
सत्तास्थापनेच्या मुहूर्ताला
घोडेबाजार तेजीत असतो

घोडे जेवढे उधळतील
तेवढा माल द्यावा लागतो!
राजकीय रस्सीखेच अशी की,
नालीसाठीही घोडा घ्यावा लागतो!!-

- सूर्यकांत डोळसे, पाटोदा (बीड)

खड्डय़ांची 'डाग'डुजी

डांबरटपणा करून
रस्त्यांना सजवू लागले.
विचारल्यानंतर कळाले,
खड्डय़ांना बुजवू लागले.

खड्डे बुजले नाहीत
खड्डे केवळ झाकले आहेत!
आधीच बरबटलेले हात
पुन्हा नव्याने माखले आहेत!!

- सूर्यकांत डोळसे, पाटोदा (बीड)

बंडखोरीचा अर्थ

आपल्या आणि परक्या बंडखोरांना
वेगवेगळा न्याय असतो.
पक्षीय बंडखोरीचा अर्थ
वेगवेगळा नाहीतर काय असतो?

दुसर्‍यासाठी पायघडय़ा घालतात,
आपल्यावरती शिस्तभंग असतो!
पक्षीय बंडखोरीला,
असा आवडीचा रंग असतो!!

- सूर्यकांत डोळसे, पाटोदा (बीड)

गांधीवादाची नवी व्याख्या

गांधीवादाची नवी व्याख्या

बारामतीला लागली थप्पड
दिल्लीत तिचा आवाज आला.
उथळ प्रतिक्रिया देत सुटणे
हा राळेगणचा रिवाज झाला.

अण्णांची उपहासात्मक प्रतिक्रिया
सारवासारवीनंतरही दुष्ट झाली!
गांधीवादाची नवी व्याख्या
संदर्भासहित स्पष्ट झाली!!

- सूर्यकांत डोळसे, पाटोदा (बीड)

भांडवली धोरण

भांडवली धोरण

भांडवलासाठी मुद्दा पाहिजे
शेतकर्‍यांचे कुणाला पडले आहे?
शेतकर्‍यांसाठी लढावे म्हणून
कुठे कुणाचे घोडे अडले आहे?

ते स्वत:साठी लढत आहेत,
शेतकर्‍यांसाठी लढत नाहीत!
सत्तेवर कुणीही असोत
शेतकर्‍यांना पिळायचे सोडत नाहीत!!

- सूर्यकांत डोळसे, पाटोदा (बीड)

दीपोत्सवाची अपेक्षा

दिवा दिपून ठेवावा
दिवा जपून ठेवावा.
दिव्या-दिव्याच्या तेजाने
दिवा आतला तेवावा.

तेवत्या दिव्यांनी
मग तेवते व्हावे.
अंधाराच्या दिशेने
त्यांनी धावते व्हावे.

जेव्हा उजळेल आकाश
उजळता प्रकाश दिसावा!
उजळत्या दीपोत्सवात
आपलाही दिवा असावा!!

- सूर्यकांत डोळसे, पाटोदा (बीड)

मौनाची भाषा

जे बोलून साधता येत नाही
ते मौनाने साधता येते.
मौनाची बाधाच अशी की
न बोलताही बाधता येते.

कुणी केले बंद कान
तेही उघडण्याची आशा असते
बहिर्‍यासही ऐकू येते
अशी मौनाची भाषा असते!!

- सूर्यकांत डोळसे, पाटोदा (बीड)

यादी भावी पंतप्रधानांची

कुणी वादी आहे,
कुणी प्रतिवादी आहे.
भावी पंतप्रधानांची
आपल्याकडे यादीच यादी आहे.

एकाने नाव जाहीर केले की,
दुसर्‍याच्या काळजात घर पडते आहे!
त्यामुळे भावी पंतप्रधानांच्या यादीत
रोज नव्याने भर पडते आहे!!

- सूर्यकांत डोळसे, पाटोदा (बीड)

आरक्षणाचा ड्रॉ

ऐका हो ss ऐका ss
आरक्षणाची गंमत ऐका.
जिथे नवरोबा उत्सुक
तिथे उभ्या राहणार बायका.

पदराआडचे राजकारण खेळून
नथीतून तीर मारावे लागतील!
गुडघ्याचे बाशिंग बायकोला बांधून
बुजगावणे उभे करावे लागतील!!

- सूर्यकांत डोळसे, पाटोदा (बीड)

भाऊराव ते खाऊराव

आजची वात्रटिका

_------------

भाऊराव ते खाऊराव

भाऊरावांचा महाराष्ट्र
खाऊरावांचा झाला आहे.
याचाच तर पडताळा
पटपडताळणीत आला आहे.

आम्हाला काय कुणाची भीती?
शिक्षणसम्राटांचा तोरा आहे!
शिकवा आणि कमवा
संस्थाचालकांचा नारा आहे!!

- सूर्यकांत डोळसे, पाटोदा (बीड)

पक्षदर्शन

कितीही राग आला तरी
राग गिळावा वाटतो.
प्रत्येक राजकीय पक्ष म्हणजे
सर्वपक्षीय मेळावा वाटतो.

काल वेगळय़ा, परवा वेगळय़ा,
आज वेगळय़ा पक्षात आहेत!
सर्वपक्षीय भ्रमण करून आलेले
आज निष्ठावंतांच्या कक्षात आहेत!!

- सूर्यकांत डोळसे, पाटोदा (बीड)

अशीही खपवा'खप'वी

ज्याच्या समोर बॉलिंग करताना
शेन वॉर्नही गडबडला.
तो मला घाबरत होता
शोएब अख्तर बडबडला.

सचिन म्हणजे सचिन,
सचिन म्हणजे फौलाद आहे!
चेंडू कुडतरल्याची कबुली देणारा
शोएब उंदराची औलाद आहे!!

- सूर्यकांत डोळसे, पाटोदा (बीड)

आमचे शपथपत्र

त्यांनी रोजच्या जगण्याचे नियोजन
26 रुपयांत करून दाखवावे.
जगणेच काय पण,
32 रुपयांत मरून दाखवावे.

त्यांनाही श्रीमंत म्हणू लागले
ज्यांचे दारिद्रय़ाशी सख्य आहे!
जेवढय़ात मरणे शक्य नाही
तेवढय़ात जगणे कसे शक्य आहे?

- सूर्यकांत डोळसे, पाटोदा (बीड)

भाद्रपद दर्शन

भाद्रपद दर्शन

चित्रपट आणि टीव्ही
म्हणे समाजाचा ऐना असतो.
म्हणून बाराही महिने पडद्यावर
भाद्रपदाचाच महिना असतो.

कुत्र्यासारखे त्यांचे शेपूट
वाकडे ते वाकडे असते
रस्त्यावरचे 'भाद्रपद दर्शन'सुद्ध
त्याच्यापेक्षाही तोकडे असते!!

- सूर्यकांत डोळसे, पाटोदा (बीड)

प्रेमाला उपमा आहे

कालचे ठाकरी बंधुप्रेम
आज खड्डय़ात घातले आहे.
आपल्या भाऊबंदकीमध्ये
त्यांनी जनावरांनाही घेतले आहे.

तेच सांगायला लागले
कोण पाळीव? कोण जंगली आहे?
एवढय़ा मोठय़ा घराण्याची इज्जत
मुंबईच्या वेशीवर टांगली आहे!

- सूर्यकांत डोळसे, पाटोदा (बीड)

उपोषण लाईव्ह

'सर्वात आधी, सर्वात प्रथम'
आपले ध्येय टिकवले गेले.
जेवढे अण्णांचे दाखवले,
तेवढेच मोदींचे दाखवले गेले.

उपोषण कुणाचेही असो,
त्याच्याशी काही देणेघेणे नाही
टीआरपीच्या 24 ताशी जगात
एवढेही लक्षात येणे नाही!!

- सूर्यकांत डोळसे, पाटोदा (बीड)

उपोषण युद्ध

विकासाच्या गप्पा मारल्या की वाटते
तो तर फुगीर दवणा आहे.
उपोषणाने कलंक धुतला जाईल
अशी त्यांची सदभावना आहे.

उपोषणाने चित्त शुद्ध होते
हे सत्य तर प्रयोगसिद्ध आहे!
आजकाल मात्र सगळीकडे
उपोषणाचे जाहीर युद्ध आहे!!

- सूर्यकांत डोळसे, पाटोदा (बीड)

सगळेच बोगस!

बोगस पटसंख्येचा मुद्दा
ज्याच्या त्याच्या ओठावर आहे.
एकच विद्यार्थी
अनेक शाळांच्या पटावर आहे.

हे कुणालाच माहीत नाही
हेच मुळी आम्हाला पटत नाही!
म्हणूनच 'नांदेड पॅटर्न'चे
आम्हाला आश्चर्य वाटत नाही!!

- सूर्यकांत डोळसे, पाटोदा (बीड)

पेट्रोल दरवाढ

वाढत्या महागाईची
पंपा-पंपावर पावती आहे.
पेट्रोलची दरवाढ
सहा महिन्यात चौथी आहे

सरकारी नियंत्रण नसल्यामुळेच
पेट्रोल मोकाट सुटलेले आहे!
रुपयाला डॉलरने
जगजाहीर लुटलेले आहे!!

- सूर्यकांत डोळसे, पाटोदा (बीड)

आणखी एक रथयात्रा

ज्याची भीती वाटत होती
त्याचाच आता खतरा आहे.
अण्णा हजारेंच्या मार्गावरून
अडवाणींची रथयात्रा आहे.

लालकृष्णांची रोखठोक घोषणा
कसलीही आड वाणी नाही!
संधीचा फायदा न उठवणारा
राजकारणात तरी कोणी नाही!!

- सूर्यकांत डोळसे, पाटोदा (बीड)

लोकपालचा पोरखेळ

मुले लहान असली तरी
त्यांना सर्व गोष्टी कळत असतात.
'लोकपालs लोकपालs'चा खेळ
आजकाल मुले खेळत असतात.

एकाच्या तोंडावर चिकटपट्टी,
त्याचे हातपायही बांधलेले.
मी विचारले, ही काय धमाल आहे?
मुले एका सुरात उत्तरला,
काका, हा सरकारी लोकपाल आहे!!

- सूर्यकांत डोळसे, पाटोदा (बीड)

हाय अ‍ॅलर्ट

हाय अ‍ॅलर्ट

एकाही बॉम्बस्फोटाचा
नीट शोध लागत नाही.
'हाय अ‍ॅलर्ट' म्हणजे काय?
याचाही बोध लागत नाही.

भोगायचा तो वनवास
जनतेने भोगलेला असतो!
सुटकेचा नि:श्वास टाकेपर्यंत
पुन्हा 'हाय अ‍ॅलर्ट' लागलेला असतो!!

- सूर्यकांत डोळसे, पाटोदा (बीड)

नोट फॉर वोट

मत गल्लीत विकले जाते,
मत दिल्लीत विकले जाते.
गल्लीत शेकडय़ावर तर
दिल्लीत कोटीवर टाकले जाते.

गल्लीतले विक्रेते किरकोळ,
दिल्लीतील विक्रेते घाऊक आहेत!
मताला दान म्हणणारे
व्यवहारी नाहीत, भावूक आहेत!!

- सूर्यकांत डोळसे, पाटोदा (बीड)

मतलबी गुरूत्व

हा विद्यार्थी माझा आहे,
तो विद्यार्थी माझा आहे.
शिक्षकांच्या गप्पा ऐकण्यात
खरोखरच मजा आहे.

यशस्वी विद्यार्थी त्यांचे,
मग अयशस्वी कुणाचे असतात?
सोयीचे गुरूत्व दाखविणारे
विचार मतलबीपणाचे असतात !

- सूर्यकांत डोळसे, पाटोदा (बीड)

'झेड' झिडकारू नका !

अण्णा दुसरे 'गांधी' आहेत तर,
इथे दुसरा नथुरामही असू शकतो.
याच्यावर तरी सर्वाचा विश्वास
अगदी ठामपणे बसू शकतो.

आपण 'राष्ट्रीय' झाल्याची गोष्ट
अण्णांच्या लक्षात यायला हवी!
स्वत:साठी नाही, राष्ट्रासाठी तरी
अण्णांनी झेड सुरक्षा घ्यायला हवी!!

- सूर्यकांत डोळसे, पाटोदा (बीड)

आदर्श पुरस्कार मिळवलेल्या शिक्षकाचे मनोगत

पुरस्कार बोध

आदर्शाची निवड अशी की,
पुरस्कार मागायला लावतात.
कितीही नि:संशय झाले तरी
संशयाने बघायला लावतात.

आदर्श शिक्षक पुरस्कारांचा
वरचेवर विनोद होतो आहे!
खर्‍या आदर्शाचे हे काम नाही
दुर्दैवाने हाच बोध होतो आहे!!

- सूर्यकांत डोळसे, पाटोदा (बीड)

आदर्शाची आडवाट

नाकर्त्याला पुरस्कार,
कर्त्याला वनवास भोगावा लागतो.
आदर्श शिक्षक पुरस्कार
अक्षरश: मागावा लागतो.

आदर्श असून चालत नाही,
प्रामाणिकपणाही नडला जातो!
डाव-प्रतिडाव टाकले तरच
पुरस्कार पदरी पडला जातो!!

