मार्च एण्डची रात्र

मार्च एण्डची रात्र

मार्च एण्डच्या रात्रीला
इतिहास घडवला जातो.
उरलासुरला सगळा पैसा
एका रात्रीत उडवला जातो.

उरलासुरला सगळा पैसा
एका रात्रीत अँडजेस्ट केला जातो!
मार्च एण्डच्या रात्रीलाच
एपिल्र फूलला जन्म दिला जातो!!

- सूर्यकांत डोळसे, पाटोदा(बीड)

चोरीचे अभंग

देवाचिया द्वारी
देवाचिया घरी
होतसे चोरी
कशी काय? ।।1।।

आमच्या रक्षणाच
तुझ्यावर भरवसा
ठेवावा कसा?
सांग देवा ।।2।।

किती तुझ्या लीला
किती तुझे बहाणे
चोरच शहाणे
भक्तांपेक्षा ।।3।।

- सूर्यकांत डोळसे,पाटोदा(बीड)

चोर ते चोर

उडवू नका खिल्ली त्यांची
असंसदीय शब्द खिल्लीत आहेत.
जसे चोरटे गल्लीत आहेत,
तसे चोरटे दिल्लीत आहेत.

चोरटे एकटे दुकटे नाहीत,
चोरट्यांच्या टोळ्या आहेत !
विचारू नका नावे त्यांची
या फक्त ढगात गोळ्या आहेत !!

-सूर्यकांत डॊळसे,पाटोदा(बीड)

चोर नामाचा गजर

गजर करा रे गजर करा
चोर नामाचा गजर करा
कोण आम्हाला चोर म्हणतो ?
त्याला इथे हजर करा

लुटले आम्ही, लुटतो आम्ही
तुम्ही पुरावे हजर करा
गजर करा रे गजर करा
चोर नामाचा गजर करा

नेहमी तुम्हाला वाकडे दिसते
सरळ तुमची नजर करा
गजर करा रे गजर करा
चोर नामाचा गजर करा

घुसलो आम्ही, पोसलो आम्ही
व्यवस्थेचे 'सिझर' करा!
गजर करा रे गजर करा
चोर नामाचा गजर करा!!

- सूर्यकांत डोळसे, पाटोदा (बीड)

सगळीच चोरी

चोरांनाही चोर म्हणायचे
दिवस आता उरले नाहीत.
ते अट्टल चोर असूनही
अजून चोर ठरले नाहीत.

चोरांनाही चोर म्हणणे
ही असंसदीय भाषा आहे!
कोणतेही काम हलके नाही
चोरी तर त्यांचा अधिकृत पेशा आहे!!

- सूर्यकांत डोळसे, पाटोदा (बीड)

अर्थाचा अनर्थ

महाराष्ट्राकडून महाराज्याकडे
हाच संकल्पाचा अर्थ आहे.
मंत्री आणि आमदारांना वाटतेय
हा संकल्पच व्यर्थ आहे.

एवढे मात्र कबूल की,
हा अर्थसंकल्प शिलकी आहे!
विरोधकांपेक्षा सहकार्‍यांचीच
प्रतिक्रिया कितीतरी बोलकी आहे!!

- सूर्यकांत डोळसे, पाटोदा (बीड)

बातमीचा परिणाम

राष्ट्रवादी आणि काँग्रेसवाले
एकमेकांना फटकू लागले
घटस्फोटाची बातमी ऐकून
जरा जास्तच खटकू लागले

घटस्फोटाच्या बातमीच्या परिणामाचे
हेच उदाहरण देता येईल!
कारण आता घटस्फोटही
लगेचच्या लगेच घेता येईल!!

- सूर्यकांत डोळसे, पाटोदा (बीड)

आघाडी धर्माचा अर्थ

ते म्हणाले, हय़ांनी शब्द पाळला नाही.
हे म्हणाले, त्यांनी शब्द पाळला नाही.
त्यांचे माहिती नाही पण,
आम्हाला आघाडी धर्म कळला नाही.

शब्दाने शब्द वाढवून
वाद वाफसायचा असतो!
जणू आघाडी धर्म म्हणजे
पाठीत खंजीर खुपसायचा असतो!!

- सूर्यकांत डोळसे,पाटोदा (बीड)

तात्काळ घटस्फोट

ती लवंगी मिरची, 
तो निव्वळ ढोकळा आहे
अशांना घटस्फोटाचा मार्ग
आता तत्काळ मोकळा आहे

आततायी निर्णयाचा
झटपट निकाल लागला जाईल!
घटस्फोटांचा आकडा
आता वरचेवर फुगला जाईल!!

- सूर्यकांत डोळसे,पाटोदा(बीड)

परंपरांचे पाईकत्व

मोका आणि धोका

कुठल्याही प्रश्नाचे उत्तर
राजकारणात सेम नाही.
धोक्यात आणि मोक्याचा
राजकारणात नेम नाही.

मोका आणि धोका
दबा धरून बसलेला असतो!
इथे समाधानी कुणीच नाही
प्रत्येक जण वसवसलेला असतो!!

