तोडपाणी

हे दिवसच जणू
परस्परांची स्तुती गाण्याचे आहेत.
नीट पाहिले की कळते,
हे दिवसच तोडपाण्याचे आहेत.

कुठे उघड,कुठे छुपे
सोईप्रमाणे तोडपाणी आहे !
जनतेला सांगायची गरज नाही
जनता तर सर्वज्ञानी आहे !!

-सूर्यकांत डोळसे,पाटोदा (बीड)

मॅच फिक्सिंग

क्रिकेट आणि जुगाराची
जेंव्हा जेंव्हा मिक्सिंग होते.
तेंव्हा तेंव्हा सामन्याची
हमखास फिक्सिंग होते.

सभ्य माणसांचा खेळ मग
असभ्यपणे खेळला जातो !
नेहमीपेक्षा जास्त पैसा
न खेळताही मिळला जातो !!


-सूर्यकांत डोळसे,पाटोदा (बीड)

शिक्षक दिनाची चाहूल

कुणी अंधारात,कुणी उजेडात,
कुणी देतो आहे,कुणी घेतो आहे.
हळुहळू कळू लागते
शिक्षक दिन जवळ येतो आहे.

कुणी करतो ऒढाओढी
कुणाच्या गळ्यात टाकला जातो !
आदर्श पुरस्कारांच्या भानगडीत
काळ वरचेवर सोकला जातो !!


-सूर्यकांत डोळसे,पाटोदा (बीड)

दहशतवादाची रंगबाजी

दहशतवादाच्या राक्षसाला
रंगामध्ये रंगवायला लागले.
आपल्या सोईचे रंग वापरून
लोकांना भिंगवायला लागले.

ज्याच्या त्याच्या हातामध्ये
आपल्या आवडीचा रंग आहे !
हे दुसरे तिसरे काही नाही
हा असंगाशी संग आहे !!

-सूर्यकांत डोळसे,पाटोदा (बीड)

उंचीचे मोजमाप

आर्थिक पाठबळ असेल तरच
राजकारणात दाळ शिजली जाते.
डिजिटलच्या उंचीवरूनच
राजकीय उंची मोजली जाते.

डिजिटल नेत्यांचे
प्रकारच हाय-फाय आहेत !
त्यांचीच राजकीय उंची खरी
ज्यांचे जमिनीवर पाय आहेत !!

-सूर्यकांत डोळसे,पाटोदा (बीड)

अति तिथे माती

वाढत्या वृत्तपत्रीय स्पर्धेमुळे
वाचकांची सद्दी आहे.
जेवढे पेपरचे बील येते
तेवढ्याची तर रद्दी आहे.

वृत्तपत्र विक्रेत्यांचे मरण
वाचक काही तोट्यात नाही !
एखादे बक्षिस लागले की,
वाचन काही घाट्यात नाही !!

-सूर्यकांत डोळसे,पाटोदा (बीड)

कॉलेज कट्ट्याचे दु:ख

भांडा सौख्यभरे

खड्डॆशाही

खड्डॆशाही

लहान पडतात,मोठे पडतात,
तरूंणाबरोबर बुढ्ढे पडतात.
रस्त्यावरचे खड्डॆ बघून
पोटामध्ये खड्डॆ पडतात.

सिंमेट,डांबर,खडीबरोबर
कुठे कुठे रस्ताच खाल्ला आहे !
रस्त्यावरचे खड्डॆ सांगतात,
बघा देश कुठे चालला आहे !!

-सूर्यकांत डोळसे,पाटोदा(बीड)
मोबाईल-9923847269
-----------------------------------------
चिमटा-2326
दैनिक पुण्यनगरी
3ऑगस्ट2010
----------------------------
#आजच्यावात्रटिका
#वात्रटिका
#सूर्यकांतडोळसे
#मल्टीमीडिया_वात्रटिका
#चेंडूचीफुले
--------------------------------
माझ्या वात्रटिका शेअर करण्यासाठी कुठल्याही परवानगीची गरज नाही.
वात्रटिका जशी आहे तशी आणि माझ्याच नावासह शेअर करायला,संदर्भासाठी वापरायला हरकत नाही.
खूप जण मोठ्या प्रमाणात शेअर करीत आहेत.इतरांनीही ते करावे अशी अपेक्षा आहे.
सर्वांचे पुन्हा एकदा आभार.