- सूर्यकांत डोळसे, पाटोदा (बीड)

शौचालय सक्ती

जे घरी बसत नव्हते
त्यांना घरी बसावे लागले.
ग्रामपंचायत सदस्यांना
नियमाचे फटके सोसावे लागले.

कळत असूनही वळत नाही
ही सामाजिक उणीव आहे!
ग्रा.पं. सदस्यत्व रद्द होणे
ही जबाबदारीची जाणीव आहे!!

- सूर्यकांत डोळसे, पाटोदा (बीड)

पक्षांतर आणि पेपरांतर

पत्रकारांनी पेपर बदलणे,
नेत्यांनी पक्ष बदलणे,
दोन्हीही गोष्टी सारख्या असतात.
फक्त पक्षांतरित नेत्यांच्याच
फिरक्यावर फिरक्या असतात.

प्रश्न निष्ठेचा नाही,
प्रश्न तर पापी पोटांचा आहे!
विचार-बिचार मानतो कोण?
सगळा मामला नोटांचा आहे!!

- सूर्यकांत डोळसे, पाटोदा (बीड)

टोपीवर टोपी

तुही अण्णा मीही अण्णा
गणपती म्हणाला उंदराला.
गणपतीच्या पोटाकडे पाहून
पुन्हा हसू आले चंद्राला

आज प्रत्येकाच्याच डोक्यावर
'मी अण्णा हजारे' अशी टोपी आहे!
कृती अवघड असली तरी
करायला सोपी आहे!!

- सूर्यकांत डोळसे, पाटोदा (बीड)

हक्कभंगाची गंमत

कुणी खरे बोलले की,
त्याला वाचाळता म्हणू नये.
नैसर्गिक वास्तवतेला
कधी गचाळता म्हणू नये.

त्यांना बोलले की हक्कभंग
जनसामान्यांना किंमत नाही!
आपल्या लोकशाहीमध्ये
हक्कभंगासारखी गंमत नाही!!

- सूर्यकांत डोळसे, पाटोदा (बीड)

लालू उवाच

भ्रष्टाचारावर बोलण्याचा
लालूस अधिकार कुठला होता?
लोकसभेत एव्हढा बरळला की,
जसा चारा खाऊन उठला होता.

अण्णा जिंकले,देश जिंकला
ज्याच्या त्याच्या तोंडी साखर आहे !
लोकपाल चर्चेतून सिद्ध झाले
लालू पक्का जोकर आहे !!

- सूर्यकांत डोळसे, पाटोदा (बीड)

'वर' कमाई

भ्रष्टाचाराविरुद्ध बोलताना
नैतिकता कुठे आचरली जाते?
जिथे मुलगी देतानाही
वरकमाई विचारली जाते.

भ्रष्टाचाराची तिरडी
तेव्हाच खरी उठली जाईल!
जेव्हा वर कमाईची
सर्वाना लाज वाटली जाईल!!

- सूर्यकांत डोळसे, पाटोदा (बीड)

उपोषणाचा मार्ग

अण्णांच्या आंदोलनाच्या
प्रतिक्रिया दिसायला लागल्या.
माहेरी जाईन म्हणणार्‍या
उपोषणाला बसायला लागल्या.

कितीही नमते घेतले तरी
त्यांचा माहेरचाच ठेका आहे!
लोकशाहीवादी नवरे म्हणतात
हा नवरेशाहीला धोका आहे!!

- सूर्यकांत डोळसे, पाटोदा (बीड)

वैचारिक रंगबाजी

आंदोलन यशस्वी करण्याचा
जसा अण्णांचा चंग आहे.
तसा कुणाकडून जातीय तर,
कुणाकडून धार्मिक रंग आहे.

त्यांना तसेच दिसणार
जसे डोळ्यावर गॉगल आहेत!
त्यांच्या बुद्धीची कीव येते
कसे म्हणावे ते पागल आहेत!!

- सूर्यकांत डोळसे, पाटोदा (बीड)

विरोधाभास

अण्णांच्या आंदोलनात बहकून जावे
एवढे कुणीच भावूक नाही.
असे कितीतरी जण आहेत
त्यांना 'लोकपाल' ठाऊक नाही.

नसेना का नसले तर
कुणीतरी त्यांच्यासाठी लढतो आहे!
भुंकणारे भुंकले तरी
लढय़ाचा पाठिंबा रोज वाढतो आहे!!

- सूर्यकांत डोळसे, पाटोदा (बीड)

लक्षवेध ते बुद्धिभेद

अण्णांचा लोकपाल लढा
जेवढा लक्षवेधक आहे.
बुद्धिवंताचाही अपप्रचारही
तेवढाच बुद्धिभेदक आहे.

लोक जागृत झाले नसते तर
इंग्रज कधीच पळाले नसते!
आजचे बुद्धिवंत तेव्हा असते तर
स्वातंत्र्य कधीच मिळाले नसते!!

- सूर्यकांत डोळसे, पाटोदा (बीड)

लढय़ा मागचे हात

दोस्त हो सावध रहा
ही वैर्‍याची रात आहे.
शोधा मागे शोध सुरू झाले
आंदोलनामागे कुणाचा हात आहे?

शोधायची गरज नाही
आंदोलनांची कारणं सर्वज्ञात आहेत !
अण्णांच्या लढय़ाचे कारणच
बरबटलेले हात आहेत!!

- सूर्यकांत डोळसे, पाटोदा (बीड)

कलमाडी बोले राजाला

पूर्वीच लोकपाल आले असते तर
किती बरे झाले असते.
तुमच्या-माझ्या नशिबात
हे दिवस कशाला आले असते?

ना होता माझा खेळखंडोबा,
ना तुमचा बॅण्ड वाजला असता!
लोकपालाचा वचक असता तर
भ्रष्टाचार कशाला माजला असता!!

- सूर्यकांत डोळसे, पाटोदा (बीड)

बुद्धिवंतांची टवाळखोरी

टेबला-टेबलावरती
टपलेला बोका आहे.
लोकपालासाठीचे आंदोलन
म्हणे लोकशाहीला धोका आहे.

ज्याला जशी ओकायची
तशी गरळ ओकू लागले.
वातानुकूलित बुद्धिवंत
आंदोलनाला ठोकू लागले.

त्यांना जसे लढता येईल
तसे बुद्धिवंतांनी लढून दाखवावे !
निदान रेशनकार्ड तरी
लाचखोरीशिवाय काढून दाखवावे !!

- सूर्यकांत डोळसे, पाटोदा (बीड)

खर्‍याचे नशीब

हल्ली खोटय़ाच्या नाही तर
खर्‍याच्या पदरी गोटा आहे.
खर्‍यापेक्षा खोटय़ाचाच
हल्ली नको तेवढा रेटा आहे.

खोटय़ाचा जरी फुसका बार,
खर्‍याच्या अंगी सुरुंग आहे!
खोटे मोकाट सुटलेले,
खर्‍याच्या नशिबी तुरुंग आहे!!

- सूर्यकांत डोळसे, पाटोदा (बीड)

लढाईचे सूत्र

भ्रष्टाचारविरोधी लढय़ात
वैयक्तिक सत्याग्रही व्हावे लागेल.
देणार नाही, घेणार नाही
एवढे निग्रही व्हावे लागेल.

चारणे थांबविल्याशिवाय
खाणेही थांबणार नाही!
मग लढय़ाची यशस्विता
फार काळ लांबणार नाही!!

- सूर्यकांत डोळसे, पाटोदा (बीड)

श्रद्धाळूंसाठी...

श्रद्धा आणि अंधश्रद्धेत
आंधळेपणाचा फरक आहे.
बिनधास्त ठोकून देतात
वर स्वर्ग खाली नरक आहे.

श्रद्धेची अंधश्रद्धा होऊ नये
यासाठी श्रद्धा तपासली पाहिजे!
उघडय़ा डोळय़ांनी, जागत्या बुद्धीने
आपली श्रद्धा जोपासली पाहिजे!!

- सूर्यकांत डोळसे, पाटोदा (बीड)

प्रति सेन्सॉरशिप

सेन्सॉरची सेन्सॉरशिप
बोर्डावर यायला लागली.
जिकडे तिकडे प्रति सेन्सॉरशिप
निर्माण व्हायला लागली.

प्रति सेन्सॉरशिप तर
कलेसाठी धोक्याची तर!
तथाकथित सेन्सॉरवाल्यांना
प्रतिक्षा फक्त मोक्याची आहे!!

- सूर्यकांत डोळसे, पाटोदा (बीड)

स्वच्छता प्रमाणपत्र

जयंत्या, पुण्यतिथ्याच काय?
वाढ-दिवसही घातले जातात.
भाडोत्री विचारवंतांकडून
स्वच्छता प्रमाणपत्र घेतले जातात.

आजकाल स्वच्छता प्रमाणपत्र
चोर-लुटारूंच्याही हातात आहेत!
भाडोत्री विचारवंतांचे धंदे
हाऊसफुल्लच्या बेतात आहेत!!

- सूर्यकांत डोळसे, पाटोदा (बीड)

नेतृत्वाची ऐशी-तैशी

सुरवंटाचे फुलपाखरू व्हावे
तसा नेता घडावा लागतो.
तळमळीच्या कार्यकर्त्यातुनच
नेता बाहेर पडावा लागतो.

हा राजकीय आदर्शवाद तर
केवळ बोलण्यासाठी उरला आहे !
कसले सुरवंट? कसले फुलपाखरू?
बापाने पोरगा माथी मारला आहे!!

- सूर्यकांत डोळसे, पाटोदा (बीड)

भ्रमाचा भोपळा

सुशिक्षितांच्या घरामध्ये
जरी भोपळा हजर आहे.
तरीही त्यांना दृष्ट लागेल
अशी आमची नजर आहे.

घरातला भोपळाच
सगळे धाब्याला टांगतो आहे!
ज्याच्या त्याच्या अकलेचे मोजमाप
भोपळा बरोबर सांगतो आहे!!

- सूर्यकांत डोळसे, पाटोदा (बीड)

संमेलनाचे कवित्व

संमेलनाच्या नंतर असते,
संमेलनाच्या आधी असते.
साहित्य संमेलन म्हटले की,
त्यात वादावादी असते.

साहित्यापेक्षा संमेलन
वादावादीमुळे लक्षणीय ठरते!
साहित्यिक कमी, घुसखोर जास्त
संमेलनही प्रेक्षणीय ठरते!!

- सूर्यकांत डोळसे, पाटोदा (बीड)

मैत्री रे मैत्री

राजकीय मैत्रीसारखी
आपली मैत्री असू नये.
ऊठसूट आपल्या मैत्रीवर
अविश्वास दाखवीत बसू नये.

मैत्रीला बहुमत नाही,
एकमताचा पाया असावा!
मैत्री अशी असावी
मैत्रीच कस्तुरीचा फाया असावा!!

- सूर्यकांत डोळसे, पाटोदा (बीड)

पक्षांतराचा अर्थ

हकालपट्टी आणि पक्षत्यागात
अंतर फार थोडे असते.
नेमके काय खरे मानावे?
हे राजकीय कोडे असते.

हकालपट्टीपेक्षा पक्षत्याग
पवित्र असल्यासारखे वाटते!
हकालपट्टी म्हटले की,
बुडावर लाथ बसल्यासारखे वाटते!!

- सूर्यकांत डोळसे, पाटोदा (बीड)

बेशर्मी मोर्चा

अंगावरचे कपडे काढून
लोकांचे लक्ष वेधले गेले.
त्यांचे त्यांनाच ठाऊक
नेमके काय साधले गेले?

जरी बेशर्मी मोर्चामुळे
सामाजिक बेशर्मी नगडी आहे !
महिलांचे प्रश्न मांडंण्याचा
हा मार्ग मात्र बेगडी आहे !!


- सूर्यकांत डोळसे, पाटोदा (बीड)

ग्लोबल महागाई

दररोजचा दिवस ढकलताना
सामान्य माणूस अगतिक आहे.
त्यालाच सांगणे बरे नाही
महागाईची समस्या जागतिक आहे.

समस्या जागतिक असो,
वा स्थानिक असो
ज्याची त्याला झळ आहे !
लागल्याशिवाय कळत नाही
महागाईची केवढी कळ आहे !!

- सूर्यकांत डोळसे, पाटोदा (बीड)

खड्डय़ांची आवश्यकता

रस्त्यावरचे खड्डे
जनतेकडून सोसले जातात.
रस्ते आणि खड्डय़ावरच
कार्यकर्ते पोसले जातात.

आंदोलनाशिवाय लोक
दुसरे काय करू शकतात?
दरवर्षी खड्डे पडले नाहीतर
कार्यकर्ते उपाशी मरू शकतात!

- सूर्यकांत डोळसे, पाटोदा (बीड)

सापांचे मनोगत

आमचे रक्षण जरूर करा,
मात्र आम्हाला पुजू नका
आम्ही दूधखुळे नाहीत
आम्हाला दूध पाजू नका

आम्ही काही माणसांप्रमाणे
मनामध्ये डुख धरीत नाहीत!
उत्साही सर्पमित्रांएवढे
आमचे हाल कुणीच करीत नाहीत!!

- सूर्यकांत डोळसे, पाटोदा (बीड)

सारेच चमत्कारीक !

इथे चमत्कारांना कमी नाही
मोठा चमत्कारीक देश आहे.
नव नव्या चमत्कारांचा नमुना
न चुकता पेश आहे.

