काटा-काटी

काटा-काटी

जसा जसा जिनिंगवर
कापसाचा साठा वाढला जातो.
तसा तसा शेतक‍र्‍यांचा
काट्याने काटा काढला जातो.

काटाकाटीचा हा धंदा
बिनधास्त आणि बेडर असतो !
या काटाकाटीच्या साक्षीला
जिनिंगवरचा ग्रेडर असतो !!


-सूर्यकांत डॊळसे,पाटोदा (बीड)

कमांडची हाय

***** आजची वात्रटिका *****
**********************

कमांडची हाय

हायकमांडचा आदेश येताच
कार्यकर्त्यांकडून हाय खाल्ली जाते.
हिटलरशाहीविरूद्धची नाराजी
ओठांतल्या ओठांत बोलली जाते.

मर्जी न सांभाळणारा कार्यकर्ता
पक्षातून हाकलला जातो !
हायकमांडचा आदेश नसेल तर
मधुचंद्रही पुढे ढकलला जातो !!


-सूर्यकांत डॊळसे,पाटोदा (बीड)

गुटखा ते मधुशाला

***** आजची वात्रटिका *****
**********************

गुटखा ते मधुशाला


संमेलनच्या परंपरेप्रमाणे
वादावर वाद जुंपले गेले.
गुटख्याने सुरू होऊन
मधुशालेने संपले गेले.

बिग तो बिगच ठरला,
बाकी अजूनबी खुजे झाले !
आपण तळतळून फायदा नाही
ज्यांचे व्हायचे त्यांचे भजे झाले !!


-सूर्यकांत डॊळसे,पाटोदा (बीड)

पक्षीय कोंडमारा

***** आजची वात्रटिका *****
**********************

पक्षीय कोंडमारा

श्रेष्ठींनी घोळ म्हटले की,
गोंडा घोळणे भाग असते.
आदेश हा आदेश असतो,
तोही घोळणे भाग असते.

दिलेल्या पदाला,
आलेल्या शब्दाला जागावे लागते !
वैयक्तिक आयुष्यालाही
पक्षशिस्तीने भागावे लागते !!

-सूर्यकांत डॊळसे,पाटोदा (बीड)

भक्ती(भेद)भाव

***** आजची वात्रटिका *****
***********************

भक्ती(भेद)भाव

भक्तांची श्रीमंती
देवालाही कळू शकते.
पैसे मोजले की
झटपट दर्शन मिळू शकते.

देवा,तुझ्या दारामध्ये
बड्यांचा बडेजाव आहे !
तुझ्या नावावरती
फक्त भेदच नाही तर,
सरळ सरळ भाव आहे !!

-सूर्यकांत डॊळसे,पाटोदा (बीड)

सोय-गैरसोय

***** आजची वात्रटिका *****
**********************

सोय-गैरसोय

जशी उमेदवारी
नेत्याच्या पोराला मिळू शकते.
तशी उमेदवारी
एखाद्या चोराला मिळू शकते.

आपली लोकशाहीच
चोरां-पोरांच्या हवाली आहे !
अट्टल मवाल्यालाही
म्हणता येईना,हा मवाली आहे !!

-सूर्यकांत डॊळसे,पाटोदा (बीड)

अमिताभ आणि पाहूणचार

***** आजची वात्रटिका *****
***********************

अमिताभ आणि पाहूणचार

अमिताभची उपस्थिती
हेही राजकारण ठरू लागले.
जणू पाहूण्याच्या काठीने
सगळे साप मारू लागले.

पुलाखालचे पाणी असे
पुलावरून जात आहे !
"मे ऑंगणे मे,
तुम्हारा क्या काम हैं?"
कुणी मनातल्या मनात गात आहे !!

-सूर्यकांत डॊळसे,पाटोदा (बीड)

कविसंमेलनांचे दुर्दैव

***** आजची वात्रटिका *****
***********************

कविसंमेलनांचे दुर्दैव

संमेलनात वर्णी लागणे
हा कविंसाठी सट्टा असतो.
तेच कवी,त्याच कविता
बदललेला कट्टा असतो.

