पाणीबाणी...प्रसिद्ध वात्रटिकाकार व्याख्याते सूर्यकांत डोळसे यांची मराठी वात्रटिका

 

आजची वात्रटिका
-------------------------

पाणीबाणी

कुठे पाणी नाही,कुठे नळ नाही,
जिथे नळ आहे तिथे दाब नाही.
पाणी म्हणजे गटारगंगा,
ही काही विशेष अशी बाब नाही.

कुणाच्या आवडीनुसार पाणी येते,
कुणाच्या सवडीनुसार पाणी येते.
कुणासाठी पाणी वाहती गंगा,
कुणाच्या निवडीनुसार पाणी येते.

कुठे पाणी अस्वच्छ,कुठे स्वच्छ,
जिथे स्वच्छआहे,तिथे शुद्धता नाही !
पाणी कुठे मुरतेय ?ते विचारायला,
लोकांची अजूनही सिद्धता नाही!!

-सूर्यकांत डॊळसे,पाटोदा(बीड)
मोबाईल-9923847269
----------------------------------
चिमटा-6838
दैनिक पुण्यनगरी
वर्ष -19वे
18जून2023