ना चौकशी,ना चिकित्सा,
लोकच दूधखुळे आहेत !
लोक अज्ञानाच्या जिवावरच
चमत्कारीक चाळे आहेत !!

- सूर्यकांत डोळसे, पाटोदा (बीड)

लोकशाहीचा पुळका

समाज एकवटू नये
एवढेच त्यांच्या डोक्यात आहे.
त्यांनी आरडाओरड सुरू केली,
आपली लोकशाही धोक्यात आहे.

जेव्हा लोक एकवटतात तेव्हा,
चांगल्या चांगल्यांची फाटू लागते!
दुर्लक्षित केलेली लोकशाही
अचानक आपली वाटू लागते!!

- सूर्यकांत डोळसे, पाटोदा (बीड)

खड्डय़ांचा दचका

रस्त्यात खड्डे नाही,
खड्डय़ात रस्ते असतात.
सामान्य माणसांचे जीव
त्यांच्यासाठी सस्ते असतात.

एकदा गाफील राहिले की,
त्याचा पाच वर्षे पचका असतो!
'आता तरी शहाणे व्हा'
जनतेला खड्डय़ांचा दचका असतो!!

- सूर्यकांत डोळसे, पाटोदा (बीड)

'मार्क्‍स'वादी मूल्यमापन

आठवीपर्यंत परीक्षा नाहीत
म्हणजे नक्कीच धोका आहे
श्रेण्या नकोत, मार्क्‍स हवेत
'मार्क्‍स'वाद्यांचा हेका आहे

परीक्षा रद्दच्या अफवेचा
वरून खाली पाझर आहे!
नव्या मूल्यमापन योजनेला
'मार्क्‍स'वाद्यांकडून गाजर आहे!!

- सूर्यकांत डोळसे, पाटोदा (बीड)

संशोधनाचा भाग

पुढून झाले, मागून झाले
दोन्हीकडूनही वार झाले.
बोलता बोलता सगळीकडे
इतिहास संशोधक फार झाले.

उंदरांच्या सुळसुळाटाला
मांजराचीच साक्ष आहे!
बोलघेवडय़ांच्या आगलावेपणात
खरा इतिहास भक्ष्य आहे!!

- सूर्यकांत डोळसे, पाटोदा (बीड)

गटारी : एक निमित्त

खाण्या-पिण्याची आवड तर
अगदी निसर्गदत्त असते
आधीच पेताड,
त्यात गटारीचे निमित्त असते.

जणू श्रावणाच्या स्वागतालाच
काही तास ठेवले जातात!
गटारीचा फायदा घेऊन
आणखी दिवे लावले जातात!!

- सूर्यकांत डोळसे, पाटोदा (बीड)

श्रद्धेचा गर्भपात

लोकश्रद्धेचा बळी

निवडणूक जिंकता आली की,
त्याचा लोकप्रतिनिधी होतो.
जरी लोकशाही मार्गाचा
निवडणुकीत अंत्यविधी होतो.

मग लोकशाहीचे दिवसच काय?
चक्क पाच वर्ष घातले जातात!
लोकश्रद्धेचा बळी घेऊन
लोकांनाच ऊतले जातात!!

- सूर्यकांत डोळसे, पाटोदा (बीड)

प्रगतीचे लक्षण

शिक्षणाची गटारगंगा
धो-धो वाहू लागली
गल्ली-बोळामधून
शाळा-कॉलेजेस् होऊ लागली

ज्ञानदानासाठी नाहीतर
अनुदानासाठी शिक्षण आहे!
गावोगावच्या शिक्षण संस्था म्हणजे
कार्यकर्त्यांच्या प्रगतीचे लक्षण आहे!!

- सूर्यकांत डोळसे, पाटोदा (बीड)

दुबार पेरणी

मातीमध्ये पुरूनसुद्धा
काही शिल्लक उरावे लागते.
आभाळमाया आटली की,
पुन्हा एकदा पेरावे लागते.

कधी अस्मानाची,
कधी सुलतानाची करणी असते.
कधी वांझोटय़ा बियाणांमुळे
दुबाराची पेरणी असते.

दुबार काय, तिबार पेरा
दुर्दैवाचा फास सुटला पाहिजे!
पिकाच्या दाण्यादाण्यातून
आता सुरुंग फुटला पाहिजे!!

- सूर्यकांत डोळसे, पाटोदा (बीड)

भ्रष्टाचाराचा तळतळाट

तोच खरा सुखी माणूस
जो काबाड कष्ट करतो.
हरामाचा पैसा
माणसाची बुद्धी भ्रष्ट करतो.

हे सत्य जेवढे कडू
तेवढेच साधेसुधे आहे!
याचे ढळढळीत उदाहरण
तिहारच्या जेलमध्ये आहे!!

- सूर्यकांत डोळसे, पाटोदा (बीड)

नकारात्मक परंपरा

सत्ताधारी आणि विरोधकांकडून
लोकशाही धोरण पाळले जाते.
चहापानाचे सरकारी आमंत्रण
विरोधकांकडून टाळले जाते.

अधिवेशनाच्या पूर्वसंध्येलाच
नकारघंटा वाजली जाते!
नकाराची घातक परंपरा
अधिवेशनागणिक रूजली जाते!!

- सूर्यकांत डोळसे, पाटोदा (बीड)

मुंबई स्पिरीट

कितीही संकटं येवोत
मुंबई लगेच रुळावर येते.
मुंबईचे हे स्पिरीटच
मुंबईच्या मुळावर येते.

ज्याला आपण स्पिरीट म्हणतो
ती तर मुंबईची मजबुरी आहे!
तिला भिऊन कसे चालेल?
जीच्या गळ्यावर रोजच सुरी आहे!!

- सूर्यकांत डोळसे, पाटोदा (बीड)

देशी-विदेशीचा कैफ

'अर्धे देशी, अर्धे विदेशी
राहुलचे लाईफ आहे.'
कॅटरीनाच्या या विधानाने
विरोधकांना कैफ आहे.

जुन्याच बंदुकीसाठी
आता कॅटरीनाचा खांदा आहे!
या मुद्याला जनता इटली तरी
जुने भांडवल, जुनाच धंदा आहे!!

- सूर्यकांत डोळसे, पाटोदा (बीड)

चुकांचा अतिरेक

अतिरेक्यांच्या हल्ल्यापासून
आम्ही काहीही शिकलो नाहीत.
चुकानंतर घोडचुका
करण्यास मात्र चुकलो नाहीत.

अतिरेक्यांच्या अतिरेकाप्रमाणे
आमचाही हा अतिरेक आहे!
बॉम्बस्फोटांच्या निमित्ताने
एकमेकास जाहीर चेक आहे!!

- सूर्यकांत डोळसे, पाटोदा (बीड)

गृहयुद्ध

बॉम्बस्फोटांचे दु:ख
ज्यांनी भोगायचे ते भोगले आहे.
आबाs बाबाssम्हणावे असे
सरकारी 'गृह'युद्ध लागले आहे.

गृहयुद्धाला चालना देणे
हेही अतिरेक्यांचे एक ध्येय आहे!
पेटलेल्या गृहयुद्धाचे
अतिरेक्यांनाच श्रेय आहे!!

- सूर्यकांत डोळसे, पाटोदा (बीड)

केंद्रीय फेरबदल

हातातले पत्तेच
पुन्हा पुन्हा पिसले गेले.
तेच तेच चेहरे
नव्या जागी दिसले गेले.

मर्यादित पर्यायांमुळे
सगळीच आणीबाणी आहे!
चौकटीतल्या राजावर
हुकूमाची राणी आहे!!

- सूर्यकांत डोळसे, पाटोदा (बीड)

उपवासाची व्याख्या

उपवासाचे पुण्य म्हणे
भरल्यापोटी भेटले जाते
केवळ अन्नातल्या बदलालाच
उपवास म्हटले जाते

ज्यांना पोटभर खायला मिळते
तेच उपवास धरू शकतात!
उपवासाच्या प्रचलित व्याख्येचा
तेच फेरविचार करू शकतात!!

- सूर्यकांत डोळसे, पाटोदा (बीड)

दरोडय़ाचे सत्र

कुणी दिवसा घालतो आहे
कुणी रात्री घालतो आहे
कायद्यासारख्या कायद्यालाही
बिनधास्त कोलतो आहे

आमचे कोण काय करू शकतो?
त्यांचे जहरी फुत्कार आहेत!
अगतिक व्यवस्थेवरती
हे पाशवी बलात्कार आहेत!!

- सूर्यकांत डोळसे, पाटोदा (बीड)

स्वप्नांचा गर्भपात

शेतकर्‍यांची जाहीर फसवणूक
बघता बघवत नाही.
बेणे एवढे कडू की,
पेरलेलेही उगवत नाही.

शेतकर्‍यांच्या डोळय़ामधले
रानच्या रान चिबडले जाते!
मातीमध्ये पेरलेले स्वप्न
मातीमध्येच गाभडले जाते!!

- सूर्यकांत डोळसे, पाटोदा (बीड)

लोकशाहीचा पाचवा स्तंभ

चार-चार स्तंभांनाही
जणू लोकशाही पेलत नाही.
लोकपाल विधेयकाची भाषा
जनता उगीच बोलत नाही.

घटनात्मक चौकटीतच
नक्की वागायला पाहिजे !
लोकशाहीचा पाचवा स्तंभ म्हणून
लोकपालाकडे बघायला पाहिजे !!

-सूर्यकांत डोळसे,पाटोदा (बीड)

देहली बेली

शिवराळ संवाद तर आहेतच,
शिव्यांचीही गाणी झाली आहेत.
सिनेमा पाहून लहान मुलं
भलतीच ज्ञानी झाली आहेत.

त्याला अश्लिल कसे म्हणावे?
जे सेन्सॉर झाले आहेत !
आमिरचा इडीयटपणा बघून
सारे जमींपर आले आहेत !!

-सूर्यकांत डोळसे,पाटोदा (बीड)

भक्तांचा दानधर्म

देव भक्तीचा भुकेला तरी,
भक्तांकडून परीक्षा पाहिली जाते.
कधी उघड,कधी छुपी
देवालाच संपत्ती वाहिली जाते.

देव तर श्रीमंतच,
मग पैसा श्रीमंताला दिला जातो !
त्यालाच दानधर्म म्हणतात
जो पैसा गरजवंताला दिला जातो !!

-सूर्यकांत डोळसे,पाटोदा (बीड)

आर्ट ऑफ लिव्हिंग

नवरा-बायको म्हणजे
संसाराचा मुख्य पार्ट आहे.
जोडीदाराच्या कलाने घेणे
हे सुद्धा एक आर्ट आहे.

जेंव्हा नवरा-बायकोला वाटते
जोडीदार म्हणजे बला आहे !
तेंव्हा कळते संसार म्हणजे
जीवन जगण्याची कला आहे !!

-सूर्यकांत डोळसे,पाटोदा (बीड)

अनुभवाचे बोल

दाबलेला विद्रोही आवाज
कसाबसा उसळला गेला.
नामदेवाचा संयम
अखेर ढासळला गेला.

आपला जो ’गोलपीठा’झाला,
तो रामदासाचा होवू नये.
उष्टावळ न देणारांनी
भरल्या ताटाचे आवतन देऊ नये.

फक्त कवितेपूरते ठीक होते,
या सत्तेत जीव रमत नाही !
अनुभव हाच खरा गुरू
यात कुणाचेच दुमत नाही !!

-सूर्यकांत डोळसे,पाटोदा (बीड)

आधुनिक कॉलीदास

त्याचा तिला,तिला त्याचा
निरोपांचा उत असतो.
कालीदासाचा तो मेघदूत,
यांचा’मोबाईल दूत’ असतो.

आषाढाची वाट कुणाला?
प्रत्येक क्षण प्यारा असतो !
एस.एम.एस.च्या जोडीला
मिसकॉलचा मारा असतो !!

-सूर्यकांत डोळसे,पाटोदा (बीड)

वडे घ्या वडे ss

शिव वड्याच्या स्पर्धेत
आता छत्रपती वडा आहे.
सेनेच्या गाड्याशेजारी
स्वाभिमानचा गाडा आहे.

जाणत्या राजाच्या नावाने
जनताही वडे चापते आहे !
राजकीय वडे तळण्यासाठी
कढईत तेल तापते आहे !!

-सूर्यकांत डोळसे,पाटोदा (बीड)

राजकीय मुत्सद्दीपणा

तो तिच्या प्रेमात पडला,
ती त्याच्या प्रेमात पडली.
दोघांचा पक्ष वेगळा
एवढी गोष्ट मात्र नडली.

त्यांनी प्रेमाचाही प्रश्न मग
अगदी राजकीय पद्धतीने सोडला !
’प्रेम सलामत तो पक्ष पचास’
असे म्हणीत नवा पक्ष काढला !!

-सूर्यकांत डोळसे,पाटोदा (बीड)

फसलेले बंड

एक नेता रूसला
त्याला बंडाचा किडा डसला.
नेहमी युद्धात जिंकणारा
नेमका तहामध्ये फसला.

मागे कुणीच उरले नाही,
त्याची भूमिकाच टोकाची होती !
पूर्वीचेच दिवस बरे होते,
झाकली मूठ सव्वालाखाची होती !!

