राजकीय अतिक्रमण

***** आजची वात्रटिका *****
**********************

राजकीय अतिक्रमण

गुंडा-पुंडांच्या झुंडीने
लोकशाही व्यापली आहे.
मतदानापुरतीच वाटते
लोकशाही आपली आहे.

गुंडा-पुंडांची झुंडशाही
चिंता करायला लावते आहे !
मोकळे रान दिसले की,
गुंडा-पुंडांच्या झुंडींचे फावते आहे !!

-सूर्यकांत डोळसे,पाटोदा (बीड)

ताकापुरते रामायण

***** आजची वात्रटिका *****
**********************

ताकापुरते रामायण

आपल्याच हातांनी
आपलीच आरती असते.
निवडणूकांच्या तोंडावर
आंदोलनांना भरती असते.

सत्ताधारी अणि विरोधक
सारख्याला वारखे असतात !
लोक पुन्हा पाच वर्षॆ
लोकशाहीला पारखे असतात !!

-सूर्यकांत डोळसे,पाटोदा (बीड)

दास रामाचा वाट पाहे सदना...

***** आजची वात्रटिका *****
**********************

दास रामाचा वाट पाहे सदना...

लोकसभा गेली,राज्यसभा गेली
व्हायची ती नाचक्की झाली.
बांधा,वापरा,हस्तांतरीत करा
ही पॉलिसी तर पक्की झाली.

कुणी कुणाला नकार दिला ?
हे काही उलगडणारे कोडे नाही !
यामुळे दलित ऎक्य आठवले,
हे सुद्धा काही थोडे नाही !!

-सूर्यकांत डोळसे,पाटोदा (बीड)

वाईटातुन चांगले

***** आजची वात्रटिका *****
*********************

वाईटातुन चांगले

लोकसभेचे शल्य
राज्यसभेत टोचले गेले.
उमेदवारीचे खरे सत्य
लोकांपर्यंत पोचले गेले.

दंवडीच्या पहिलवानालाही
फुटाणे आणि रेवड्या आहेत.
नाकारले की ठोकरले ?
वावड्यावर वावड्या आहेत.

दोन्ही घरच्या पाहूण्याचे
शेवटी मुठीमध्ये नाक आहे !
डोक्यावरून पाणी गेल्यावर
दलित ऎक्याची हाक आहे !!

-सूर्यकांत डोळसे,पाटोदा (बीड)

’राज’कीय व्याख्या

***** आजची वात्रटिका *****
**********************

’राज’कीय व्याख्या

उठ्सुठ पक्ष बदलणारे
त्यांच्या मते फेरीवाले आहेत.
या राजकीय व्याख्येमुळे
त्यांचेच वांधे झाले आहेत.

दुसर्‍याचे कुसळ दिसते,
आपल्या मुसळाकडे कुठे लक्ष आहे?
अगदी मनापासून सांगतो,
त्यांचाही फेरीवाल्यांचाच पक्ष आहे !

-सूर्यकांत डॊळसे,पाटोदा (बीड)

चालुपणा

***** आजची वात्रटिका *****
**********************
चालुपणा

पक्षातल्या कार्यकत्यांना
बरोबर खडे चारले जातात.
मतदारांच्या माथीही
आपलेच वारस मारले जातात.

लोकशाहीचे लेबल लावले की,
घराणेशाहीही आवडली जाते !
निवडून निवडून काय तर
दगडातुन वीटच निवडली जाते !!

-सूर्यकांत डोळसे,पाटोदा (बीड)

पक्षांनो कार्यकर्ते सांभाळा...

***** आजची वात्रटिका *****
**********************

पक्षांनो कार्यकर्ते सांभाळा...

कार्यकर्ते किती ’हाडाचे’ आहेत
ते धाब्या-धाब्याला विचारा.
ते कुणाला मिसकॉल मारतात ?
ते गल्लोगल्लीच्या बाब्याला विचारा.

कार्यकर्ता जगायचा असेल तर
त्याने खाल्ले-पिल्ले पाहिजे !
धाबे दणाणले तरी कळत नाही
आम्हीच काय बोलले पाहिजे ?

-सूर्यकांत डोळसे,पाटोद(बीड)

निळाईचे वर्तमान

***** आजची वात्रटिका *****
**********************

निळाईचे वर्तमान

दलित ऎक्याची वाट
केली बिकट बिकट
दिसामाशी निळाई
होई फिकट फिकट.

वेगळीच परडी,
वेगळाच जोगवा.
फिकट निळाईला
कधी खुणवी भगवा.

आयत्या शिकारीभोवती
गिधाडांचा गराडा गराडा !
भिमाईच्या स्वप्नांचा
रोज चुराडा चुराडा !!

-सूर्यकांत डॊळसे,पाटोदा (बीड)

सच का सामना

***** आजची वात्रटिका *****
**********************

सच का सामना

लोकांच्या खाजगी जीवनात
नको तेवढे डोकू लागले.
रिऍलिटी शो च्या नावाखाली
नको नको ते विकू लागले.