-सूर्यकांत डोळसे
https://suryakantdolase.blogspot.com/

• 
  

  

पिपली लाईव्ह

जिकडे तिकडे लाईव्ह,
जिकडे तिकडे ’पिपली’ आहे.
गिधाडांची नजर तर
शिकारीवरच टपली आहे.

" सर्वात आधी,सर्वात प्रथम"
असे ढोल बडवल्या जातात.
दाखवायला काही नसेल तर
बातम्यासुद्धा घडविल्या जातात.

न्यूज चॅनलची जीवघेणी स्पर्धा
पत्रकारितेला लाजरे करते आहे !
आनंद तर साजरा करावाच,
पण दु:ख देखील साजरे करते आहे !!

-सूर्यकांत डोळसे,पाटोदा (बीड)

झोपडपट्टीचे मनोगत

आपली वैचारिक ’किर’ कोळता
वेशीला टांगायची गरज नव्हती.
प्रतिभा कुठे असते ? कुठे नसते?
हे सांगायचीच गरज नव्हती.

पोटातल्या गोष्टी अशा
सहज ओठावर येऊन जातात !
आपल्या हाताने आपल्या प्रतिमेच्या
ठिकर्‍या-ठिकर्‍या होऊन जातात !!

-सूर्यकांत डोळसे,पाटोदा (बीड)

खासदारांची पगारवाढ

खासदारांची पगारवाढ

पगार आणि महागाईचे नाते
अगदीच सख्खे आहे.
खासदारांची पगारवाढ तर
थेट तिनशे टक्के आहे.

महागाई प्रचंड वाढलीय
याची ही तर हमीच आहे !
अजूनही असंतुष्टांचे दावे
ही पगारवाढ कमीच आहे !!

-सूर्यकांत डोळसे,पाटोदा (बीड)

लोडशेडींग मुक्ती

गणपती म्हणाला उंदराला,
अंधाराचे जाळे फिटले आहे.
लोडशेडींगचे प्रकरण
आपल्यापुरते तरी मिटले आहे.


यावर उंदीर उत्तरला,
बाप्पा,आंब्याऐवजी ही कोय आहे !
आपल्या नावावर पत्ते खेळणारांची
ही आयतीच सोय आहे !!

-सूर्यकांत डोळसे,पाटोदा (बीड)

गिरिजात्मक किर-किर

झोपडीत प्रतिभेचा स्पर्श नसतो
गिरिजाताई किरकिरल्या आहेत.
अध्यक्षीय लढाई अगोदरच
उगीच वाकड्यात शिरल्या आहेत.

प्रतिभा म्हणजे माणूस नाही
ती असली शिवाशिव पाळू शकते !
कितीही सावरासावर केली तरी
किरकिरीतली भावना कळू शकते !!


-सूर्यकांत डोळसे,पाटोदा (बीड)

रडीचा डाव

खळ्ळऽऽ खटाक....

काकाची मदत घेणारे
पुतण्याची मदत घेऊ लागले.
कानामागुन येणारे आवाज
मल्टिप्लेक्स मधून येऊ लागले.

जरी त्यांचे राजकीय वजन
छटाक-दीड छटाक आहे !
मल्टिप्लेक्स मधून आवाज येतो
तो खळ्ळऽऽ खटाक... आहे !!

-सूर्यकांत डोळसे,पाटोदा (बीड)

(त्यांचे=दगडांचे)

युवा नेत्यांची फॅक्टरी

भारत ह तरूणांचा देश आहे
याची खात्री पटायला लागली.
युवा नेत्यांच्या बॅनर्सनी
गावच्या गावं नटायला लागली.