-सूर्यकांत डोळसे,पाटोदा (बीड)

पक्षाघात ते पक्षांतर

कालचा नाथही
कधी कधी अनाथ असतो.
पक्षांतराच्या मुळाशी
नेहमी पक्षाघात असतो.

जो गडगड करी
तो कधीच पडत नसतो !
पक्ष सोडतो म्हणणारा
कधीच पक्ष सोडत नसतो !!

-सूर्यकांत डोळसे,पाटोदा (बीड)

प्रिय नेत्यांनो.....

तुम्हांला जिकडे जायचे
तिकडे तुम्ही जा हो..
कार्यकर्त्यांची फरफटही
लक्षात तुम्ही घ्या हो...

तुमच्या मागे फरफटत जाणे
याचेच नाव निष्ठा असते !
तुमचे पक्षांतर म्हणजे
कार्यकर्त्यांची चेष्टा असते !!

-सूर्यकांत डोळसे,पाटोदा (बीड)

वजन घटवायचे आहे?

आपले वजन घटवायला
जे उताविळ झाले आहेत.
त्यांना योगासन आणि उपोषण
असे दोन पर्याय खुले आहेत.

मात्र रामदेवबाबांच्या उपोषणामुळे
एक गोष्ट सर्वांना पटू शकते!
योगासनापेक्षा उपोषणानेच
वजन लवकर घटू शकते !!

-सूर्यकांत डोळसे,पाटोदा (बीड)

सुगीचे दिवस

साठेबाजांच्या मढयावर
घालायचे ते घातले जाते.
खताबरोबर बियाणेही
मागच्या दाराने घेतले जाते.

कडू बेण्यांचे नशीबच
साठेबाजीमुळे फळफळले जाते !
सरकारी सौजन्यानेच
काळ्याबाजाराला
खतपाणी मिळले जाते !!

-सूर्यकांत डोळसे,पाटोदा (बीड)

भ्रष्टाचाराची जननी

गरजवंत तो गरजवंत,
अक्कलनाम शून्य असतो.
गाढवांचे पाय धरण्याएवढा
भ्रष्टाचार परिस्थितीजन्य असतो.

आमची ही प्रतिक्रिया
विचारांची आहे,क्रोधाची नाही !
गरज ही भ्रष्टाचाराची जननी आहे,
ती केवळ शोधाची नाही !!

-सूर्यकांत डोळसे,पाटोदा (बीड)

आधुनिक बकासूर

***** आजची वात्रटिका *****
**********************

आधुनिक बकासूर

बातमी कशाचीही होवू शकते,
बातमीला काही लागत नाही.
तरीही न्यूज चॅनलच्या बकासूराची
भूक कशानेच भागत नाही.

भस्म्या नावाचा रोग
या बकासूराची भूक जिवंत करतो !
रिकाम्या वेळी हा बकासूर
नको त्या बातम्यांचा रवंथ करतो !!

-सूर्यकांत डोळसे,पाटोदा (बीड)

बदलते रंग

मतांच्या राजकारणापोटी
सारेच खुळे झाले.
घडयाळाच्या डायलबरोबर
काटेही निळे झाले.

हे धोरणात्मक निर्णय नाहीत,
हे राजकीय सट्टे आहेत !
आजकाल वाघाच्या अंगाबरही
निळे निळे पट्टे आहेत !!

-सूर्यकांत डोळसे,पाटोदा (बीड)

काळे इंग्रज

हे राज्य गोर्‍या इंग्रजांचे नाही,
हे राज्य काळ्या इंग्रजांचे आहे.
हे राज्य आपले वाटत नाही,
हे राज्य त्यांचे आणि त्यांचे आहे.

उपोषण,सत्याग्रह,चळवळ
यांना काळ्या इंग्रजांची भीक नाही !
जाऊन जाऊन जातील कुठे?
त्यांना’चले जाव’ म्हणणेही ठीक नाही !!

-सूर्यकांत डोळसे,पाटोदा (बीड)

सामाजिक गरज

जरी अण्णा भरडला जातो,
एखादा बाबा चिरडला जातो.
जनतेच्या वतीने
कुणीतरी ओरडला जातो.

सारे काही आलबेल असल्याचा
सरकारचा दावा असतो !
त्यामुळेच जनतेला एखादा
अण्णा किंवा बाबा हवा असतो !!

-सूर्यकांत डोळसे,पाटोदा (बीड)

निष्ठेचे पुतळे

एकमेकांच्या इज्जतीचे
जाहीर कोथळे आहेत.
रस्त्या-रस्त्यावर उतरलेले
निष्टेचे पुतळे आहेत.

पुतळ्यांची विटबंणा,
पुतळ्याची जाळा-जाळी आहे !
छुSS म्हटले की भुंकणा‍र्‍या
निष्ठावंतांची जातच खुळी आहे !!

-सूर्यकांत डोळसे,पाटोदा (बीड)

भ्रष्टाचारमुक्तासन

उठसुठ उपोषण करणे
ही लोकशाहीतली फॅशन आहे.
रामदेव बाबांचे मात्र
भ्रष्टाचारमुक्तासन आहे.

पवनमुक्तासन,
भ्रष्टाचारमुक्तासन
यातले साम्य ध्यानात येऊ शकते !
रामदेव बाबांचे उपोषण
योगा-योगाने रेकॉर्ड ब्रेक होवू शकते !!

-सूर्यकांत डोळसे,पाटोदा (बीड)

उपोषण

बायको स्वयंपाक करेना,
रागावणार नाही तो नवरा कसला?
उपोषणाच्या बातम्या ऐकून
नवराही उपोपोषणाला बसला.

तसाही उपवास घडला असता,
असाही उपवास घडला गेला !
उपासमारीचा प्रसंग
उपोषणाच्या नावे पडला गेला !!

-सूर्यकांत डोळसे,पाटोदा (बीड)

प्या आणि पाजा

एकविसला बियर,
पंचविसला दारू.
पेताडांनो पिताना
विचार नका करू.

ही वयाची अट आहे,
हा दारूचा भाव नाही !
सरकारी उदारतेपुढे
दारूबंदीचे नाव नाही !!

-सूर्यकांत डोळसे,पाटोदा (बीड)

नामांतर ते नामविस्तार

पुरूषप्रधान संस्कृतीचे वर्चस्व
अगदी गृहीत धरलेले असते.
लग्नानंतर स्त्रियांचे नामांतर
अगदी पक्के ठरलेले असते.

दोन-दोन आडनावे लावण्याचा
स्वाभिमानी स्त्रियांना मोह असतो !
राजकारणाप्रमाणे संसारातही
नामांतराच्या प्रसंगाला
नामविस्ताराचा शह असतो !!

-सूर्यकांत डोळसे,पाटोदा (बीड)

मोस्ट वॉंटेड

पाकिस्तानचा भारतद्वेष
अगदी गॅरंटेड आहे.
खरे तर अख्खा पाकिस्तानच
मोस्ट वॉंटेड आहे.

त्यामुळेच आपली यादी
नक्क्कीच चुकीची आहे !
पाकिस्तानची भूमिका तर
निव्वळ फेकाफेकीची आहे !!

-सूर्यकांत डोळसे,पाटोदा (बीड)

महायुती

बघाबघी झाली,पसंती झाली,
टिळा-कुंकूच उरले आहे.
छत्तीसचा आकडा असूनही
अखेर एकदाचे ठरले आहे.

वरमाय,बरबाप खुशीत,
सोयर्‍या-धाय‍र्‍यांना चिंता आहे.
भावकीचा विरोध असतानाही
नव्या नात्याचा गुंता आहे.

’पटले तर व्हयं म्हणा’
हीच महायुतीची टीप आहे !
मुहूर्ताचे पुढचे पुढे बघता येईल
सध्या लिव्ह इन रिलेशनशिप आहे !!

-सूर्यकांत डोळसे,पाटोदा (बीड)

चळवळीचे मारेकरी

आपला वैचारिक पाया
दुसर्‍याच्या पायी घातला जातो.
चळवळीचा खरा बळी
अनुयायांकडूनच घेतला जातो.

तात्पुरता फायदा झाला तरी
हा कायमचा घाटा असतो !
चळवळ नेस्तनाबूत करण्यात
अनुयायांचा सिंहाचा वाटा असतो !!

-सूर्यकांत डोळसे,पाटोदा (बीड)

बळीचे बकरे

सगळेच पर्याय संपले की,
स्वार्थी पर्याय सूचला जातो.
नेत्यांची किंमत वाढते
कार्यकर्ता मात्र खचला जातो.

नको तो विचार,नको तो मार्ग,
कार्यकर्त्यांच्या गळी असतो !
नेत्यांच्या पुनर्वसनात
कार्यकर्त्यांचा बळी असतो !!

-सूर्यकांत डोळसे,पाटोदा (बीड)

नाटकी इतिहासकार

काही इकडचे,काही तिकडचे,
ढापणारे पाहिले मी.
जुन्यावर नवे संस्कार करून
छापणारे पाहिले मी.

अशा भाटांचेही
खूप भाट पाहिले मी.
अशा नाटकी इतिहासकारांचे
खूप थाट पाहिले मी.

आपण केले माफ जरी
इतिहास माफ करणार नाही !
काळाची कसोटीच अशी की,
हा नाटकीपणा पुरणार नाही !!

-सूर्यकांत डोळसे,पाटोदा (बीड)

मोबाईल खिसेकापू

आपल्या खात्यावरील पैसे
डोळ्यादेखत ढापले जातात.
मोबाईलद्वारे आपले खिसे
डोळ्यादेखत कापले जातात.

खिसे कापण्याच्या धंद्यात
मोबाईलवाला जुंपलेला असतो !
मोबाईल आणि आपलाही बॅलन्स
लढता लढता संपलेला असतो !!

-सूर्यकांत डोळसे,पाटोदा (बीड)

खासदार निवास

हा साधासुधा नाही,
भलताच कहार आहे.
खासदारांनीच भरलेला
दिल्लीचा तिहार आहे.

तिहारला जेल म्हणताना
आपल्याला काही वाटले पाहिजे !
यापुढे तिहारला जेल न म्हणता
खासदार निवास म्हटले पाहिजे !!

-सूर्यकांत डोळसे,पाटोदा (बीड)

जगबुडी

**** आजची वात्रटिका *****

**********************

जगबुडी

अनेक वेळा भविष्य सांगुनही
अशुभ काही घडले नाही.
एवढ्या अफवा पसरूनही
जग काही बुडले नाही.

निसर्ग दाखवून देतो
माणसाच्या बुद्धीची
कुठपर्यंत उडी असते ?
त्यामुळेच तर चर्चेत
नेहमी जगबुडी असते !

-सूर्यकांत डोळसे,पाटोदा (बीड)

अंगठीछाप

***** आजची वात्रटिका *****

**********************

अंगठीछाप

आपल्या अपयशाचे संबंध
आकाशाशी जोडले जातात.
बिचार्‍या ग्रहांच्या नावाने
उगीच खडे फोडले जातात.

जे जे तोडले जातात,
ते ते अकलेचे तारे आहेत !
अंगठीछाप लोकांपेक्षा
अंगठेछाप तरी बरे आहेत !!

-सूर्यकांत डोळसे,पाटोदा (बीड)

अपशकुनी थोबाडं

ज्यांचे थोबाड बघावे वाटत नाही
अशांचेच थोबाड बघावे लागते.
रस्त्या-रस्त्यावरती एवढे बॅनर की,
खाली बघूनच निघावे लागते.

बघितले नाही तरी
त्यांचा सामना चुकून होतो !
रस्त्यांवरच्या बॅनरमुळेच
आम्हांला अपशकुन होतो !!

-सूर्यकांत डोळसे,पाटोदा (बीड)

जातीय ओळख

पूर्वी पक्ष्यांना जात होती,
आता जाती-जातीचे पक्ष आहेत.
जातीय हितसंबंधांसाठी
अगदी जातीने दक्ष आहेत.

जाती-जातीला वापरून घेणारे
सर्वत्र जातीय दलाल आहेत !
जातीय ओळखीसाठी तर
विविध रंगी गुलाल आहेत !!

-सूर्यकांत डोळसे,पाटोदा (बीड)

’घर-घर’ की कहानी

पैसा झाला मोठा,
माणूस खोटा होतो आहे.
’हम दो हमारे दो’ मुळे
सांस्कृतिक तोटा होतो आहे.

ज्याची त्याची गरज
पैशावरती भागली आहे.
घर नावाच्या संस्कृतीला
घर-घर लागली आहे.

प्रायव्हसी जपतानाच
कौटुंबिक जाणीव ठेवावी लागेल !
नसता घरा-घरावरती
’रेस्ट हाऊस’ची पाटी लावावी लागेल !!

-सूर्यकांत डोळसे,पाटोदा (बीड)

(रि) पब्लिकचा सवाल

शेळी होवून जगण्यापेक्षा
पॅंथर वाघाशी दोस्ती करू लागला.
आपली घटलेली किंमत
आणखीनच सस्ती करू लागला.

कालच्या आणि आजच्या भूमिकेत
खूप टोकाचे अंतर आहे !
पब्लिक विचारू लागली,
हाच का तो पॅंथर आहे ?