नवे काही लिहित नाहीत,
त्याच कविता वाचल्या जातात !
एकमेकांना साह्य केले की,
जुन्याच कविता पचल्या जातात !!

-सूर्यकांत डॊळसे,पाटोदा (बीड)

खुशबू ते बदबू

***** आजची वात्रटिका *****
**********************

खुशबू ते बदबू

खुशबूच्या कबुलीजबाबातून
बदबू यायला लागली.
विवाहपूर्व संबंधांची
ती कबुली द्यायला लागली.

कोर्टाने तिला पाठींबा देताना
नवाच पेच टाकला आहे !
खुशबूच्या बदबूला
राधा-कृष्णाचा दाखला आहे !!

-सूर्यकांत डॊळसे,पाटोदा (बीड)

लिव्ह इन रिलेशनशिप

***** आजची वात्रटिका *****
**********************

लिव्ह इन रिलेशनशिप

तो असतो ठेवलेला,
तिही ठेवलेली असते.
विवाहसंस्थेची वाट
दोघांनी मिळून लावलेली असते.

प्रेम,विश्वास,जबाबदारी
यांचे काहीही बंधन नसते !
फक्त गरजेपोटी
शरीरच शरीराला आंदण असते

-सूर्यकांत डॊळसे,पाटोदा (बीड)

संमेलनाचा नैतिक विजय

वादाने वाद वाढत गेला
म्हणूनच ही घटका आली.
माणिकचंदच्या गुटख्यातून
संमेलनाची सुटका झाली.

प्रतिष्ठेचे बुरखे असे
टराटरा फाडले पाहिजेत !
सहित्य संमेलनातून
पेताड साहित्यिकही
असेच बाहेर काढले पाहिजेत !!

-सूर्यकांत डॊळसे,पाटोदा (बीड)

कॉपीमुक्ती

***** आजची वात्रटिका *****
**********************

कॉपीमुक्ती

कॉपी म्हणजे चोरी,
ती केवळ नक्कल नाही.
आपणच सिद्ध करतो,
आपल्याला अक्कल नाही.

नक्कल ती नक्कल,
अस्सल ते अस्सल असते.
गुणवत्ता म्हणजे,
स्वत:शीच टस्सल असते.

चला आपण सारे
गुणवत्तेचे भक्त होऊ या !
कॉपीमुक्ती करण्यासाठी
आपण कॉपीमुक्त होऊ या !!


-सूर्यकांत डॊळसे,पाटोदा (बीड)

प्रायोजित साहित्य संमेलन

***** आजची वात्रटिका *****
**********************


प्रायोजित साहित्य संमेलन

साहित्य निर्मिती म्हणजे
त्यांचा रिकामपणाचा छंद आहे.
संमेलनाचे प्रायोजकच सांगतात,
उँचे लोग,उँची पसंद आहे.

सोयीनुसारच बोलायचे
एवढे सगळे चाभरे आहेत !
आता तर तोंडामध्ये
माणिकचंदचे तोबरे आहेत !!


-सूर्यकांत डॊळसे,पाटोदा (बीड)

फ्री-हीट

***** आजची वात्रटिका *****
**********************


फ्री-हीट

इनस्विंग टाकता टाकता
तो आऊटस्विंग टाकू लागतो.
यॉर्करसारखा यॉर्करही
नेमका लाईन हुकू लागतो.

त्याच्या सततच्या नोबॉलचा
तिला वीट येत असतो !
अंदर की बात अशी की,
तो तिला’फ्री-हीट’ देत असतो !!

-सूर्यकांत डॊळसे,पाटोदा (बीड)

चित्रपट पुरस्कार

***** आजची वात्रटिका *****
**********************

चित्रपट पुरस्कार

जरी सर्व विभागांना
चित्रपट पुरस्कार दिला जातो.
तरी चित्रपट पुरस्कारात
नट्यांवर अन्याय केला जातो.


नट्यांच्या धाडसीपणाबद्दल
विशॆष सत्कार व्हायला हवा !
कपड्यांच्या काटकसरीसाठी
एखादा पुरस्कार द्यायला हवा !!