एखादा क्षणिक विचार
कायमचे सत्य असू शकत नाही !
टि.आर.पी. सारखा प्रेक्षक मात्र
या ’माया’जालात फसू शकत नाही !!

-सूर्यकांत डोळसे,पाटोदा (बीड)

पक्षीय स्वच्छता अभियान

***** आजची वात्रटिका *****
**********************

पक्षीय स्वच्छता अभियान

एका राजकीय पक्षाने
पक्ष स्वच्छ करायचे ठरविले
पक्षीय स्वच्छता अभियान
मोठ्या थाटामाटात मिरविले.

कोण मोठा ? कोण छोटा ?
असे काही काही पाहिले नव्हते !
पक्ष स्वच्छ झाला तेंव्हा
पक्षात कुणीच राहिले नव्हते !!

-सूर्यकांत डोळसे,पाटोदा (बीड)

पांढरे साप

नागपंचमीच्या हार्दिक शुभेच्छा !
कारगिल ’विजय दिना’ निमित्त शहिदांना सलाम !!

***** आजची वात्रटिका *****
**********************

पांढरे साप

किती दिवस करणार
पुन्हा पुन्हा पाप हे ?
दुध पाजून पोसणार
विषारी पांढरे साप हे ?

काल वेगळे,आज वेगळे
पांढर्‍या सापांचे बिळ आहे !
किती पंचम्या आल्या गेल्या?
चालूच त्यांची गिळागिळ आहे !!

-सूर्यकांत डोळसे,पाटोदा (बीड)

सर्वपक्षसमभाव

***** आजची वात्रटिका *****
**********************

सर्वपक्षसमभाव

कधी इकडे,कधी तिकडे
तिकीटासाठी गोंडा घोळला जातो.
सर्वपक्षसमभाव असा,
राजकारण्यांकडून पाळला जातो.

पक्ष,धोरण,निष्टा,त्याग
हे तर केवळ आव असतात !
तिकीटवाटपात मात्र
सर्वपक्षात सम ’भाव’ असतात !!

-सूर्यकांत डोळसे,पाटोदा (बीड)

राजकीय चॉईस

***** आजची वात्रटिका *****
**********************

राजकीय चॉईस

दोन कॉंग्रेस,दोन सेना
कार्यकर्त्यांना चॉईस घेता येतो.
पाहिजे तेंव्हा,पाहिजे त्याला
धुसफुसत निरोप देता येतो.

दोन्हीकडच्या कार्यकर्त्यांचे
धोरण असे इक्वल आहे !
तुम्हीच ओळखा पाहू,
कोण कुणाचा सिक्वल आहे ?

-सूर्यकांत डॊळसे,पाटोदा(बीड)

अरे कसाबा.....

***** आजची वात्रटिका *****
**********************

अरे कसाबा.....

कबुलीजबाब दिलास तरी
तुझा गुन्हा माफ होणार नाही.
तुला शिक्षा दिल्याने काही
कुणाचा जीव परत येणार नाही.

तरीही नराधमा,
तुला फाशीच देणे भाग आहे.
तुझ्याएवढाच तुझ्या पोशिंद्यावर
आमच्या सर्वांवा राग आहे.

भित्र्या,एकदा दिलास तर
कबुलीजबाब पलटु नकोस !
सापाची औलाद असलास तरी
खाल्ल्या मिठावर उलटु नकोस !!

-सूर्यकांत डोळसे,पाटोदा (बीड)

देशग्रहण

देशग्रहण

खग्रास ग्रहण लागावे
अशीच देशाची रया आहे.
पांढर्‍या खादीचीच
देशावरती छाया आहे.

गिळागिळी म्हणजे ग्रहण नाही
ग्रहणाच अर्थ कळतो आहे.
दररोज नवा राहू-केतु
जमेल तेवढे गिळतो आहे.

उघड्या डोळयांनी सारे,
हे ग्रहण बघतो आहोत !
त्यांना नवेनवे वेध लागतात
आपण कुठे जागतो आहोत ?

-सूर्यकांत डोळसे,पाटोदा (बीड)

वाढदिवसांची वाढ

***** आजची वात्रटिका *****
**********************

वाढदिवसांची वाढ

वाढदिवस साजरे केल्याशिवाय
जणु नेते, नेते वाटत नाहीत.
बारशापासून शताब्दीपर्यंत
कुठलेच महोत्सव सुटत नाहीत.

नेत्यांच्या वाढदिवसाला
कार्यकर्त्यांचेच थाट असतात.
लेकराबाळांचे नसले तरी
नेत्यांचे वाढदिवस पाठ असतात.

अमके दान, तमके दान,
कार्यक्रमांची दाणादान असते.
पक्षीय मतभेद विसरल्याची
ऍक्टींग पण फार छान असते.