-सूर्यकांत डोळसे,पाटोदा (बीड)

मैत्रीनामा

ठाकरे-पवार मैत्रीचा
महाराष्ट्राला आदर आहे.
दोघांच्या मित्रत्त्वाचा सामना
वेळोवेळी सादर आहे.

दिलदार शकुनीमामाला
दिलदार शत्रुचे टोले आहेत.
आपल्या पोराबाळांच्या
वयाचा विसर पडावा,
एव्हढे ते म्हातारे झाले आहेत.

कधी बारामतीचा जादूगार,
कधी मैद्याचे पोते आहे !
तरीही राजकारणाच्या पलीकडॆ
शरदबाबूंशी नाते आहे !!

-सूर्यकांत डोळसे,पाटोदा (बीड)

आक्रीत लोक-रीत

लोकांशी इमानदारीने वागा,
लोक तुम्हांला हसू लागतात.
लोकांशी बेइमानीने वागा,
लोक सहज फसू लागतात.

ना नवल,ना खंत,
सगळेच कसे आक्रीत आहे !
चुकीची असली तरीही
शेवटी हीच लोक-रीत आहे !!

-सूर्यकांत डोळसे,पाटोदा (बीड)

मोहन जोशी (ला)

सतीशने अकलेचे ’तारे’ तोडले,
मोहनही ’जोशी’ला आहे.
मराठी नाटकांचा तमाशाच
आजकाल नशीला आहे.

एकच प्याल्याचा मोह न पड्तो तर
पुढचा तमाशा घडला नसता !
अध्यक्षपदाचा अबलख घोडा
देशोदेशी उडला असता !!

-सूर्यकांत डोळसे,पाटोदा (बीड)

नैतिक हल्ला

सत्य उभे राहिले की,
असत्याचा कल्ला असतो.
सत्य रेटलेच नाही तर
सत्यावर नैतिक हल्ला असतो.

नैतिक हल्ले होवूनही
सत्य चिडत नाही,कुढत नाही !
सत्य बदनाम होते,
पण सत्य सत्यता सोडत नाही !!

-सूर्यकांत डोळसे,पाटोदा (बीड)

मरणोत्तर शंका

अफवा,प्रश्न आणि शंकांना
फा मोठा उत आहे.
ओसामा लादेन मेला तरी
जिवंत त्याचे भूत आहे.

"हा जागतिक शांततेसाठीचा लढा"
जरी ओबामा वदला आहे !
जगाने सुटकेचा नि:श्वास टाकला
तरी हा वैयक्तिक बदला आहे !!

-सूर्यकांत डोळसे,पाटोदा (बीड)

स्व.जगदीश खेबूड्कर

कविता वेगळी,गीत वेगळे,
हे त्यांच्यापुढे भास होते.
लेखणीची हुकूमत अशी की,
त्यांच्यापुढे शब्दही दास होते.

कविता बघा,गीत बघा,
प्रत्येक शब्द गुलाम आहे !
प्रतिभेच्या त्या जगदीशाला
हा अखेरचा सलाम आहे !!

-सूर्यकांत डोळसे,पाटोदा (बीड)

पहावा विठ्ठल

वारकरी साधेभोळे,
बडवे अट्ट्ल.
सेना म्हणाली मनसेला,
पहावा विठ्ठल.

छायाचित्र असो,
वा व्यंगचित्र असो,
विठ्ठलाचीच छाया आहे !
थोरल्या आणि धाकट्या पंढरीत
ज्याचा त्याचा विठुराया आहे !!

-सूर्यकांत डोळसे,पाटोदा (बीड)

एका लादेनचा अंत

लपाछपीच्या खेळात अखेर
लपणाराच हारला गेला.
ओसामा बीन लादेन
पुन्हा एकदा मारला गेला.

लादेनच्या मृत्यूबरोबरच
आणखी एक गोष्ट चांगली आहे !
पाकिस्तानची हरामखोरी
पुन्हा एकदा वेशीवर टांगली आहे !!

-सूर्यकांत डोळसे,पाटोदा (बीड)

शैक्षणिक प्रगतीपुस्तक

ना कुणी पास,ना नापास,
कुणी पहिले ना दुसरे होते.
निकालाच्या दिवशी
पहिल्यांदाच चेहरे हसरे होते.

विद्यार्थ्यांनी आनंद लुटला,
पालकांनी आनंद लुटला नाही.
मार्कांच्या आकड्याशिवाय
निकाल निकाल वाटला नाही.

प्रगतीपुस्तकाचे स्वागत करा,
गुणपत्रकांना फाटा आहे !
विद्यार्थी हा विद्यार्थीच असतो
म्हणू नका,नर्मदेचा गोटा आहे !!

-सूर्यकांत डोळसे,पाटोदा (बीड)

धर्मपरीक्षा

धर्म तपासायला घेतला की,
धर्मरक्षक जागे होतात.
परीक्षेला सामोरे जा म्हणताच,
धर्मरक्षक मागे होतात.

धर्म कोणताही असो
त्याला परीक्षा आवडत नाही !
खरा धर्म तोच
जो परीक्षेची संधी दौडत नाही !!

-सूर्यकांत डोळसे,पाटोदा (बीड)

दैनिक फोडाफोडी

राजकीय पक्ष फोडावा तसा
पेपरवालेही पत्रकार फोडतात.
रस्सीखेच वाढली की,
किंमत देऊन पत्रकार ओढतात.

ओढाओढी आणि फोडाफोडीची
पत्रकारीतेलाही बाधा आहे !
सबसे बडा रूपय्या
व्यवहार एकदम साधा आहे !!

-सूर्यकांत डोळसे,पाटोदा (बीड)

वैचारीक उधारी

वर्गणी रोख,
विचार उधार असतो.
जयंतीच्या मंचाला
राजकीय आधार असतो.

प्रायोजकांची उधारी
वेळच्या वेळी चुकवावी लागते !
अवसान उसने असले की,
मान तर झुकवावी लागते !!

-सूर्यकांत डोळसे,पाटोदा (बीड)

सत्य दर्शन

हा त्याचा भाई आहे,
तो याचा भाई आहे.
प्रत्येक ठिकाणी एक एक
ज्युनियर सत्य साई आहे.

चमत्कार मोठे आहेत,
चमत्कार खोटे आहेत.
पायावर लोटांगण घालणारेच
नर्मदेचे गोटे आहेत.

खोटॆही खरे वाटते
हाच मोठा चमत्कार आहे !
खरे बोलले कुणी तर म्हणती,
हा विषारी फुत्कार आहे !!

-सूर्यकांत डोळसे,पाटोदा (बीड)

लबाडी एके लबाडी

नको त्यांचे,नको तिथे,
थोबाड पाहिले मी.
लबाडाच्या पायी माथा टेकताना
लबाड पाहिले मी.

हे लबाड असे की,
त्यांना लबाडी शोभते आहे !
लबाडाच्या आशिर्वादाने
लबाडी निभते आहे !!

-सूर्यकांत डोळसे,पाटोदा (बीड)

प्रायोजित संशयकल्लोळ

लोकपाल विधेयकाची ताकद
भ्रष्टांच्या लक्षात येवू लागली.
त्यांचा बेतालपणाच सांगतो
पळता भुई थोडी होवू लागली.

म्हणूनच लोकांच्या मनामध्ये
संशयाचे बीज पेरीत आहेत !
लोकपाल मसुदा समितीला
सगळे भ्रष्टाचारी घेरीत आहेत !!

-सूर्यकांत डोळसे,पाटोदा (बीड)

भक्ती संदेश

आपण सचिनभक्त आहोत,
सचिनही कुणाचा तरी भक्त आहे.
त्याने कुणाची भक्ती करावी?
यासाठी त्याचा तो मुक्त आहे.

आपण कोण बोलणार
त्याने कसा आचार करावा?
लोकांपर्यंत संदेश काय जातो?
याचा भावी भारतरत्नाने विचार करावा !

-सूर्यकांत डोळसे,पाटोदा (बीड)

चिरंजीव भव !

एक बाबा गेला की,
दुसरा बाबा उगवला जातो.
अशा भोंदूंकडूनच
भोळा भक्त नागवला जातो.

सारे भोंदूपणापुढे झुकलेले
सत्यापुढे कुणीही शरण नाही!
भक्तांच्या भोळेपणाला
कधीसुद्धा मरण नाही !!

सूर्यकांत डोळसे,पाटोदा (बीड)

प्रथमोपचार

भ्रष्टाचाराविरूद्ध लढायचे असेल तर
लढणार्‍यांनी खाणे सोडले पाहिजे.
स्वत:निर्मळ होवूनच
या भानगडीत पडले पाहिजे.

स्वत:निर्मळ झाल्याशिवाय
हे अवघड काम होणार नाही !
नसता लढ्यातून बाजूला व्हा
लढा तरी बदनाम होणार नाही !!

सूर्यकांत डोळसे,पाटोदा (बीड)

भ्रष्टाचाराचे लॉजिक

कुणालाच वाटत नाही
आपले काही चुकले जाते.
त्यामुळेच जे पाहिजे ते
इथे ब्लॅकने विकले जाते.

दुसरे-तिसरे काही नाही
ही तर ’ब्लॅक-मॅजिक’ आहे !
ब्लॅकच्या देवाण-घेवाणीतच
भ्रष्टाचाराचे लॉजिक आहे !!

सूर्यकांत डोळसे,पाटोदा (बीड)

उत्सवामागचे सत्य

फिरू नयेत एवढे
हे दिवस फिरले आहेत.
सारेच राष्ट्र्पुरूष
केवळ उत्सवांपुरते उरले आहेत.

एकही उत्सव असा नाही
ज्यावर जाती-धर्माची छाप नाही !
सारे एकाच माळेचे मणी
कुणाचीच बोलण्याची टाप नाही !!

सूर्यकांत डोळसे,पाटोदा (बीड)

सच्चाई

कार्यकर्ते कमी अन
नेतेच फार झाले.
भीमा,तुझ्या नावावर
खातेच फार झाले.

वाटणीस बसले ते
वाटला भीम त्यांनी.
सर्वांच्या डोळ्यादेखत
लुटला भीम त्यांनी.

आम्ही कशास सांगू?
कोण लुच्चा आहे?
नेतृत्त्वाचा भरवसा नाही
सामान्य सैनिक सच्चा आहे !

सूर्यकांत डोळसे,पाटोदा (बीड)

नो एन्ट्री

पावित्र्य-अपावित्र्याचा
फक्त बाईकडे ठेका असतो.
बाईच्या बाईपणाला
नेमका हाच धोका असतो.

हरबर्‍याच्या झाडावर चढवून
साधलेली संधी असते !
बाईचे बाईपण नाकारून
पाहिजे तिथे प्रवेश;
पाहिजे तिथे बंदी असते !!

सूर्यकांत डोळसे,पाटोदा (बीड)

राम नाम सत्य है

रामाशिवाय रावण नाही,
रावणाशिवाय राम नाही.
रावणच नसेल तर
रामाला काहीच काम नाही.

जसा चांगल्याएवढाच वाईटाचाही
समाजामध्ये नेहमी खप असतो !
तसा रावणाच्या दहा तोंडामध्येही
शेवटी राम नामाचा जप असतो !!

सूर्यकांत डोळसे,पाटोदा (बीड)

उपोषणाची तर्‍हा

त्याने कितीही विनंती केली तरी
तिचे काही खेटर अडले नाही.
सार्‍या मागण्या मान्य करूनही
तिने आपले उपोषण सोडले नाही.

तिचे काहीच अडत नव्हते,
सारे त्याचेच नडत होते !
उपोषण तिचे असले तरी
उपवास त्याला घडत होते !!

सूर्यकांत डोळसे,पाटोदा (बीड)

गोबेल्स निती

लोकपाल विधेयकाचा
कुणी कुणी बाऊ करू लागले.
लोकांचे गैरसमज
सारे पैसेखाऊ करू लागले.

ही गोबेल्स निती
सांगा कुठे नवी आहे ?
निरंकुश सत्ता तर
प्रत्येकालाच हवी आहे !

सूर्यकांत डोळसे,पाटोदा (बीड)

नैतिक विजय

अण्णांनी दाखवून दिले
आपण दिल्ली हादरू शकतो.
भ्रष्टाचारी व्यवस्थेची
बिनपाण्याने भादरू शकतो.

भ्रष्टाचारी व्यवस्थेला
हा पहिला-वहिला हादरा आहे !
जिंकलेल्या लढाईवर
लोकपालाची मुद्रा आहे !!

सूर्यकांत डोळसे,पाटोदा (बीड)

भ्रष्टाचाराचे रूपक

पैसे खाणे,पैसे देणे,
भ्रष्टाचार काही एव्हढाच नाही.
वरवर दिसत असला तरी
भ्रष्टाचार काही तेव्हढाच नाही.

भ्रष्टाचाराचा अर्थ
तसा खूप खूप व्यापक आहे !
वाढत्या अनैतिकतेचे
भ्रष्टाचार हे रूपक आहे !!


-सूर्यकांत डोळसे,पाटोदा (बीड)

भ्रष्टाचाराचे भाऊबंद

काम कोणतेही असो
ठरलेला टक्का असतो.
जास्त चौकशी केली तर
गोपनियतेचा शिक्का असतो.

टक्केवारी आणि गोपनियता
भ्रष्ट्राचाराचे बहिणभाऊ आहेत !
स्पष्टच सांगायचे झाले तर
जिकडे तिकडे भाडखाऊ आहेत !!