बॅनरवर कुठे म्हातारे,
कुठे शेंबडी पोरं आहेत !
युवा नेते म्हणून मिरवायची
ही पदरची थेरं आहेत !!

-सूर्यकांत डोळसे,पाटोदा (बीड)

हे स्वातंत्र्य दिना....

असा सुट्टीच्या दिवशी
पुन्हा कधी येत जाऊ नकोस.
आमची हक्काची सुट्टी
अशी खात जाऊ नकोस.

आज कितीतरी सरकारी जीव
सुट्टी गेल्याने तळमळत असतील.
सांग,त्यांच्या या भावना
तुला कुठे रे कळत असतील ?

शनिवारी नको,रविवारी नको,
जरा सणसुद पाळीत जा !
यायचे तर सुट्ट्यांना जोडून ये
त्यासाठी जरा कॅलेंडर चाळीत जा !!


-सूर्यकांत डोळसे,पाटोदा (बीड) .

आपला भारत देश महासत्ता होणार आहे....

जातिनिहाय जनगणना

जातिनिहाय जनगणना

जी पाळली जात होती
ती आता मोजली जाईल.
निश्चित अशा आकडेवारीने
जत नव्याने सजली जाईल.

जातिनिहाय जनगणनेमुळे
पश्चातापाची पाळी येऊ नये !
आकड्यांचे विकासकारण व्हावे
फक्त राजकारण होऊ नये !!

-सूर्यकांत डोळसे,पाटोदा (बीड)

गटारी:एक निमित्त

कोंबड्या-बक‍र्यांचा आक्रोश,
जियो और जिने दो
खाणार्‍या-पिणा‍र्यांचा जल्लोष,
पियो और पिने दो.

खाणारे खातात,पिणारे पितात,
बळी जाणारे बळी जातात !
गटारीच्या अधिकृत निमित्ताने
बाटल्याही गळी जातात !!

-सूर्यकांत डोळसे,पाटोदा (बीड)

दारू’डे’

आपली डे संस्कृती तर
पाश्चिमात्यांच्याही पुढे आहे.
गटारी अमावस्या म्हणजे
देशी दारू ’डे’ आहे.

देशी की विदेशी?
याचे गटारीला भान नसते !
जणू संस्कृतीच्या नावाखाली केलेले
मद्यपान हे मद्यपान नसते !!


-सूर्यकांत डोळसे,पाटोदा (बीड)

भ्रष्टकुल स्पर्धा

मिडीयाच्या बातम्या
भ्रष्टाचाराने नटू लागल्या.
राष्ट्रकुल स्पर्धा
भ्रष्टकुल स्पर्धा वाटू लागल्या.

सरकारी तिजोरीला
जणू चोरांचाच पहारा आहे ?
आता आरोपींना फक्त
काटेरी कुंपणाचाच’सहारा’ आहे !

-सूर्यकांत डोळसे,पाटोदा (बीड)

ढगफुटी

ढगफुटी आपल्याला नवी नाही
नेते सुसाट सुटत असतात.
आश्वासनांचे असेच ढग
प्रचारामध्ये फुटत असतात.

मतांच्या जोगव्यासाठी
पसरलेली परडी असते!
आश्वासनांची ढगफुटी
ओली नाही,कोरडी असते !!

-सूर्यकांत डोळसे,पाटोदा (बीड)

मॉडर्न गटारी

लोकशाही आदर्श

दिल्लीतले पाहूनच
गल्लीतले शिकत असतात.
खासदार विकतात म्हणूनच
ग्राम पंचायत सदस्य विकत असतात.

दिल्लीचा आदर्श असा
गल्लोगल्ली पाळला जातो आहे!
कुठे ग्राम पंचायत लिलाव,
कुठे पक्षादेश टाळला जातो आहे !!


-सूर्यकांत डोळसे,पाटोदा (बीड) .