-सूर्यकांत डॊळसे,पाटोदा (बीड)

राजकीय ’योगा’योग

***** आजची वात्रटिका *****
**********************

राजकीय ’योगा’योग

देशाच्या राजकारणामध्ये
राजकीय ’योगा’योग येतो आहे.
रामदेव बाबांचा पक्ष
राजकारणात भाग घेतो आहे.

काहीतरी चांगले घडेल
अशी आशा धरायला
हरकत तर काहीच नाही !
योगासना एवढे सोपे
निवडणूकासन तर नाहीच नाही !!

-सूर्यकांत डॊळसे,पाटोदा (बीड)

मायावतींची ’हारा’ किरी

***** आजची वात्रटिका *****
**********************

मायावतींची ’हारा’ किरी

त्या नोटा,नोटा उरल्या नव्हत्या
त्या नोटांची फुले झाली होती.
सत्काराच्या हाराची बनवाबनवी
सर्वांच्या लक्षात आली होती.

नोटांचे हे असले प्रदर्शन
कुठल्याही क्षणी सार्थ नाही !
कावळे टपलेले असताना
ह्या ’हारा’किरीत अर्थ नाही !!

-सूर्यकांत डॊळसे,पाटोदा (बीड)

मार्च एण्ड

***** आजची वात्रटिका *****
**********************

मार्च एण्ड

आकड्यांचा आकड्यांना
बरोबर मेळ घातला जातो.
महिण्याच्या सुरूवातीपासूनच
मार्च एण्ड चा घोळ घातला जातो.

मार्च एण्ड्च्या खेळाला
कोणत्याच वर्षी खंड नसतो !
एप्रिल संपला तरी
त्यांचा आपला मार्च एण्ड असतो !!

-सूर्यकांत डॊळसे,पाटोदा (बीड)

चर्चांची ’पोल’खोल

***** आजची वात्रटिका *****
**********************

चर्चांची ’पोल’खोल

सोयीचे पाहूणे बोलवून
सोयीच्या चर्चा घडवल्या जातात.
निरपेक्षतेच्या टिर्र्‍या
जगजाहिर बडवल्या जातात.

कुणायचे वाजवायचे आहे
यासाठी ढोल बदलले जातात !
रंगलेल्या चर्चेचेही
शेवटी पोल बदलले जातात !!

-सूर्यकांत डॊळसे,पाटोदा (बीड)

नोटांचा हार

***** आजची वात्रटिका *****
**********************


नोटांचा हार

मायावतींवरच्या मायेचा
एकच तर सार होता.
फुलांचा नाही तर
तो नोटांचा हार होता.

जर नोटांच्या हाराऐवजी
हत्तीवरून साखर वाटली असती !
नसता झाला गाजावाजा,
ना शत्रुंना संधी भेटली असती !!

-सूर्यकांत डॊळसे,पाटोदा (बीड)

गिर्‍हाईक ते मामा

***** आजची वात्रटिका *****
**********************

गिर्‍हाईक ते मामा

बिचार्‍याला ग्राहकाला तर
चुकून राजेपण जाणवले जाते.
राजा,राजा म्हणीत त्याला
राजरोस गिर्‍हाईक बनवले जाते.

कधी ग्राहक गिर्‍हाईक,
कधी ग्राहक मामा असतो !
या बनवाबनवीच्या साक्षीला
जाहिरातींचा जाहिरनामा असतो !!

-सूर्यकांत डॊळसे,पाटोदा (बीड)

राजकीय ट्वेटी-20

***** आजची वात्रटिका *****
**********************

राजकीय ट्वेटी-20


आदेश पाळतो कोण?
सगळे आदेश देते होतात.
कार्यकर्ता म्हणून झिजतो कोण?
सगळेच थेट नेते होतात.

पक्षीय परंपरांना
ही तर धोक्याची घंटी आहे !
दुसरे तिसरे काही नाही
हे राजकीय ट्वेटी-20 आहे !!

-सूर्यकांत डॊळसे,पाटोदा (बीड)