नेत्यांचे वाढदिवस,
नेत्यांना लखलाभ होवोत !
" तुम जिओ हजारों साल "
पण जनतेच्या नशिबी,
सुखाचे चार दिवस येवोत !!

-सूर्यकांत डॊळसे,पाटोदा (बीड)

गटार सोहळा

***** आजचीच वात्रटिका *****
***********************

गटार सोहळा

आधिच तर उल्हास,
त्यात घाईला आषाढ मास येतो.
गटारीच्या टोकावरून
येणार्‍या श्रावणाचा वास येतो.

जे बनतात बळीचे बकरे,
त्या चोंबड्यांची पर्वा करू कशाला?
करणारे क्वाक क्वाक करतील
त्या कोंबड्यांची पर्वा करू कशाला ?

ते वाजविती तुणतुणे कितीही
मज वाटते ती गिटार आहे.
हा आषाढ सोहळा पंगतो
साक्षीला तुंबलेली गटार आहे.

थु ss त्या विदेशी पिणारांची
संस्कॄतीशी अशी गट्टी व्हावी
ग्लासास ग्लास भिडवतो कोण?
थेट बाटलीनेच हातभट्टी प्यावी.

श्रावणाच्या भितीपोटीच बघा
ही अमावश्य़ा अशी रंगा येते !
खाऊन,पिऊन पावन झालो
आमच्यासाठी गटारच गंगा होते !!

-सूर्यकांत डोळसे,पाटोदा (बीड)

फुटाफुटी ते कुटाकुटी

***** आजची वात्रटिका *****
**********************

फुटाफुटी ते कुटाकुटी

पक्षा-पक्षातल्या सुभेदारांना
जास्तच पंख फुटू लागले.
गटा-तटाच्या वादावरून
परस्परांनाच कुटू लागले.

जिंदाबाद-मुर्दाबादसोबत
हाणामारीची भाषा ऒठी आहे !
फुटा-फुटी तर जुनीच होती,
आता नव्याने ही कुटाकुटी आहे !!

-सूर्यकांत डोळसे,पाटोदा, (बीड)

संसाराचा खेळ

***** आजची वात्रटिका *****
**********************

संसाराचा खेळ

त्याला आवडायचा फुटबॉल,
तीला आवडायचा क्रिकेट.
कधी व्हायचा गोल तर,
कधी पडायची विकेट.

मग त्यांच्या लक्षात आले,
संसार म्हणजे खेळ नसतो !
आवडी-निवडी वेगळ्या तरी,
तो दोन जीवांचा मेळ असतो !!

-सूर्यकांत डोळसे,पाटोदा,(बीड)

महागाईचा ’तुर’ टपणा

***** आजची वात्रटिका *****
**********************

महागाईचा ’तुर’ टपणा

सर्वसामान्यांच्या हातांवर
वाढत्या महागाईची तुरी आहे.
घट करती का पातळ करती?
हा संवाद तर घरोघरी आहे.

डाळीने ठरविलेले दिसतेय
ताकास तुर लागु द्यायची नाही !
सेंच्युरी मारल्याशिवाय काही
आता मुळीच माघार घ्यायची नाही!!

-सूर्यकांत डॊळसे,पाटोदा (बीड)

नवनिर्माणाचा राडा

***** आजची वात्रटिका *****
**********************

नवनिर्माणाचा राडा

रस्त्यांवरील राड्याचे लोण
पक्षामध्ये पसरले गेले.
नवनिर्माणाचा संकल्पही
त्याच राड्यात विसरले गेले.

जे आशा लावून बसले आहेत
त्यांचाही भ्रमनिरास होईल !
कुणाच्या ध्यानी-मनीही नव्हते
नवनिर्माणाची अशी हरास होईल !!

(शब्दार्थ:-हरास=जाहिर लिलाव)

-सूर्यकांत डॊळसे,पाटोदा (बीड)

ऑर्कु्टचे वास्तव

***** आजची वात्रटिका *****
**********************

ऑर्कु्टचे वास्तव

चेहर्‍यावर अनेक चेहरे
लावतात लोक येथे.
गर्ल्स फ्रेण्ड्च्याच मागे
धावतात लोक येथे.

कॉपी-पेस्ट्चाच मंत्र
इथे जपवला जातो.
कुठे न खपलेला माल
इथे खपवला जातो.

मैत्रीची नातीही इथे
तकलादू-बेगडी असतात.
आपल्या घराचे दरवाजे
कुठे सर्वांसाठी उघडी असतात ?

एका वर्षात अनेक वॆळा
इथे वाढदिवस साजरे होतात.
शुभेच्छा लाटणारांच्यासमोर
इथे शुभेच्छुकच लाजरे होतात.

नकली नावे,नकली चेहरे
जो तो इथे मिरवतो आहे !
वास्तवाच्या आभासामध्ये
खरा चेहराही हरवतो आहे !!

-सूर्यकांत डोळसे,पाटोदा (बीड)