कॉमन (वेल्थ+सेन्स)

राष्ट्र्कुल स्पर्धे अगोदरच
लांड्यालबाड्यांचा खेळ रंगला आहे.
पुसल्यावरती सांगा,
कोणता टिश्यू पेपर चांगला आहे ?

लांड्यालबाड्यांचा विक्रम
स्पर्धे अगोदरच नोंदल्या जातील !
याच पैशातून आज नाही,
कल माड्या बांधल्या जातील !!

-सूर्यकांत डोळसे,पाटोदा (बीड) .

फोटो-कॉप्या

एकाच फोटोच्या
दोन-दोन कॉप्या आहेत.
मराठीच्या नावावर
लोकांना टोप्या आहेत.

एक टिपतो फोटो,
दुसरा व्यंग टिपतो आहे !
एकच माल असा
दोन दुकानातून खपतो आहे !!

-सूर्यकांत डोळसे,पाटोदा (बीड)

ग्रीन टॅक्स

शासनाचा निर्णय
थेट हृदयालाच शिवला आहे.
प्रदूषणकारक वाहनांवर
ग्रीन टॅक्स लावला आहे.

या ग्रीन टॅक्सच्या कक्षा
अजून रूंद व्हायला पाहिजेत !
गांज्या-बिडी-सिगारेट्फुके
सगळेच यात यायला पाहिजेत !!


-सूर्यकांत डोळसे,पाटोदा (बीड)

रेव्ह पार्टी... मराठी वात्रटिका

आजची वात्रटिका

-------------------

रेव्ह पार्टी

रस्त्यावर होतो तो तमाशा,

आडोशाला पार्ट्याअसतात.

त्यात पिचाळलेली कार्टी,

पिचाळलेल्या कारट्या असतात.

झिंगलेल्या पार्ट्यांमध्ये,

तन-मन-धन उधळून देतात.

आई-बापाच्या श्रीमंतीवर,

कार्टी पाहिजे तेवढे खिदळून घेतात.

रेव्ह पार्ट्यांच्या ठरावीक अटी,

बापकमाईच्या धुंद्या पाहिजेत,

अंगावरती फार कपडे नकोत,

असतील त्या चिंध्या पाहिजेत.

मना-मनात माज पाहिजे,

तना-तनात खाज पाहिजे!

गरिबारिबांचे काम हे नाही,

पार्ट्यांना श्रीमंतीचा बाज पाहिजे!!

-सूर्यकांत डोळसे, पाटोदा (बीड)

मोबाईल-9923847269

-----------------------

चिमटा-2310

दैनिक पुण्यनगरी

4 ऑगस्ट 2010

कॉमन-वेल्थ

कॉमन वेल्थपूर्वीच
मैदानं गाजू लागले.
झालेला खेळखंडोबा बघून
भारतीय लाजू लागले.

खायचे तेवढे खाऊन घ्या
ही तर कॉमन-वेल्थ आहे !
जो फुकटचे खाईल
त्याचीच तगडी हेल्थ आहे !!


-सूर्यकांत डोळसे,पाटोदा (बीड)

फ्रेंडशिप (वे) डॆ

मैत्रीसारख्या मैत्रीलाही
पाश्चिमात्य ट्रेंड आहे.
सांगायलाच कशाला हवे ?
मी तुझा फ्रेंड आहे.

मैत्रीला ’बॅंड’ नाही तर
स्टॅंड असावा लागतो !
मैत्रभाव मिरवण्यापेक्षा
निभावताना दिसावा लागतो !!


-सूर्यकांत डोळसे,पाटोदा (बीड)

चलाखी

परंपरांच्या नावाखाली
आपापल्या सोई लावल्या आहेत.
आपल्याला कळतही नाहीत
अशा खुट्ट्या मारून ठेवल्या आहेत.

या खुट्ट्यांच्या विरोधात
जरा कुठे आवाज उठतो आहे !
तिकडून अफवा उठू लागतात,
आपला धर्म बाटतो आहे !!

-सूर्यकांत डोळसे,पाटोदा (बीड)