-सूर्यकांत डोळसे,पाटोदा (बीड)

दुसरी लढाई

देणारे आपले आहेत,
घेणारेही आपले आहेत.
स्वातंत्र्याच्या दुसर्‍या लढाईत
काळ्यात गोरे लपले आहेत.

पहिल्या आणि दुसर्‍या लढाईत
फार काही अंतर नाही !
लोकसहभागाशिवाय यश
हे काही जंतरमंतर नाही !!

-सूर्यकांत डोळसे,पाटोदा (बीड)

विश्वविजयाचा पंचनामा

कुणाच्या चालल्या पूजा-अर्चा,
कुणी आपले केस काढू लागले.
विश्वविजेते क्रिकेटपटू
आपले नवस फेडू लागले.

पराभवानंतर डफडे वाजते,
विजयानंतर चौघडे झडले जातात !
इतिहास नवसा-सायासाने नाही
इतिहास शौर्याने घडले जातात !!

-सूर्यकांत डोळसे,पाटोदा (बीड)

विमानदारी

राजकारणी असले तरी
खाल्ल्या मिठाला जागतात.
गुन्हेगारांशी सुद्धा
’विमानदारी’ने वागतात.

सगळ्यांच्याच संबंधित
विमानदारीचा चॅप्टर आहे !
विमानदारीच्या साक्षीला
कुठे कुठे हेलिकॉप्टर आहे !!


-सूर्यकांत डोळसे,पाटोदा (बीड)

पूनम पांडेचा दसकार

दुवा,आरती,नवस-सायास,
देवदेवतांचाही पिच्छा आहे.
भारत विजयी झाला तर
पूनमची विवस्त्र व्हायची इच्छा आहे.

भारताच्या विश्वकप विजयासाठी
अशी असभ्य शपथ आहे !
क्रिकेट आणि संस्कृतीच्या
सभ्यतेवर नवीनच आफत आहे !!

-सूर्यकांत डोळसे,पाटोदा (बीड)

बॅट म्हणाली बॉलला

तू माझा किस घेतल्याचा
पंचांना डाऊट येतो.
तुझ्या चहाटळपणामुळे
बॅटसमन आऊट होतो.

कधी नकळत घेतोस,
कधी वाजल्यासारखे होते !
कुणी ’रिव्हियू’ घेतला की,
मला लाजल्यासारखे होते !!

-सूर्यकांत डोळसे,पाटोदा (बीड)

भेसळीची शिक्षा

दूध भेसळ करणारांना
शिक्षा तर अशी हवी.
नको दंड,नको जन्मठेप,
मरेपर्यंत फाशी हवी.

तेंव्हाच खरे दूधाचे दूध,
पाण्याचे पाणी होईल !
निष्पापांचे जीव घेणारा
भेसळखोर ज्ञानी होईल !!

-सूर्यकांत डोळसे,पाटोदा (बीड)

नो बॉलचे गुपित

आपल्याला वाटते तो चुकतो,
पण तो मुद्दाम चुकत असतो.
तिला ’फ्री हिट’ मिळावा म्हणून
मुद्दामच नो बॉल टाकत असतो.

त्याच्या नो बॉलचे गुपित
असे आगळे-वेगळे असते !
तिला मिळालेल्या ’फ्री हिट’ मध्येच
त्याचे सगळे-सगळे असते !!

-सूर्यकांत डोळसे,पाटोदा (बीड)

भाटशाही

जे मुळातच लेचेपेचे
ते तात्पुरते ताठ झाले.
शब्दांचे उधळीत फुलोरे
ते एकमेकांचे भाट झाले.

’भाटशाही जिंदाबाद’चा
नारा त्यांच्या ओठी आहे !
त्यांना सोडून इतरांना कळते
ही भाटशाही खोटी आहे !!

-सूर्यकांत डोळसे,पाटोदा (बीड)

मस्तीवरचा विजय

सचिन,गौतम,युवराजची
बॅट अशी काही फिरली गेली.
मस्तवाल कांगारूंची
सगळी मस्ती जिरली गेली.

रैनाही रिमझिम रिमझिम नाही
दणदणीत कोसळला आहे !
आता पाकिस्तानचीही जिरवू शकतो
नवा आत्मविश्वास उसळला आहे !!

-सूर्यकांत डोळसे,पाटोदा (बीड)

सवयीचे गुलाम

ती नेटीझन आहे,
तोही नेटीझन आहे.
सगळे ’ऑनलाईन’ करण्याचा
दोघांचाही पण आहे.

नेटीझन असले तरी
एकमेकांची प्रचंड ओढ असते !
काहीही करायचे झाले तरी
त्यांचे आपले डाऊनलोड असते !!

-सूर्यकांत डोळसे,पाटोदा (बीड)

तीन तिघाडे काम बिघाडे

गर्जा महाराष्ट्र माझा...
म्हण्याची खरी इच्छा होते आहे.
आपल्या तीन माजी मुख्यमंत्र्यांचे
म्हणे स्विस बॅंकेत खाते आहे.

खरे काय ? खोटे काय ?
चौकशीअंती सिद्ध होईल !
अटकेपार झेंडे लावण्याची
आता खरोखरच हद्द होईल !!

-सूर्यकांत डोळसे,पाटोदा (बीड)

पॅकेज चोर

चौकश्यावर चौकश्या
चौकश्यांचे किस निघाले.
चारशे पाच अधिकारी
चारशे वीस निघाले.

४०५ जणांचा ४२० पणा
हे तर हिमनगाचे टोक आहे !
हे सांगायची गरज नाही
आमचा कशाकडॆ रोख आहे !!

-सूर्यकांत डोळसे,पाटोदा (बीड)

चांदण्यातील जवळीक

तो थोडासा तिच्याजवळ सरकला,
सर्वत्र गहजब माजला होता.
लोकांच्या चर्चा ऐकुनच
तो मनामध्ये लाजला होता.

एवढ्या वर्षांचा प्रयत्नही
कुठे कामा आला होता ?
ती म्हणजे पृथ्वी,
तो म्हणजे चंद्र,
त्याचा पार मामा झाला होता !

-सूर्यकांत डोळसे,पाटोदा (बीड)

साधी गोष्ट

मतांची खरेदी-विक्री
या देशात अवघड काम नाही.
विकिलिक्सच्या गौप्यस्फोटात
त्यामुळेच जराही राम नाही.

जगासाठी धक्का असेल,
आपल्यासाठी ही मामुली बाब आहे !
खरेदी-विक्री करणा‍रांच्या हाती
दुर्दैवाने लोकशाहीची आब आहे !!

-सूर्यकांत डोळसे,पाटोदा (बीड)

शिमग्याचा इशारा

ज्यांच्या पिकायच्या त्यांच्याच
पिकलेल्या पोळ्या असतात.
बाकीच्यांचा बारामाही शिमगा,
बारामाही होळ्या असतात.

व्यवस्थेविरूद्ध लढले की,
उगीच पोटशूळ उठले जाते.
वेदनेच्या आक्रोशालाही
बोंबलणे म्हटले जाते.

ही धगधगती आग अशी की,
अंत:करण चेतले पाहिजे !
होळीचा वणवा होण्याआधीच
आक्रोशाला समजून घेतले पहिजे !!

-सूर्यकांत डोळसे,पाटोदा (बीड)

डोळ्यातील सुनामी

तो चिड चिड चिडला की,
तिला खूपच एकाकी वाटते.
तो भूकंपासारखा थरथरला की
तिच्या डोळ्यात सुनामी दाटते.

सुनामी तर सुनामीच
एकच हाहा:कार होवून जातो !
तिच्या डोळ्यातील सुनामीत
तो बघता बघता वाहून जातो !!

-सूर्यकांत डोळसे,पाटोदा (बीड)

राजकीय भविष्य

हात दाखवून अवलक्षण झाले,
शरदाच्या चांदण्याचा वीट आला.
शिवशक्तीचा आधार घेण्याएवढा
भीमशक्तीवाला धीट झाला.

बोलण्यात आणि कृतीमध्ये
कुठेच एकवाक्यता नाही !
नेत्यांमागे कार्यकर्ते जातील
याची थोडीही शक्यता नाही !!

-सूर्यकांत डोळसे,पाटोदा (बीड)

महिला-मुक्ती

महिला मुक्तीच्या धोरणाची
घरा-घरात भक्ती केली जाते.
जन्माला येण्याअगोदरच
कायमची मुक्ती दिली जाते.

महिला मुक्तीच्या धोरणाची
घराघरात विकृत तर्‍हा आहे !
मुक्तात्मे म्हणत असतील,
इथे जन्म न घेतलेलाच बरा आहे !!

-सूर्यकांत डोळसे,पाटोदा (बीड)

राजकीय नशा

राजकीय नशेएवढी
दुसरी कोणतीही नशा नसते.
राजकीय नशा चढली की,
मग उतरायची भाषा नसते.

आहे ते वास्तव आहे,
हा शाब्दिक पोतारा नाही !
राजकीय नशेवरती
अजून तरी उतारा नाही !!

-सूर्यकांत डोळसे,पाटोदा (बीड)

बजेटची कथा

कितीही काटेकोरपणे करा
आर्थिक नियोजन फसले जाते.
गृहमंत्र्यांच्या हौसेपोटी
अर्थमंत्र्यांचे बजेट बसले जाते.

घरोघरच्या बजेटची
अशी सारखीच कथा असते !
नवरा नावाच्या अर्थमंत्र्याची
ही पारंपारिक व्यथा असते !!

-सूर्यकांत डोळसे,पाटोदा (बीड)

पासष्टी ते साठी

वयोमर्यादेच्या एका अटीने
जे होवू नये ते सारे झाले.
साठ वर्षांचे सगळे तरूण
अगदी अचानक म्हातारे झाले.

पासष्टीवरून साठीवरती
ज्येष्ठ नागरिकाची सवलत आहे !
म्हातारा म्हणाला म्हातारीला,
अगं,तारूण्य हीच खरी दौलत आहे !!

-सूर्यकांत डोळसे,पाटोदा (बीड)

इमानदारीच्या ’आय’ ला.....

उपकारादाखल इमानदारांना
आयकरात सुट असते.
बेइमानदारांकडून देशाची
लुटीवरती लुट असते.

बेइमानदारांकडून राजरोस
इथे देश फसवला जातो !
जे इमानदारीने भरतात
त्यांच्यावरच कर बसवला जातो !!

-सूर्यकांत डोळसे,पाटोदा (बीड)

पदराआडचे राजकारण

महिला आरक्षणाचे धोरण
पुरूषांच्या पथ्यावर पडले आहे.
पदराआडचे राजकारण
तेंव्हापासूनच वाढले आहे.

महिला सबलीकरणाचा गवगवा
जगजाहिरपणे करता येतो !
महिला आरक्षणाची ढाल घेऊन
नथीतून तीर मारता येतो !!

-सूर्यकांत डोळसे,पाटोदा (बीड)

चिरंजीव मराठी

मराठी वाचवा,मराठी वाचवा,
ओरडणारांचा एक घोळका आहे.
इंग्रजाळलेल्या माणसांना
माय मराठीचा पुळका आहे.

माय मराठीला सुगंध
कष्टकर्‍यांचा घामाचा आहे.
माय मराठीला पाया
ज्ञाना-तुका-नामाचा आहे.

इंग्रजाळलेल्या एवढीच
हिंदाळलेल्यांची कीव आहे !
माय मराठीची चिंता नको
माय मराठी चिरंजीव आहे !!

-सूर्यकांत डोळसे,पाटोदा (बीड)

पोलिसदादा...

पोलिसदादा,पोलिसदादा,
सांगा अजून काय बाकी आहे?
गुन्हेगारीने बरबटलेली
अंगावरची खाकी आहे.

कधी काळे,कधी ढवळे,
खाक्या वर्दीचे धंदे आहेत !
चार-दोन नासक्या कांद्यांमुळे
इमानदारांचे वांधे आहेत !!

-सूर्यकांत डोळसे,पाटोदा (बीड)

रेल्वे अर्थसंकल्पाची दिशा

पूर्वीपासून जे झाले
तेच पुन्हा पुन्हा होवू लागल्रे.
रेल्वेचे गाडीचे डबे
उत्तरेकडून पश्चिमेकडे धावू लागले.

रेल्वे अर्थसंकल्पाचे
चित्र अगदी साफ आहे !
ज्या राज्याचा रेल्वेमंत्री
त्यालाच झुकते माप आहे !!

-सूर्यकांत डोळसे,पाटोदा (बीड)

चमत्कारांचे विज्ञान

चमत्कारांमागे चमत्कारांच्या
वावड्यावर वावड्या उडतात.
चमत्कारांचा फुगा फुटताच
चमत्कारांच्या रेवड्या उडतात.

चमत्कारांमागे विज्ञान,
नाहीतर बनवाबनवी असते !
हातचलाखी मागे जी असते,
ती शक्ती तर मानवी असते !!

-सूर्यकांत डोळसे,पाटोदा (बीड)

टगे आणि बघे

जिकडे बघावे तिकडे
टगे आणि टगे आहेत.
टग्यांचे फावण्यास कारण की,
सगळीकडे बघे आहेत.

टगेगिरी आणि बघेगिरीचे
जाहिर रूणानुबंध आहेत !
बघेगिरी वाढल्यानेच
टगे टगेगिरीत धुंद आहेत !!

