बघा बुवा !

दवा पाहिजे,दवा देतात,
दुवा पाहिजे,दुवा देतात.
मुलंबाळं नसणार्‍या भक्तांना
मुलंसुद्धा बुवा देतात.

भक्त सोसतात,भक्त फसतात
तरीही अंधविश्वास ठाम आहे !
पटले तरच होय म्हणा,
आमचे बुवा सांगणे काम आहे !!

-सूर्यकांत डोळसे,पाटोदा (बीड)

न्यूज चॅनलचा बकासूर

बातम्यांच्या नावाखाली
२४ तास काहीतरी द्यायला लागते.
न्यूज चॅनल नावाच्या बकासूराला
सारखे काहीतरी खायला लागते.

नाहीच मिळाले काही तर
तेच तेच चघळत असतो !
बकबक करीत बकासूर
तेच तेच उगळत असतो !!

-सूर्यकांत डोळसे,पाटोदा (बीड)

ते आणि आपण

शे-पन्नास रूपये वर देऊन
नंबरशिवाय गॅस घेतोच ना?
एखादे काम पटकन होण्यासाठी
आपण शे-पाचशे देतोच ना?

ते कागदावर घरं बांधतात,
आपण अनुदान लाटतोच ना?
कागदावर विहिरी,तळी खांदून
बोगस बिलांचा नोह सुटतोच ना?

सांगा नेमका कोणता भेद
त्यांच्यात आणि आपल्यात असतो !
त्यांच्याएवढाच आपलाही
सहभाग गफल्यात असतोच ना ?

-सूर्यकांत डोळसे,पाटोदा (बीड)

लोककलेचा ’विठठल’ गेला...

२६/११ ची तक्रार

एवढा मोठा धोका होवूनही
अजून काहीच शिकला नाहीत.
खर्‍या-खुर्‍या सत्यावरती
अजूनही प्रकाश टाकला नाहीत.

असे बेसावध राहिलात तर
पुन्हा कुणीतरी येऊन जाईल !
पुन्हा एखादी २६/११
बघता-बघता होवून जाईल !!

-सूर्यकांत डोळसे,पाटोदा (बीड)

बिहारचा ऐतिहासिक निकाल

आपल्याच जाळ्यात
लालुंना फसावे लागले.
राजपुत्रालाही बिहारमध्ये
हात चोळीत बसावे लागले.

सामोश्यात आलू असतानाही
बिहारमध्ये लालु नाही !
ज्याची त्याला जागा कळाली
आपण काही बोलू नाही !!

-सूर्यकांत डोळसे,पाटोदा (बीड)

सावधान....

***** आजची वात्रटिका *****
**********************

सावधान....

आदर्श घोटाळ्याचा फटका
तुम्हांलाही बसू शकतो.
सावधान,तुमच्याही नावावर
सोसायटीत फ्लॅट असू शकतो.

हा काही कल्पनाविलास नाही,
प्रत्यक्षात असे घडलेले आहे !
भ्रष्टाचारी हरामखोरांनी
बिल दुसर्‍यांच्या नावे फाडलेले आहे !!

-सूर्यकांत डोळसे,पाटोदा (बीड)

बातम्यांचे मोजमाप

न्यूज राहिल्या बाजूला
व्ह्युज छापून येत आहेत.
प्रिंट आणि इलेक्ट्रॉनिकवाले
सगळेच मापून घेत आहेत.

आर्थिक तर आहेच आहे,
हा वैचारिक भ्रष्टाचार आहे !
कुर्‍हाडीच्या दांड्यांचा
गोतावरतीच वार आहे !!

-सूर्यकांत डोळसे,पाटोदा (बीड)

रिअ‍ॅलिटी

राखी का इन्साफ
न्यायालयालाही मान्य आहे.
बिग बॉसची रिअ‍ॅलिटी बघून
प्रेक्षकही धन्य धन्य आहे.

टीआरपीच्या वाढीसाठीच
मालिकेत सगळा मसाला असतो !
कोल्हे मोकाट सुटलेले
बंदोबस्त मात्र ऊसाला असतो !!


-सूर्यकांत डोळसे,पाटोदा (बीड)

हर्षद मेहताचा निरोप

माझ्याच पायावरती
नवे कळस चढवित आहात.
स्वत:चे घर भरून
देशाला बुडवित आहात.

माणसाची लालसाच
या सर्वांचे कारण होते !
एकदा आठवून बघा
कसे माझे मरण होते ?

-सूर्यकांत डोळसे,पाटोदा (बीड)

सहकारनामा

गाई आटल्या,
कोंबड्या खुडूक.
सूत गिरण्यांपुढे
अंधार बुडूक.

सहकारी संस्थांना
स्वाहाकाराची फूस.
मुळासकट खाल्ला
कारखान्यांनी ऊस.

