कायदेशीर टिप्स....प्रसिद्ध वात्रटिकाकार व्याख्याते सूर्यकांत डोळसे यांची मराठी वात्रटिका

आजची वात्रटिका
------------------------

कायदेशीर टिप्स

जे लोकप्रतिनिधी म्हणून पाठवले,
त्यांना सहज माघारी बोलवू शकता.
कुणाचीही आमदारकी खासदारकी,
आता तुम्ही सहज घालवू शकता.

कटकारस्थाने करा, षडयंत्र रचा,
तुम्ही खोट्या केसेसही करू शकता.
न्यायालय बाजूने असले की,
कुणाचाही कर्दनकाळ ठरू शकता.

शब्दाचे अपशब्द करा,
तुम्ही अर्थाचेही अनर्थ करू शकता !
एकदा कुणी जाळ्यात अडकला की,
त्याला अलगद बाजूला सारू शकता!!

-सूर्यकांत डॊळसे,पाटोदा(बीड)
मोबाईल-9923847269
--------------------------------------------
चिमटा-6758
दैनिक पुण्यनगरी
वर्ष -19वे
27मार्च2023