-सूर्यकांत डोळसे,पाटोदा (बीड)

रनर

राजकारण आणि क्रिकेट
यांचे नाते काही नवे नाही.
दोन्हीकडेही ’रनर’ लागतात
हे काय आम्हांला ठावे नाही?

असे ’रनर’ घेऊनच
आघाडी सरकार धावत असते !
जेवढी विरोधकांची फिल्डिंग टाईट,
तेवढे ’रनर’ चे फावत असते !!

-सूर्यकांत डोळसे,पाटोदा (बीड)

धावचित

तिच्यासाठी त्याची धावाधाव
थ्रो मात्र अवचित येतो.
ऐन मोक्याच्या क्षणी
तो नक्की धावचित होतो.

अवचित झालेल्या धावचितचा
दोष दुसर्‍याला देता येत नाही !
हा खेळच असा की,
इथे रनरही घेता येत नाही !!


-सूर्यकांत डोळसे,पाटोदा (बीड)

भविष्याचा अंदाज

जेंव्हा कधी एकत्र
भगवा आणि निळा असेल.
तेंव्हा कार्यकर्त्यांच्या कपाळी
जांभळ्या रंगाचा टिळा असेल.

निळा+भगवा=जांभळा
ही तर निसर्गाची जादू आहे !
येणारा काळच सांगेल
कोण किती संधीसाधू आहे !!

-सूर्यकांत डोळसे,पाटोदा (बीड)

होम-क्रिकेट

पोरांची बॅटींग जोरदार,
त्यांचा रन मागे रन असतो.
आईची फिल्डिंग ढिल्ली,
बाप तर ’नाईट वॉचमन’ असतो.

घरातल्या घरामध्ये
असे क्रिकेटचे मॅच होतात !
पिचचा अंदाज आला नाही की,
पोरांचे मग कॅच जातात !!

-सूर्यकांत डोळसे,पाटोदा (बीड)

दुधी विष

पैशापुढे कशाचीच
त्यांना सुध-बुध नाही.
शुद्धतेची खात्री द्यावी
असे आज दुध नाही.

दुधास दुध कसे म्हणावे?
हे तर विषाचे प्याले आहेत !
कर्ते आणि करविते
एकमेकांचे साले आहेत !!

-सूर्यकांत डोळसे,पाटोदा (बीड)

झंडू बाम आणि डोकेदुखी

दोघांमध्ये तिसर्‍याचे
सांगा काय काम आहे?
आता आम्हांला कळाले
नेमके कोण ’झंडू बाम’ आहे?

राम नाम सोडून,
राज नाम मुखी आहे !
दोघांमधल्या तिसर्‍यासाठी
उगीचच डोकेदुखी आहे !!

-सूर्यकांत डोळसे,पाटोदा (बीड)

प्रेमाचा गुलकंद

व्हॅलेंटाईन डे काही
त्याच्या मनासारखा गेला नाही.
त्याच्या एकाही गुलाबाचा
कुणीच स्विकार केला नाही.

” मत रो मेरे दिल ” असे म्हणत
आपले अश्रू रोखत असतो !
हल्ली नाकारलेल्या गुलाबाचाच
तो गुलकंद चाखत असतो !!

-सूर्यकांत डोळसे,पाटोदा (बीड)

प्रेमानुभव

व्हॅलेंटाईन डे च्या मुहूर्तावर
तिला एवढे काही गुलाब आहे.
प्रेमाची शिसारी येऊन
तिला उलट्या आणि जुलाब झाले.

तिच्या या अनुभवावरून
प्रेमवेड्यांना तरी हुशारी यावी !
ते प्रेमच खरे नाही
ज्याची किळस आणि शिसारी यावी !!

-सूर्यकांत डोळसे,पाटोदा (बीड)

मोबाईल लव्ह

तरूणाईच्या मानगुटीवर
व्हॅलेंटाईनचे भूत आहे.
हल्ली मोबाईल म्हणजे
प्रेमाचाच दूत आहे.

ज्यांच्या हाती मोबाईल
त्यांना तर भलताच चेव आहे !
आजकालचे प्रेम म्हणजे
शब्दश:’मोबाईल लव्ह’ आहे !!

-सूर्यकांत डोळसे,पाटोदा (बीड)

झाकीव सत्य

रस्त्यावरून चालताना
आम्हांला कोड्यात टाकलेले असते.
जिकडे बघावे तिकडे
हल्ली तोंड झाकलेले असते.

हे चेहरे झाकलेले
असे काय सोशित असतात?
त्यांचे उत्तर असे की,
आजकाल वातावरणच नाही
तर नजराही दूषित असतात !

-सूर्यकांत डोळसे,पाटोदा (बीड)

काकांचा माफीनामा

जे इतिहासात झाले नाही
ते वर्तमानात होवून आले.
’काका मला वाचवा’म्हणण्याआधीच
प्रत्यक्ष काका धावून आले.

पुतण्याच्या दादागिरीपेक्षा
माफीनामा शेलका आहे !
जे कॅमेर्‍यात कैद नाही,
त्याचाच जादा गलका आहे !!

-सूर्यकांत डोळसे,पाटोदा (बीड)

उंदीर बोले गणपतीला

प्लॅस्टर ऑफ पॅरिसमधून
आपली आता सुटका असेल.
भक्तांच्या धार्मिक भावनांना
निश्चित थोडाफार फटका बसेल.

बाप्पा,योग्य प्रबोधन झाले तर
हे लोकांच्या पचनी पडेल !
मात्र यात राजकारण घुसले तर
नक्की धार्मिक प्रदूषण वाढेल !!

-सूर्यकांत डोळसे,पाटोदा (बीड)

पेट्रोल म्हणाले कांद्याला

तू जसा आहेस तसा,
मी काही नासका नाही.
भाव वाढून उतरायला
मी काही फुसका नाही.

तुझ्यामुळे फक्त डोळ्यात पाणी,
माझ्यामुळे खिश्याला आग आहे !
मी चढतच जाणार,
तरीही मला घेणे भाग आहे !!

-सूर्यकांत डोळसे,पाटोदा (बीड)

राजे चला,तुम्हांला तुमचा महाराष्ट्र दाखवितो..

आपला ’शॉकप्रुफ’पणा

घोटाळा केवढाही असो
तो रेकॉर्डब्रेक असत नाही.
घोटाळ्यांचे आकडे ऐकून
आजकाल धक्काही बसत नाही.

कारण घोटाळेसम्राटांच्या देशात
आपण जन्माला आलो आहोत !
धक्के एवढे बसलेत की,
आपण ’शॉकप्रुफ’झालो आहोत !!

-सूर्यकांत डोळसे,पाटोदा (बीड)

एस.बॅंड घोटाळा

ए.राजाच्या बेंडबाजानंतर
नवा एस.बॅंड वाजू लागला.
हजारोंच्या नंतर लाखोंचा
महाघोटाळा गाजू लागला.

खरे काय?खोटे काय?
वास्तव ’देवास’ ज्ञात आहे !
लोकांच्या इस्त्राळूपणाचा
घोटाळ्यांच्या मागे हात आहे !!

-सूर्यकांत डोळसे,पाटोदा (बीड)

युतीचे भवितव्य

रेल्वेच्या इंजिनाला
हिरवा झेंडा दाखवू लागले.
नाथा पुरे आता,म्हणण्याएवढे
राजकीय गणित शिकवू लागले.

आपल्या वर्मी बाण लागल्यावर
वाघ कसा स्तब्ध राहिल?
रिमोटवरच चालते युती,
त्यांचाच अंतिम शब्द राहिल !

-सूर्यकांत डोळसे,पाटोदा (बीड)

धुंदी आणि बंदी

टाळ्याला जीभ लावून
वाट्टेल ते बोलू शकता.
घालायची असेल तर
मिडीयावर बंदी घालू शकता.

आपलेच साम्राज्य,
साक्षीला ’सकाळ’ आहे !
दादागिरी आणि उर्मटपणाचा
उगीचच सुकाळ आहे !!

-सूर्यकांत डोळसे,पाटोदा (बीड)

ज्योतिषाची शास्त्रीयता

ज्योतिषाच्या नावाने
ओरडून काही फायदा नाही.
आता आमच्या पाठीमागे
पाठीराखा कायदा नाही.

कायद्याला विरोध करण्याचे
आमचे काय कारण आहे ?
न्यायप्रियतेच्या ओझ्याखाली
विवेकबुद्धी मात्र तारण आहे !!

-सूर्यकांत डोळसे,पाटोदा (बीड)

आरोपी नं.२

नंबर दोनच्या धंद्यात
नंबर एक सुटला जातो.
त्याच्या पापाचा घडा
दुसर्‍याच्या माथी फुटला जातो.

त्यामुळेच आभाळातून पडल्यासारखे
साठेबाज सापडले जातात !
गोडाऊन मालक सुरक्षित,
काउंटरवरचे झापडले जातात !!


-सूर्यकांत डोळसे,पाटोदा (बीड)

भ्रष्टाचारी कवी

कवी फक्त कविताच नाही,
भ्रष्टाचारही करू शकतो.
देशातला सर्वात मोठा भ्रष्टाचारी
चक्क कवीच ठरू शकतो.

आमच्या या विधानाला
तुम्हांला पुष्टी हवी आहे ?
अटकेतला ए.राजा
हा तर मूळचा कवी आहे !

-सूर्यकांत डोळसे,पाटोदा (बीड)

जळजळीत सत्य

मनमाड जळीत प्रकरणामुळे
एक गोष्ट साफ आहे.
लोकांच्या मनात हळहळ
अधिकारी वर्गात थरकाप आहे.

लोकांमध्ये हळहळ असली तरी
अधिकार्‍यांविषयी माया नाही !
ज्यांचे जळते त्यांनाच कळते,
लाचखोरांविषयी दया नाही !!

-सूर्यकांत डोळसे,पाटोदा (बीड)

राजकीय भेसळ

तत्त्व,धोरण आणि निष्ठांची
सगळी मिसळामिसळ आहे.
आघाड्या आणि युत्या म्हणजे
राजकीय भेसळ आहे.

एकमेकांची अशुद्धता
आजकाल कुणाला जाचत नाही !
भेसळ अपरिहार्य झाल्याने
राजकीय शुद्धता पचत नाही !!

-सूर्यकांत डोळसे,पाटोदा (बीड)

थेट-भेट

या गुहेतून त्या गुहेत
पुन्हा जुनाच कित्ता आहे.
भगव्या वाघाच्या भेटीला
निळा निळा चित्ता आहे.

सांगता येत नाही
कुणाच्या चित्तात काय घोळू शकते ?
आज तर कुणाच्याही गुहेमध्ये
कुणीही आरामात लोळू शकते !

-सूर्यकांत डोळसे,पाटोदा (बीड)

नैतिक उंची

भ्रष्टाचाराची टाळी कधी
एका हाताने वाजत नाही.
कुणी घेताना तर
कुणी देताना लाजत नाही.

घेणारे बिनलाजे असतील तर
देणारेही बिनलाजे आहेत !
नैतिक उंचीपुढे
घेणारे-देणारेही खुजे आहेत !!

-सूर्यकांत डोळसे,पाटोदा (बीड)

भेसळीचा कारभार

भेसळीची भीती कुणाला?
भेसळखोर बेदरकार आहे.
मुंबई असो वा दिल्ली
भेसळीचेच सरकार आहे.

जसे काय भेसळ म्हणजे
जीवनाचा अविभाज्य घटक आहे?
भेसळीच्या कारभाराची
लोकशाहीलाही चटक आहे !!

-सूर्यकांत डोळसे,पाटोदा (बीड)

छापा-छापी

कुठे कापाकापी चालु आहे,
कुठे ढापाढापी चालु आहे.
लुटुपुटुची का होईना
सर्वत्र छापाछापी चालु आहे.

हप्ते न देणारांना शिक्षा,
हप्तेखोरांना सरळ माफी आहे !
समजणारांना समजलेच असेल
त्यांच्यासाठी इशाराही काफी आहे !!

-सूर्यकांत डोळसे,पाटोदा (बीड)

सामाजिक मस्ती

दिशा देणारांकडे कानाडोळा,
दशा करणारांशी दोस्ती आहे.
दुसरे तिसरे काही नाही
ही सामाजिक मस्ती आहे.

"आपल्याला काय त्याचे?"
ही मस्ती तुम्ही टाळू शकतात !
नसता उद्या मनमाड सारखे
तुम्हां-आम्हांलाही जाळू शकतात !!

-सूर्यकांत डोळसे,पाटोदा (बीड)

प्रजासत्ताकाचे वास्तव

प्रजासत्ताकाची वाटचाल
मतसत्ताकाकडे होते आहे.
ज्याच्यावर भरवसा ठेवावा
ते कुंपणच शेत खाते आहे.

मतसत्ताक ते टोळीसत्ताक
हे प्रजासत्ताकाचे रूप आहे !
ज्याच्या ताटात पोळी
त्याच्याकडेच तूप आहे !!

-सूर्यकांत डोळसे,पाटोदा (बीड)

धार्मिक दांभिकता

आपली ती धार्मिकता,
दुसर्‍याचा तो धर्मप्रचार असतो.
ज्याच्या त्याच्या धार्मिकतेचा
असा स्वार्थी विचार असतो.