- सूर्यकांत डोळसे,पाटोदा(बीड)

झेडपीचे सत्ताकारण

एकाचा दांडा, एकाचा झेंडा,
झेडपी म्हणजे मोंढा आहे.
कुणीही असले तरी
त्यांचा सत्तेकडेच लोंढा आहे.

जमेल ते समीकरण
झेडपीत मांडले गेले!
कुणाचाही कुणाला पाठिंबा
बिचारे लोक गंडले गेले!!

- सूर्यकांत डोळसे, पाटोदा (बीड)

आघाडीची सल

आघाडीची सल

कुणी खुपसतो नाक,
कुणी कशात काय घालतो.
विकासाच्या राजकारणात
मित्रपक्ष पाय घालतो.

सत्तेसाठी एकत्र आले तरी
प्रत्येकाचा वेगवेगळा कल आहे!
आघाडीच्या राजकारणाची
ही सार्वत्रिक सल आहे!!

- सूर्यकांत डोळसे,पाटोदा(बीड)

निर्लज्जम सदासुखी

विचारांची आणि निष्ठेची
गरजच आज वाटत नाही.
पक्षप्रवेश देणार्‍या-घेणार्‍याला
पक्षांतराची लाज वाटत नाही.

पक्षप्रवेशाचे जाहीर सोहळे
कुठे ना कुठे रोज साजरे आहेत!
देणारे-घेणारे-बघणारे
सगळेच निलाजरे आहेत!!

- सूर्यकांत डोळसे, पाटोदा (बीड)

जल-स्वराज्य

गावच्या गावं तहानलेली
कुणी पोटभर पाणी प्याले नाही.
पाण्यासारखा पैसा गेला
पण 'जलस्वराज्य' आले नाही.

दीडशे वर्षानी स्वराज्य मिळाले
पण 'जलस्वराज्या'चा पत्ता नाही!
आता लढावे तरी कुणाविरुद्ध?
आता काही परक्यांची सत्ता नाही!!

- सूर्यकांत डोळसे, पाटोदा (बीड)

जातीचा 'राखीव' चमत्कार

कुणाच्या जातीवर जाऊ नये 
पण जातीची बातच आगळी असते.
दोन सख्ख्या भावांचीही
इथे जातच वेगळी असते.

एकाची जात एक असते,
दुसर्‍याची जात दुसरी असते!
जातीय चमत्कार असा की,
बापाची जात तिसरी असते!!

- सूर्यकांत डोळसे, पाटोदा (बीड)

सचिनची 'शेकडे' वारी

उधार-बिधार काही नाही
सचिनचा खेळच रोकडा आहे.
आता सचिनच्या नावावरती
शेकडय़ांचा शेकडा आहे.

धुतलेल्या गोलंदाजांच्या साक्षीला
सचिनची आकडेवारी आहे!
कोणत्याही गणितात न बसणारी
सचिनची शेकडेवारी आहे!!

- सूर्यकांत डोळसे, पाटोदा (बीड)

रेल-खेल-रत्न

भाडेवाढीला बळी म्हणून
दिनेश (त्रि)वेदीवर चढवले गेले.
प्रवाशांच्या ममतेपोटी
बजेटवर 'मेगाब्लॉक' घडवले गेले.

प्रवाशांना त्रास होऊ नये
असा प्रयत्न व्हायला हवा!
ममता बॅनर्जीनाच
पहिला 'रेल-खेलरत्न' द्यायला हवा!!

- सूर्यकांत डोळसे, पाटोदा (बीड)

पांढरे दु:ख

लागली काय? उठली काय?
भावात फरक पडला नाही.
निर्यातबंदी उठली तर
भाव कसा वाढला नाही?

शेतकर्‍याचा चेहरा
कापसासारखा पांढराफटक आहे!
शेतकर्‍यांचा समज होतोय
हे सगळेच नाटक आहे!!

- सूर्यकांत डोळसे, पाटोदा (बीड)

कव्हर -स्टोरी

घोटाळ्यावर घोटाळे
घोटाळ्यांना जोर आहेत.
यांच्यातही चोर आहेते
त्यांच्यातही चोर आहेत.

नेत्यांची पाठराखण करण्याची
पक्षा पक्षाला चोरी आहे!
कितीही कव्हर घातले तरी
घोटाळ्यांचीच स्टोरी आहे!!

- सूर्यकांत डोळसे, पाटोदा (बीड)

लोकहिताचे तत्वज्ञान

एक मस्तवाल नेता
दादागिरी करीत वदला.
लोकहित साधत असेल तर
शंभर वेळा पक्ष बदला.

लोकहिताच्या तत्वज्ञानाची
मोठी अजबच भाषा आहे !
पक्ष बदलूंपेक्षा बरी
बाजारातली वेश्या आहे !!

-सूर्यकांत डोळसे,पाटोदा (बीड )

घरकुल-मसाला

घरकुल योजनेमध्ये
जो तो हात मारून घेतो आहे.
घरकुलातला मसाला
जमेल तसा खातो आहे.

खाणारांना मिरच्या झोंबतील,
तुमची खसखस पिकली जाईल!
गरजवंत नावाची वेडी हळद
काहीतरी धडा शिकली जाईल!!

- सूर्यकांत डोळसे, पाटोदा (बीड)