शुगर कमी,
कारखाने आजारी.
पेशंट वाढता
डॉक्टरची बेजारी.

दुसर्‍याचे बघतो कोण?
प्रत्येकजण खुद्दार !
मागच्या पिढीकडून
सात पिढ्यांचा उद्धार !!

-सूर्यकांत डोळसे,पाटोदा (बीड)

मोबाईल घोटाळा

खातेवाटप

हे नको;ते हवे,
प्रत्येक मंत्री कुंथत असतो.
मालदार खात्यामध्येच
सर्वांचा जीव गुंतत असतो.

शेवटी मिळेल ती जबाबदारी
पार तर पाडली जाते !
खाते भाकड असले तरी
त्यातून मलई काढली जाते !!

-सूर्यकांत डोळसे,पाटोदा (बीड)

लोकशाहीच्या वल्गना

बाप केंद्रात,मुलगा राज्यात,
जिल्हा परिषदेत नातू असतो.
कुणी म्हणायला गेले तर
जनकल्याण हाच हेतू असतो.

उरलेल्या ठिकाणी
लेकी-सुना बसवल्या जातात !
लोकशाहीच्या वल्गना
पद्धतशीर प्रसवल्या जातात !!

-सूर्यकांत डोळसे,पाटोदा (बीड)

भ्रष्ट तुलना

आमचा छोटा,तुमचा मोठा
घोटाळ्यांच्या तुलना चालल्या आहेत.
रूचल्या तरी पचणार नाहीत
अशासुद्ध गोष्टी खाल्ल्या आहेत.

तेच आता उघडे पडलेत
जे जे पाप झाकणारे आहेत !
लोकांनाही दिसू लागले
कोण कोण पांघरूण टाकणारे आहेत !!

-सूर्यकांत डोळसे,पाटोदा (बीड)

रेकॉर्ड ब्रेक घोटाळे

षंढालाही चीड यावी
एवढे अतिरेक होत आहेत.
घोटाळ्यांनीच घोटाळ्यांचे
रोज रेकॉर्ड ब्रेक होत आहेत.

लाज-लज्जा आणि नैतिकता
यांना केंव्हाच ’टाटा’आहे !
आजचा घोटाळा पाहिला की वाटते,
कालचा कितीतरी छोटा आहे !!

-सूर्यकांत डोळसे,पाटोदा (बीड)

डिजिटल राजे

पासंगालाही पुरणार नाहीत
एवढे नेते खुजे आहेत.
तरीही महाराष्ट्रामध्ये
जाणते राजेच राजे आहेत.

कार्यकर्त्यांच्या अजाणतेपणात
जाणत्या राजांचे मूळ आहे !
बावळ्यांच्या मावळेपणात
डिजिटल बॅनरचे खूळ आहे !!

-सूर्यकांत डोळसे,पाटोदा (बीड)

टाटांचा गौप्यस्फोट

एखादे काम फुकटात झालेय
असे कधीच घडले नाही.
प्रत्यक्ष टाटांनासुद्धा
लाच मागायचे सोडले नाही.

जिथे टाटांना भ्याले नाहीत
तिथे आमच्यासारख्यांचे काय आहे?
टाटांकडे तरी पैसा आहे,
आमच्याकडे खायला हाय आहे !

-सूर्यकांत डोळसे,पाटोदा (बीड)

घोटाळ्यांचा दूरसंचार

गॉड आणि फादर

वरचेही पोसावे लागतात,
खालचेही पोसावे लागतात.
राजकारणात गॉड आणि फादर
दोन्हीही असावे लागतात.

राजकीय भवितव्याचा खेळच
शाप आणि उ:शापांचा असतो !
प्रत्येक राजकीय पक्षच
अनेक बापांचा असतो !!

-सूर्यकांत डोळसे,पाटोदा (बीड)

सरकारी ’बाबू’राव

आबूराव सोकलेले आहेत,
खाबूराव सोकलेले आहेत.
सरकारी कार्यालयांमधून
’बाबू’राव सोकलेले आहेत.

आबूरावांचा बळी दिला जातो,
खाबूरावांचा बळी जातो !
बाबूरावांच्या हातावर
बाबूराव टाळी देतो !!


-सूर्यकांत डोळसे,पाटोदा (बीड)

वेडी आशा

कितीही काढायचे म्हटले तरी
आमच्या मनातून जात नाही.
दिल्लीने दाखवून दिले
महाराष्ट्रात स्वच्छ ’हात’नाही.

’गर्जा महाराष्ट्र माझा’म्हणण्याची
काही सोय उरली  नाही !
बरबटलेल्या राजकारणातही
आम्ही हिंमत हारली नाही !!

-सूर्यकांत डोळसे,पाटोदा (बीड)