दुसर्‍याच्या धर्माविषयी
मनात पक्का विखार असतो !
संकुचित धार्मिकतेला
दांभिकतेचा विकार असतो !!

-सूर्यकांत डोळसे,पाटोदा (बीड)

हिची चाल तुरू तुरू

हिची चाल तुरू तुरू

जीवनावश्यक वस्तुंमध्ये
महागाई चढाओढ लावू लागली.
तुरीची डाळही
पुन्हा तुरू तुरू धावू लागली.


महागाईचे दु:ख असे
घासा-घासाला गिळावे लागते!
डाळ शिजली नाही तरी
पापी पोटाला जाळावे लागते !!

-सूर्यकांत डोळसे,पाटोदा (बीड)

हिची चाल तुरू तुरू

***** आजची वात्रटिका *****
**********************

हिची चाल तुरू तुरू

जीवनावश्यक वस्तुंमध्ये
महागाई चढाओढ लावू लागली.
तुरीची डाळही
पुन्हा तुरू तुरू धावू लागली.


महागाईचे दु:ख असे
घासा-घासाला गिळावे लागते!
डाळ शिजली नाही तरी
पापी पोटाला जाळावे लागते !!

-सूर्यकांत डोळसे,पाटोदा (बीड)

सरकारी खिसेकापू

सरकारी कार्यालये म्हणजे
भ्रष्टाचाराचे टापू आहेत.
टेबला-टेबलावर बसलेले
अट्ट्ल खिसेकापू आहेत.

सरकारबरोबर लोकांचेही खिसे
बेमालुमपणे कापले जातात !
खिसेकापूंच्याच मागे
खिसेकापू लपले जातात !!

-सूर्यकांत डोळसे,पाटोदा (बीड)

देशभक्तीची लाज

शालेय वयात जमते तर
महाविद्यालयातही जमले पाहिजे.
तिथे प्रतिज्ञेच्या सोबतीने
राष्ट्र्गीतही घुमले पाहिजे.

संबंध सक्तीचा नाही,
संबंध युवाशक्तीचा आहे !
त्यात लाज कशाला बाळगायची?
जिथे संबंध देशभक्तीचा आहे !!

-सूर्यकांत डोळसे,पाटोदा (बीड)

’स्वाभिमाना’ची गोष्ट

पक्षापेक्षा संघटनांचेच
स्वाभिमान जागू लागले.
संघटनावाले पक्षांशी
दादागिरीने वागू लागले.

मुलांना वडीलांकडूनच
दादागिरीचे शिक्षण आहे !
हात तिच्या आयला
हे तर अवलक्षण आहे !!

-सूर्यकांत डोळसे,पाटोदा (बीड)

नंबर पोर्टेबिलिटी

कुणाकुणाच्या नेटवर्कचा
कव्हरेज एरियाच भारी आहे.
त्यांची नंबर पोर्टेबिलिटी
आधीपासूनच जारी आहे.

नंबर तोच असला तरी
त्यांची ’कंपनी’वेगळी असते !
ज्यांना हे जमते
त्यांची मजाच आगळी असते !!

-सूर्यकांत डोळसे,पाटोदा (बीड)

गोल्डन चान्स

भ्रष्टाचाराने बरबटलेले
आदर्शचे इमले आहेत.
घोटाळेबहाद्दर सोडून
पर्यावरणात रमले आहेत.

आदर्शचा पर्यावरणाला,
भ्रष्टांचा व्यवस्थेला धोका आहे !
मुळापासून नष्ट करण्यासाठी
हाच सर्वोत्तम मोका आहे !!

-सूर्यकांत डोळसे,पाटोदा (बीड)

नैसर्गिक न्याय

आदर्शचा टॉवर उंच
लवासाचे पाणी खोल आहे.
पर्यावरणाच्या नावाने
दोन्हीकडेही ढोल आहे.

निसर्गच सांगेल
कोण किती पाण्यात आहेत?
पोवाडे गाणारे गातीलच
त्यांचे फायदेच
पोवाडे गाण्यात आहेत !!

-सूर्यकांत डोळसे,पाटोदा (बीड)

कांदा एके कांदा

कधी कांदा हसवतो,
कधी कांदा रडवतो.
आपल्याला झळ बसताच
आपण ऊर बडवतो.

ज्याला खरी झळ बसते
त्याला गृहीत धरीत नाहीत !
कांदा उतरला-चढल्याने
आपण आत्महत्या करीत नाहीत !!

-सूर्यकांत डोळसे,पाटोदा (बीड)

कथा चीनच्या कांद्याची

मेड इन चायनाच्या
चर्चाच फार असतात.
कांद्यांचेही तसेच आहे,
एका किलोत चार बसतात.

नाक मुरडत का होईना
चिनी कांदा घ्यावा लागेल !
एक-एक कांदा मग
सात दिवस खावा लागेल !!

-सूर्यकांत डोळसे,पाटोदा (बीड)

इज्जत का सवाल

आयटम सॉंगच्या ओळी
तापदायक ठरू लागल्या.
इज्जतीपोटी मुन्नी आणि शीला
आपले नामांतर करू लागल्या.

त्यांच्या मानसिकतेची कल्पना करा
ज्यांचे नाव मुन्नी आणि शीला असेल !
उद्या आपल्याही लेकीबाळींवर
पुन्हा हीच बला असेल !!

-सूर्यकांत डोळसे,पाटोदा (बीड)

पेट्रोलवर संक्रांत !

पेट्रोलवर संक्रांत !

गाढवावरची संक्रांत
पेट्रोलवर बसली आहे.
त्यांना दिसत नसली तरी
आम्हांला महागाई दिसली आहे.

महागाईचे वाढते ओझे
नाविलाजे झेलावे लागेल !
तोंड कडू झाले असले तरी
गोड गोड बोलावे लागेल !!

-सूर्यकांत डोळसे,पाटोदा (बीड)

संक्रांत-फ़ल

संक्रांत सांगण्याची कथा
जरी वर्षानुवर्षे फसलेली असते.
तरीही पुन्हा पुन्हा संक्रांत
कशावर तरी बसलेली असते.

तिळागुळाच्या गोडीला
सांस्कृतिक ओल आहे !
सत्य,शिव,सुंदराचे संक्रमण
हे खरे संक्रांत फ़ल आहे !!

-सूर्यकांत डोळसे,पाटोदा (बीड)

कांदेचोर

वाढती महागाई बघून
लोक दात कोरायला लागले.
आजकाल चोरसुद्धा
चक्क कांदे चोरायला लागले.

ज्यांचा धंदाच लुटालुटीचा
त्यांचेच हे काम आहे !
कुणाची कांदेचोरी छुपी,
कुणाची खुलेआम आहे !!

-सूर्यकांत डोळसे,पाटोदा (बीड)

महागाईचे राजकारण

एकमेकांच्या डोक्यावर
महागाईचे खापर फोडू लागले.
महागाई रोखायची सोडून
आपले तारतम्य सोडू लागले.

दोषारोपांच्या स्वस्ताईने
सरकार त्रासलेले आहे !
जनतेबरोबर सरकारही
महागाईने ग्रासलेले आहे !!

-सूर्यकांत डोळसे,पाटोदा (बीड)

तारूण्याची जबाबदारी

तरूण असून उपयोग नाही,
तारूण्य कळले पाहिजे.
तारूण्य साचलेले नको,
तारूण्य सळसळले पाहिजे.

नवी आव्हाने पेलताना
माय-मातीची लाज नको.
तारूण्याचा उत्साह असावा
तारूण्याचा माज नको.

तनात असले तरी
मनात तारूण्य पाहिजे !
वेधक असावे,भेदक असावे,
नजरेतही कारूण्य पाहिजे !!

-सूर्यकांत डोळसे,पाटोदा (बीड)

भ्रष्टाचाराचा ट्वेंटी-20

क्रिकेटसारखे भ्रष्टाचाराचे
नवे रूप समोर येऊ लागले.
पहिले कसोटीसारखे खायचे
आता ट्वेंटी-20 सारखे खाऊ लागले.

दम खायला वेळ कुणाला?
सगळे कसे झट की पट आहे?
ऑलराउंडर खेळाडूंचा तर
सगळीकडेच जबर वट आहे !!

-सूर्यकांत डोळसे,पाटोदा (बीड)

सा.सूर्यकांती अंक ३३ वा.

राजकीय खुलेपणा

ऊठसूठ तुटण्याएवढे
पक्षीय पाश ढिले असतात.
सर्वच पक्षांचे दरवाजे
येणारा-जाणारांना खुले असतात.

राजकीय खुलेपणामुळेच
राजकीय समतोल राखला जातो !
पाहिजे तो पक्षीय स्वाद
त्यामुळेच तर चाखला जातो !!

-सूर्यकांत डोळसे,पाटोदा (बीड)

आदर्श शाखा:पुणे

हौतात्म्य आणि विश्वास
दोन्हीलाही धोका आहे.
मुंबईनंतर पुण्यातही
आदर्श घोटाळ्याची शाखा आहे.

घोटाळ्यांचा हैदोस तर
जिकडे तिकडे वाढला आहे !
केवळ मुंबईच नाही
देशसुद्धा विकायला काढला आहे !!

-सूर्यकांत डोळसे,पाटोदा (बीड)

आय.पी.एल-4

बेभरवश्याच्या खेळात
भरवश्याच्या लक्ष्मणला भाव नाही.
प्रत्यक्ष महाराजाचे तर
लिलावतच नाव नाही.

गौतमची गंभीरता वाढली,
वाळीत गेल आणि लारा टाकला.
धावणार्‍या घोड्यांनाच
मालकांनी चारा टाकला.

खेळाडूंबरोबर इज्जतीचाही
हा जाहीर लिलाव आहे !
क्रिकेटच्या बोन्सायचे
ट्वेंटी-20 हे नाव आहे !!

-सूर्यकांत डोळसे,पाटोदा (बीड)

थंडीची लाट

कधी उष्णतेची,
कधी थंडीची लाट असते.
माणसाची निसर्गाशी
कायमचीच गाठ असते.

उष्णतेने पारा चढतो,
थंडीने पारा उतरत असतो.
निसर्ग माणसावर
सकारण बिथरत असतो.

लाट कोणतीही असो
माणसे त्यावर स्वार होतात !
आईसक्रिमच्या कपापेक्षा
बाटल्यांचेच खळखळाट फार होतात !!

-सूर्यकांत डोळसे,पाटोदा (बीड)

जातीवाचक ओळख

जसे ढोपरता येतील तसे
महापुरूष ढोपरले जातात.
जसे वापरता येतील तसे
महापुरूष वापरले जातात.

जातीय चौकटीचा विळखा
महापुरूषांसाठी जाचक आहे !
दुर्दैवाने महापुरूषांची ओळख
सध्या तरी जातीवाचक आहे !!

-सूर्यकांत डोळसे,पाटोदा (बीड)

जाहिर कबुली

इलेक्ट्रॉनिकच्या माध्यमाने
पत्रकारिता देखणी झाली.
गुळ्गुळीत कागदी स्पर्शाने
बुळबुळीत लेखणी झाली.

कुणाच्या देखणेपणाला
कमी लेखण्याचा हेतू नाही.
सत्ता-संपत्तीपर्यंत पोहोचण्याचा
पत्रकरिता हा सेतू नाही.

धंदेवाईकपणा कबुल करा
सतीसावित्रीचा आव नको !
एकमेकांचे डोळे झाकून
आंधळ्या कोशिंबीरीचा डाव नको !!

-सूर्यकांत डोळसे,पाटोदा (बीड)

26/11 ची जखम

26/11 ने देश ढवळून निघाला
राजकारणही ढवळून निघले आहे.
ज्याला राजकीय मुद्दे पाहिजेत
त्यांचेही आयतेच भागले आहे.

त्यामुळेच 26/11 ची जखम
पुन्हा पुन्हा चिदगळते आहे !
ज्याचे त्याला कळत असूनही
स्वार्थापोटी कुठे वळते आहे ?

-सूर्यकांत डोळसे,पाटोदा (बीड)

सावित्रीचे देणे

नवरा-बायको नोकरीला
पगारही डबल आहेत.
वरवरचा अर्थ असा की,
महिलाही सबल आहेत.

हे विसरून चालणार नाही
हे सावित्रीचे देणे आहे !
आर्थिक सबलता आली तरी
वैचारिक सबलता येणे आहे !!

-सूर्यकांत डोळसे,पाटोदा (बीड)

इशाराही काफी है

दहशतवादाचा अर्थ
सोसणारालाच कळू शकतो.
दहशतवादाचा राक्षस
पोसणारालाच गिळू शकतो.

अमेरिका,पाकिस्तान
हे त्याचे जिवंत दाखले आहेत !
आम्हांला काय म्हणायचे आहे,
कळणारे कळून चुकले आहेत !!

-सूर्यकांत डोळसे,पाटोदा (बीड)

पेताडोत्सव

नवे वर्ष येते म्हणजे
नेमके काय घडत असते?
पेतांडांच्या उत्सवात
एकाची भर पडत असते.

ग्लोबलतेचे वारे असे
पेताडांच्या पथ्यावर पडत आहेत !
पेताडांचे उत्सव तर
दिवसेंदिवस वाढत आहेत !!

-सूर्यकांत डोळसे,पाटोदा (बीड)